July 19, 2020
By – SSPP/SSA
ၼႂ်းလိူၼ်ၵျူႇလၢႆႇ(1)ဝၼ်း တေႃႇထိုင် (11)ဝၼ်း ပီႊ2020ၼီႊၼၼ်ႉ ၸဝ်ႈသိုၵ်း ၸၼ်ၶိူဝ်း ၽူႈၵွၼ်း ပၢႆးမိူင်းတပ်ႉၸုမ်း(702)လႄႈ ၵေႃႇမတီႇၸေႊဝဵင်းမၢႆ(3) လႆႈဢွၼ်ႁူဝ်ၽူႈၵွၼ်းတပ်ႉ ဢိၵ်ႇလုၵ်ႈတပ်ႉ ႁူမ်ႈမိုဝ်းၵၼ်တင်း ပေႃႈမႄႈၵူၼ်းမိူင်းၼႂ်းပိုၼ်ႉတီႈသေ တေႃႉသၢႆးသိူဝ်ႇသဵၼ်ႈတၢင်း ၼႂ်းၸေႊဝဵင်း မိူင်းသူႈ ၼႃႈတီႈဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/SSA) ၵႂႃႇယူႇ။
တီႈၵၢၼ်တေႃႉသၢႆးသိူဝ်ႇသဵၼ်ႈတၢင်းၼၼ်ႉ ၵေႃႉသိုၵ်းၵေႃႉႁၢၼ် ဢိၵ်ႇပေႃႈမႄႈၵူၼ်းမိူင်း ႁူမ်ႈႁႅင်းမီး (140)ၵေႃႉ၊ ၵႃးတူင်ႈၽူင်ႈတေႃႉတၢင်ႇသၢႆး(37)လမ်း၊ ၵႃးဝီးလူဝ်ႇတႃႊသူၵ်ႇသၢႆး(2)လမ်း၊ ၵႃးပႅၵ်ႉၽူဝ်းၶုတ်း သၢႆး(2)လမ်းသေ လႆႈသိူဝ်ႇသၢႆး ၼိူဝ်သဵၼ်ႈတၢင်းတႃႈႁုင်း တေႃႇထိုင် ဝၢၼ်ႈဝဵင်း တၢင်းၵႆမီးမွၵ်ႈ (20)လၵ်းပၢႆၼႆယူႇ။
ၼႂ်းလိူၼ်ၵျူႇလၢႆႇ(11)ဝၼ်းၼႆႉၼင်ႇၵဝ်ႇ ၶိုၼ်းသိုပ်ႇတေႃႉသၢႆးသိူဝ်ႇသဵၼ်ႈတၢင်းဝၢၼ်ႈပႅင်ႇဢူးၵႂႃႇယူႇ။ သဵၼ်ႈတၢင်းဝၢၼ်ႈပႅင်ႇဢူးၼႆႉ တၢင်းၵႆမီးမွၵ်ႈ (2)လၵ်းၼႆယူႇ။
ၼႂ်းၵၢၼ်တေႃႉတၢင်ႇသၢႆး သိူဝ်ႇသဵၼ်ႈတၢင်းတႃႈႁုင်း-ဝၢၼ်ႈဝဵင်းလႄႈ ဝၢၼ်ႈပႅင်ႇဢူးၼႆႉ သၢင်ႉငိုၼ်း သဵင်ႈမွၵ်ႈ(42927000)သႅၼ်သေ သၢႆးသဵင်ႈၵႂႃႇမွၵ်ႈ(2000)လမ်း ယူႇယဝ်ႉ။
ၵၢၼ်ၵေႃႇသၢင်ႈသဵၼ်ႈတႃႈသၢႆတၢင်းၼႆႉ ၶဝ်ႈပႃးဝႆႉၼႂ်းၶၵ်ႉၵၢၼ်ၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/SSA)ယူႇယဝ်ႉ။
