ၶၢဝ်ႇ – SSPP info
ဝၼ်းထီႉ – 22- 07- 2020
ဝၼ်းထီႉ(22)ဝၼ်း လိူၼ်ၵျူႇလၢႆႇ ပီ2020(မိူဝ်ႈၼႆႉ) သိုၵ်းမၢၼ်ႈတပ်ႉ506 ၼမ်ႉလၼ်ႈ လႄႈတင်း ပႃႇတီႇမႂ်ႇ သုင်ၸိုင်ႈတႆး၊တပ်ႉသိုၵ်းၸိုင်ႈတႆးSSPP/SSA တပ်ႉၸုမ်း(738) တပ်ႉၵွင်(351) ဢၼ်ၶုၼ်/သိုၵ်းၸၢႆးလႃႉ၊ ၶုၼ်ႁၢၼ်/ၸၢႆးၺုၼ်ႉ ဢွၼ်ႁူဝ် ၽႃႇၺႃးၵၼ်သေ ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈပၢင်မူင်ႈ ဢိူင်ႇၼွင် ၵေႃႈ တူင်ႇဝဵင်းသီႇပေႃႉ ၼႆ။
တီႈပဵၼ်ပၢင်တိုၵ်းၼႆႉ ယၢၼ်ၵႆၵၼ်တင်း ဝၢၼ်ႈပၢင်မူင်ႈ မွၵ်ႈၼိုင်ႈလၵ်းသေ သိုၵ်းမၢၼ်ႈၶဝ်ၸုမ်းၼႆႉ မိူဝ်ႈ မႃးတင်းဝၢၼ်ႈၺွင်ႇထွၵ်ႈတႄႉၵေႃႈ ပဵၼ်ၸုမ်းလဵဝ်ၵၼ်သေ ၽိူဝ်ႇႁွတ်ႈထိုင်မႃး တီႈဝၢၼ်ႈပၢင်မူင်ႈၼၼ်ႉ ၽေၵၼ်ႁဵတ်းသွင်ငႃး ၸုမ်းၼိုင်ႈယူႇဝႆႉၼႂ်းဝၢၼ်ႈပၢင်မူင်ႈ ၸုမ်းၼိုင်ႈၵႂႃႇတင်းဢွၵ်ႇဝၢၼ်ႈပၢင်မူင်ႈယဝ်ႉ ၶိုၼ်းသိုပ်ႇၵႂႃႇတင်းဝၢၼ်ႈၼႃးဢုင်သေ ၽႃႇၺႃးတပ်ႉသိုၵ်းၸိုင်ႈတႆးလႄႈ လႆႈပဵၼ်ပၢင်တိုၵ်းၵၼ် ယၢမ်း ႁူဝ်ၶမ်ႈ (4)မူင်းၶိုင်ႈ တေႃႇယၢမ်းႁူဝ်ၶမ်ႈ(5)မူင်း ဝႃႈၼႆ။
ထိုင်မႃး ယၢမ်း5း41ၼၼ်ႉ သိုၵ်းမၢၼ်ႈဢၼ်ၵိုတ်းဝႆႉတီႈဝၢၼ်ႈပၢင်မူင်ႈၼၼ်ႉၵေႃႈ ၶၢၼ်းဢဝ်ထူဝ်ႈၼႂ်း ဝၢၼ်ႈၼိုင်ႈလမ်းသေ ၵႂႃႇတင်းဝၢၼ်ႈၼႃးဢုင် ၵႂႃႇႁၢႆလၢႆပႅတ်ႈ ၼႂ်းၵေႈဝၢၼ်ႈပၢင်မူင်ႈလႄႈဝၢၼ်ႈၼႃး ဢုင်၊ ၵူၼ်းဝၢၼ်ႈၼႂ်းပိုၼ်ႉတီႈ မႆႈၸႂ်ၵူဝ်သိုပ်ႇပဵၼ်ပၢင်တိုၵ်း လႆႈႁူႉၸွမ်းၼင်ႇၼႆ။