ၶၢဝ်ႇ-ၸၢႆးၶုၼ်
ဝၼ်းထီႉ-31-07-2020
ၽၢႆႇတပ်ႉလႄႈၽၢႆႇဢုပ်ႉပိူင်ႇ SSPP/SSA ဢၼ်တူင်ႉၼိုင်ၼႂ်းၸေႈဝဵင်းပၢင်ႇသၢႆးၼၼ်ႉ ႁူမ်ႈၵၼ်ၶဝ်ႈၵူတ်ႇထတ်းတိ ၺွပ်းပၢင်သိုဝ်ႉၶၢႆယႃႈမဝ်းၵမ်လၢႆလၢႆတီႈ ၼႂ်းၸေႈဝဵင်းပၢင်ႇသၢႆး ဝႃႈၼႆ။
မိူဝ်ႈဝၼ်းထီႉ 21/22/27-July-2020 ၼၼ်ႉၽၢႆႇတပ်ႉၽၢႆႇဢုပ်ႉပိူင်ႇပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဢၼ် တူင်ႉၼိုင်ၼႂ်းၸေႈဝဵင်းပၢင်ႇသၢႆး ႁူမ်ႈၵၼ်ၶဝ်ႈၵူတ်ႇထတ်းတိၺွပ်း ပၢင်သိုဝ်ႉၶၢႆယႃႈမဝ်းၵမ် ဢၼ်မီးတီႈႁိမ်းဝၢၼ်ႈၵႂၢႆး တေႃႇၼွင်သႅင်း လႄႈ တီႈၼႂ်းပွၵ်ႉမၢႆ (4) ဝဵင်းပၢင်ႇသၢႆး တၢင်းမူတ်းတိၺွပ်းလႆႈၵူၼ်းသူႇသမ်းၵိၼ်ၶၢႆယႃႈမဝ်းၵမ် 22 ၵေႃႉ လႆႈပႃးယႃႈၽိၼ်ႇၽိူၵ်ႇ ၊ ယႃႈမႃႉ ၊ ၵွင်ႈဢၼ်သႂ်ႇလဵၵ်းတွၵ်ႇယိုဝ်းၼၼ်ႉသွင်လဝ်း ဝႃႈၼႆ။ၵူၼ်းၸိူဝ်းဢၼ် ထုၵ်ႇတီႉၺွပ်းၸိူဝ်းၼၼ်ႉ ပဵၼ်ၵူၼ်းၶိူဝ်း တႆး ၊ ၶၢင် ၊ လွႆ ၊ ၶႄႇ ၸိူဝ်းၼႆႉသေ တေပၼ်တူတ်ႈတၢမ်ႇ ၵႂႃႇ ၸွမ်းၼင်ႇမူႇပိူင် ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး မီးၼၼ်ႉယူႇၼႆ ၽူႈမီးပုၼ်ႈၽွၼ်းဢၼ်တူင်ႉၼိုင် တၢင်းၸေႈဝဵင်းပၢင်ႇသၢႆး ၵေႃႉၼိုင်ႈလၢတ်ႈ ၼင်ႇၼႆ။
