ၶၢဝ်ႇ-SSPP info
June, 3, 2020
ၵူၼ်းသိုၵ်း ၼႂ်းတပ်ႉငဝ်ႈသိုၵ်း(798) SSPP/SSA လႄႈၽၢႆႇဢုပ်ႉပိူင်ႇ ပႃႇတီႇမႂ်ႇသုင်တႆး တပ်ႉသိုၵ်း ၸိုင်ႈတႆး ၸွႆႈထႅမ်ၵူၼ်းမိူင်း ၵွၵ်ႇႁွင်ႈၼမ်ႉ ၸွမ်းၽင်ႇသဵၼ်ႈတၢင်း ၶိုၼ်ႈလွႆၶိူဝ်း ၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ဝၼ်းထီႉ 1.6.2020 ၼၼ်ႉ ၸဝ်ႈသိုၵ်း ႁၢၼ်ၶမ်း ၽူႈၵွၼ်းတပ်ႉၸုမ်း(987) တပ်ႉငဝ်ႈသိုၵ်း(798) ဢွၼ် ႁူဝ် ၽူႈၵွၼ်းတပ်ႉလုၵ်ႈတပ်ႉလႄႈၵူၼ်းသိုၵ်းၽၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈ တႆး ႁႅင်းၵူၼ်း(75)ၵေႃႉသေ ၶုတ်းႁွင်ႈၸွႆႈၵူၼ်းမိူင်း ၸွမ်းသဵၼ်ႈတၢင်းၶိုၼ်ႈလွႆၶိူဝ်း ဢၼ်ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၶိုၼ်းမႄးထုၺ် သိူဝ်ႇသၢႆးပၼ် တႄႇဝၢၼ်ႈၵုင်းမူင်ႈ တေႃႇ ထိုင်ဝၢၼ်ႈမွၼ်းလွႆၶိူဝ်းၼၼ်ႉယူႇယဝ်ႉ။တႄႇၼႂ်းလိူၼ်မၢတ်ႉ ပီႊ2020ၼီႈမႃး ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လႆႈမႄး ထုၺ်ၵေႃႇၵုမ်းသဵၼ်ႈတၢင်းပၼ်ၵူၼ်းမိူင်း လုၵ်ႉၵုင်းမူင်ႈတိၼ်လွႆၶိူဝ်း ၶိုၼ်ႈထိုင်ဝၢၼ်ႈမွၼ်း သိူဝ်ႇပၼ် သၢႆး၊ သဵၼ်ႈတၢင်းသႅင်ၵႅဝ်ႉ တေႃႇထိုင်ပဵင်းၺွင်ႇဝၢၼ်ႈပၢၼ်းတၢင်းၵႆ(10)လၵ်း သိူဝ်ႇပၼ်သၢႆးၸိူဝ်းၼႆႉ ႁဵတ်းၸွမ်းၼင်ႇၵႂၢမ်းလၢတ်ႈ ၸွမ်သိုၵ်းလူင် ၸဝ်ႈပၢင်ႇၾႃႉ ႁူဝ်ပဝ်ႈပႃႇတီႇမႂ်ႇသုင်ၸိုင်ႈတႆး တပ်ႉသိုၵ်း ၸိုင်ႈတႆးဝႃႈ“တႃႇမုၵ်ႉၸုမ်းတေၶိုၼ်ႈယႂ်ႇၼၼ်ႉ ၵူၼ်းမိူင်းတၵ်းလႆႈၶိုၼ်ႈယႂ်ႇ တႃႇၵူၼ်းမိူင်းတေၶိုၼ်ႈ ယႂ်ႇၼၼ်ႉ ပိုၼ်ႉထၢၼ်ပဵၼ် ပၢႆးပိင်ႇၺႃႇ၊ ပၢႆးယူႇလီလႄႈသဵၼ်ႈတႃႈသၢႆတၢင်း”ၼႆလႄႈ ၸင်ႇလႆႈဢွၵ်ႇ ႁႅင်းၵူႈပိူင်ပိူင်သေ ၵေႃႇသၢင်ႈၸွႆႈထႅမ်ၵူၼ်းမိူင်းၼႂ်းပိုၼ်ႉတီႈ ၵႃႈၼင်ႇပွင်ပဵၼ်လႆႈမႃးယူႇယဝ်ႉ။
