May 10, 2020
By SSPP/SSA
ဝၼ်းထီႉ – (10/05/2020) ၶၢဝ်းယၢမ်း(08:30)မူင်းၼၼ်ႉ ႁူဝ်သိုၵ်းလူင် သေႃးၸိင်ႇတႃႇ လႆႈတၢင်တူဝ် ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးသေ ၵႂႃႇၸွႆႈထႅမ်ပေႃႈမႄႈၵူၼ်းမိူင်း ၸိူဝ်းၺႃးၽေးလူမ်းလႅင်ႉ ၽတ်ႉႁိူၼ်းယေးလူႉလႅဝ်ၵႂႃႇ ၼႂ်းဝၢၼ်ႈတိုဝ်ႉၸၢင်ႉ၊ ဝၢၼ်ႈႁူးမူၼ်း၊ ဢိူင်ႇပႃႇၵၢင်း၊ ၸေႊဝဵင်းမၢႆ(9) ၼႆယူႇ။
မိူဝ်ႈဝၼ်းထီႉ – (03/05/2020) ၶၢဝ်းယၢမ်း(14 :00)မူင်းၼၼ်ႉ ၾူၼ်လူင်လူမ်းလူင်ၽတ်ႉႁႅင်းသေ ႁဵတ်းႁႂ်ႈ ႁိူၼ်းၵူၼ်းဝၢၼ်ႈတိုဝ်ႉၸၢင်ႉ၊ ဝၢၼ်ႈႁူးမူၼ်း ဢိူင်ႇပႃႇၵၢင်း၊ ၸေႊဝဵင်းမၢႆ(9) လူႉသုမ်းၵႂႃႇ လင်ႁိူၼ်း(6)လင်လႄႈ ယူႇတီႈပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးသေ လႆႈၸွႆႈထႅမ်ပေႃႈမႄႈ ၵူၼ်းမိူင်းဢၼ်ထူပ်းၽေးလူမ်းလႅင်ႉၽတ်ႉႁိူၼ်းယေးလူႉလႅဝ်ၵႂႃႇ သၢင်ႉငိုၼ်း(930,000)ၵျၢပ်ႈ ၵႂႃႇယူႇ။
မိူဝ်ႈဝၼ်းထီႉ – 26/04/2020 ၶၢဝ်းယၢမ်း (15:00)မူင်းၼၼ်ႉ ၵေႃႈ ၾူၼ်လူင်လူမ်းလူင်ၽတ်ႉသႂ်ႇႁိူၼ်း ၵူၼ်းဝၢၼ်ႈၼမ်ႉမေႃႇသၢႆး၊ ဢိူင်ႇမိူင်းၼၢင်း ၸေႊဝဵင်းၵေးသီးမိူၼ်ၵၼ်။ ယွၼ်ႉလူမ်းႁႅင်းၼႃႇသေ ႁဵတ်းႁႂ်ႈ ႁိူၼ်းၵူၼ်းဝၢၼ်ႈၵမ်ႈၽွင်ႈလႆႈလူႉလႅဝ်ၵႂႃႇလင်ႁိူၼ်း(7)လင်လႄႈ မိူဝ်ႈဝၼ်းထီႉ – (01/05/2020)ၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး လႆႈၸွႆႈထႅမ်ၵႂႃႇသၢင်ႉငိုၼ်း(1,000,000)ၵျၢပ်ႈ ၼႆယူႇ။
ၵၢၼ်ၸွႆႈထႅမ်လွင်ႈယၢပ်ႇၽိုတ်ႇပေႃႈမႄႈၵူၼ်းမိူင်းလႄႈ ၵၢၼ်ပူၵ်းပွင်ပၼ်ပေႃႈမႄႈၵူၼ်းမိူင်းၼႆႉ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး တမ်းဝၢင်းၽႅၼ်ၵၢၼ်သေ ၸွႆႈထႅမ်မႃးၵူႈပီႊပီႊသေဢမ်ႇၵႃး တႃႇဝၼ်းၶၢဝ်းမိူဝ်းၼႃႈၵေႃႈ တေသိုပ်ႇႁဵတ်းသၢင်ႈၵႂႃႇ ဢမ်ႇသုတ်ႉဢမ်ႇႁူၼ် ဢမ်ႇထၢတ်ႇဢမ်ႇဝၢႆးၼႆယူႇ။
