ၶၢဝ်ႇ – SSPP/SSA lnfo
ဝၼ်းထီႉ -06 -07 -2020
ၸွမ်းၼင်ႇ ႁူဝ်ပဝ်ႈလူင် ပႃႇတီႇမႂ်ႇသုင်ၸိုင်ႈတႆး၊တပ်ႉသိုၵ်းၸိုင်ႈတႆးSSPP/SSA ၸွမ်းသိုၵ်းလူင်/ပၢင်ႇၾႃႉ ၵႆႉပၼ် ၶေႃႈသင်ႇသွၼ်ၽူႈၵွၼ်းတပ်ႉလုၵ်ႈတပ်ႉဝႃႈ “ပုၼ်ႈၽွၼ်းဢၼ်လူဝ်ႇႁဵတ်းသၢင်ႈၸွႆႈထႅမ်ပၼ် ပေႃႈမႄႈၵူၼ်း မိူင်းၼၼ်ႉ လူဝ်ႇဝႆႉမိူၼ်ၼင်ႇ သူတွင်ႉမႆႈၶႂ်ႈၵိၼ်သေ သႂ်ႇဝႆႉၼႂ်းဢူၵ်းၼႂ်းၸႂ်ၵူႈတႃႇသေႇ” ၼႆၼၼ်ႉသေ ပႃႇတီႇမႂ်ႇသုင်ၸိုင်ႈတႆး၊တပ်ႉသိုၵ်းၸိုင်ႈတႆးSSPP/SSA ၵေႃႇသၢင်ႈပၼ် “ၶူဝ်” ပေႃႈ မႄႈၵူၼ်း မိူင်း ၼႂ်းဢိူင်ႇ ၶွၵ်ႈၸၢင်ႉ ၸေႈဝဵင်းၵေးသီး။
တေႇၵေႃႇသၢင်ႈပၼ် မိူဝ်ႈပီ2020ၼီႊ၊ ပၢတ်ႈ(5)လိူၼ် ဝၼ်းထီႉ23ၼၼ်ႉသေ ယဝ်ႉတူဝ်ႈပိုတ်ႇၶူဝ်မႂ်ႇၵႂႃႇ မိူဝ်ႈဝၼ်းထီႉ 5-7-2020ၼႆႉယူႇ။ ၽူႈဢွၼ်ႁူဝ်ၵေႃႇသၢင်ႈပၼ်ၶူဝ် ၵေႃႉၼိုင်ႈလၢတ်ႈဝႃႈ “ ယူႇတီႈ ငဝ်ႈ ငုၼ်းႁဝ်းၶႃႈ ဢွၵ်ႇပၼ်ငိုၼ်းလႄႈ ၶူဝ်းၶွင်ၵေႃႇသၢင်ႈ ၶိူင်ႈၸၢၵ်ႈ ၊ ၽၢႆႇပေႃႈမႄႈၵူၼ်းမိူင်းတႄႉ ဢွၵ်ႇဢဵၼ်ႁႅင်းတူဝ်ႁႅင်းၸႂ်ၸွႆႈပႃး ၵူၺ်းၶႃႈ” ဝႃႈၼႆ။ ႁူဝ်ပဝ်ႈဢိူင်ႇ ၼႂ်းဢိူင်ႇၶွၵ်ႈၸၢင်ႉၵေႃႈ လၢတ်ႈဝႃႈ “မိူဝ်ႈဢွၼ်တၢင်း ပေႃး ၶၢဝ်းႁိုဝ်ႉ ၶၢဝ်းၾူၼ်ၼႆ ႁဝ်းၶႃႈ မီးတၢင်းယၢပ်ႇလွင်ႈတႃႇၵႂႃႇမႃးပႆတႄႉတႄႉ၊ ထိုင်မႃးပီၼႆႉ ၽူႈယႂ်ႇၵူၼ်းလူင် ၼႂ်း ငဝ်ႈငုၼ်း တူၺ်းထိုင်ၸွႆႈထႅမ်ၵေႃႈသၢင်ႈပၼ်ၶူဝ်ႁဝ်းၶႃႈၸိူင်ႉၼႆ ပဵၼ်ဢၼ်ငိၼ်းၸူမ်း တၢင်ႇၵုင်ႇမုၼ် ၼိူဝ်ၽူႈယႂ်ႇၵူၼ်းလူင်လႄႈလုၵ်ႈၸုမ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး တႄႉတႄႉဝႃႈဝႃႈၶႃႈ ယဝ်ႉ” လၢတ်ႈၼႄၼင်ႇၼႆ။
ၶူဝ်လင်ၼႆႉ တိတ်းၸပ်းဝႆႉႁိမ်းဝၢၼ်ႈၵျွင်း ၶူဝ်ၼမ်ႉၽၢတ်ႇၼႆၵေႃႈဝႃႈ မီးၼႂ်းၵေႈၵၢင်ဝၢၼ်ႈႁႆးလႄႈ ဝၢၼ်ႈၵျွင်း၊ ၵေႃႇသၢင်ႈပၼ်ၶူဝ်လင်ၼႆႉ ၸိူဝ်း ပဵၼ်ဝၢၼ်ႈ လွႆမျၢတ်ႈ၊ ဝၢၼ်ႈၵျွင်း၊ ဝၢၼ်ႈၸၢတ်ႈ၊ ဝၢၼ်ႈပၢင်ႇၶၢႆးလူင် ၸၵႂႃႇၸိူဝ်းၼႆႉၵေႃႈ ၵႂႃႇမႃးပႆလူမ် လႆႈငၢႆႈ၊ ၼႃႈယၢဝ်းၶူဝ်မီး 17ထတ်း၊ ၼႃႈပွတ်းမီး 14ထတ်း၊ တင်းသုင်မီး 12ထတ်း၊ တင်းၼႃမီး 19ပႅၵ်ႉ၊ သၢင်ႉငိုၼ်းသဵင်ႈယူႇ (165)သႅၼ် လႆႈႁူႉၸွမ်းၼင်ႇ ၼႆ။
