May 10, 2020
By – SSPP/SSA
မိူဝ်ႈဝၼ်းထီႉ – (03/05/2020)ၼၼ်ႉ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး လႆႈၸွႆႈထႅမ်ပေႃႈမႄႈ ၵူၼ်းမိူင်း ၸိူဝ်းထူပ်းၽေး လူမ်းလႅင်ႉၽတ်ႉႁိူၼ်းယေးလူႉၵွႆၵႂႃႇ ၼႂ်းတူင်ႇဝဵင်းသီႇပေႃႉ ၼႆယူႇ။
မိူဝ်ႈဝၼ်းထီႉ – 30/04/2020၊ ၶၢဝ်းယၢမ်ဝၢႆးဝၼ်း မွၵ်ႈ(15:00)မူင်းၼၼ်ႉ ယွၼ်ႉၾူၼ်တူၵ်းႁႃယႂ်ႇသေ လူမ်းလႅင်ႉၽတ်ႉႁၢဝ်ႈႁႅင်းလႄႈ လင်ႁိူၼ်းတီႈၼႂ်းဝၢၼ်ႈႁူးမီ(15)လင်၊ ဝၢၼ်ႈၼမ်ႉႁူးၶဵဝ်(1)၊ ႁူမ်ႈ(16)လင် လႆႈလူႉလႅဝ်ၵႂႃႇ ၼႆယူႇ။
မိူဝ်ႈဝၼ်းထီႉ – (03/05/2020)ၼၼ်ႉ ၽူႈၸတ်းၵၢၼ်ၸေႊဝဵင်းမၢႆ(10) ၶုၼ်ႁၢၼ်/ၸၢႆးဝိ တၢင်တူဝ် ပႃႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး(SSPP/SSA)သေ လႆႈၸွႆႈထႅမ်ပေႃႈမႄႈၵူၼ်းမိူင်း ဢၼ်လူမ်း ၽတ်ႉႁိူၼ်းယေးလူႉလႅဝ်ၵႂႃႇ ၼႂ်းဝၢၼ်ႈၼမ်ႉႁူးမီလႄႈ ဝၢၼ်ႈၼမ်ႉႁူးၶဵဝ် ၵႂႃႇသၢင်ႉငိုၼ်း 3,320,000 ၵျၢပ်ႈ(သၢမ်သိပ်းသၢမ်သႅၼ်ပၢႆသွင်မိုၼ်ႇၵျၢပ်ႈတဵမ်တဵမ်)ယူႇယဝ်ႉ။
ၵူၼ်းဝၢၼ်ႈႁူးမီၵေႃႉၼိုင်ႈလၢတ်ႈဝႃႈ “ယွၼ်ႉလူမ်းလႅင်ႉလူင်ၽတ်ႉႁၢဝ်ႈႁႅင်းလႄႈ ၼႂ်းဝၢၼ်ႈႁူးမီၼႆႉ လင်ႁိူၼ်း(15)လင် လႆႈလူႉၵွႆၵႂႃႇ၊ ၼႂ်းဝၼ်းလဵဝ်ၵၼ်ၼင်ႇၵဝ်ႇ တီႈဝၢၼ်ႈၼမ်ႉႁူးၶဵဝ်ၵေႃႈ လႆႈထုၵ်ႇလူမ်းလႅင်ႉလူင်ၽတ်ႉႁၢဝ်ႈႁႅင်းလႄႈ လင်ႁိူၼ်းလႆႈလူႉၵွႆၵႂႃႇၼိုင်ႈလင်။ ႁိူၼ်းယေးလူႉလႅဝ် ၵူၺ်းဢမ်ႇၵႃး ၶူဝ်းၶွင်ႁိူၼ်းယေးၵေႃႈ လႆႈလူႉသုမ်းပႃးတၢင်းၼမ်” ဝႃႈၼႆ။
ၸဝ်ႈၼႃႈတီႈၵေႃႉၼိုင်ႈလၢတ်ႈဝႃႈ “ၼင်ႇႁိုဝ်တေပဵၼ်ၵၢၼ်ၸွႆႈထႅမ် တႃႇပေႃႈမႄႈၵူၼ်းမိူင်း ၸိူဝ်းထူပ်းၽေးသၽႃႇဝလႄႈ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) လႆႈၸွႆႈထႅမ်ၵူၼ်းဝၢၼ်ႈ ၸိူဝ်းဢၼ်လႆႈထူပ်းၽေးလူမ်းလႅင်ႉလူင်ၽတ်ႉၼႆႉယူႇ” ဝႃႈၼႆ။
ၼႂ်းလုၵ်ႈလိူၼ်မေႇၼႆႉၵူၺ်း ပေႃႈမႄႈၵူၼ်းမိူင်းလႆႈထူပ်းၽေးသၽႃႇဝ(လူမ်းလႅင်ႉၽတ်ႉ) ႁဵတ်းႁႂ်ႈ ႁိူၼ်းယေး တီႈယူႇတၼ်းသဝ်း လူႉလႅဝ်ၵႂႃႇလၢႆလၢႆတီႈ။ မိူၼ်ၼင်ႇ ၼႂ်းတူင်ႇဝဵင်းသႅၼ်ဝီ၊ တူင်ႇဝဵင်းၵေးသီး၊ တူင်ႇဝဵင်းမိူင်းယႆ၊ တူင်ႇဝဵင်းသီႇပေႃႉၸိူဝ်းၼႆႉသေ ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆးလႆႈၸွႆႈထႅမ်ၵႂႃႇ ၵူႈတီႈတီႈယဝ်ႉ ဝႃႈၼႆ။
