May 27, 2020
By – SSPP/SSA
ၼႂ်းလိူၼ်ဢေႇပီႇ 14 ဝၼ်း တေႃႇထိုင် လိူၼ်မေႇ 17ဝၼ်း ပီႊ2020ၼီႊၼၼ်ႉ ငဝ်ႈငုၼ်းပႃႇတီႇမႂ်ႇသုင် ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/SSA) လႆႈၵေႃႇသၢင်ႈၽၢႆႁိၼ် ဢိၵ်ႇတင်းၵူင်းၸၢၵ်ႈတိုတ်ႉၼမ်ႉ ပၼ်ပေႃႈမႄႈၵူၼ်းမိူင်း ၼႂ်းပိုၼ်ႉတီႈဝၢၼ်ႈလွႆယွင်းလႄႈ ဝၢၼ်ႈၼွင်ႁီႈ၊ ဢိူင်ႇၼွင်ဢႅပ်း၊ ၸေႊဝဵင်းမၢႆ(3)၊ ၸေႊတွၼ်ႈမၢႆ(1)၊ တူင်ႇဝဵင်းမိူင်းသူႈၵႂႃႇယူႇ။
တီႈၵၢၼ်ၵေႃႇသၢင်ႈၽၢႆႁိၼ်လႄႈ ၵူင်းၸၢၵ်ႈတိုတ်ႉၼမ်ႉၼၼ်ႉ ၵေႃႉသိုၵ်းၵေႃႉႁၢၼ်(SSPP/SSA)လႄႈ ပေႃႈမႄႈၵူၼ်းမိူင်းၼႂ်းပိုၼ်ႉတီႈ ဢိၵ်ႇတင်းမေႃမိုဝ်း လႆႈႁူမ်ႈႁႅင်းၵူၼ်းမွၵ်ႈ(732)ၵေႃႉသေ ၵေႃႇသၢင်ႈမႃး ၶၢဝ်းတၢင်း(39)ဝၼ်းတဵမ်တဵမ်ယူႇ။
လႆႈၸႂ်ႉတိုဝ်းမၢၵ်ႇဢုတ်ႇမွၵ်ႈ(1000)လုၵ်ႈ၊ လိၼ်ယၢင်(350)ထူင်၊ လွတ်ႇၼမ်ႉသႅၼ်းၸုင်ႇ(818)လႅမ်ႈ၊ တူဝ်ငိုၼ်း(250)သႅၼ်ပျႃးသေ ၵေႃႇသၢင်ႈပဵၼ်မႃးၽၢႆႁိၼ်(1)ႁၢၼ်ႉလႄႈ ၵူင်းၸၢၵ်ႈတိုတ်ႉၼမ်ႉ(2)လင် ယူႇ။
ဝၢၼ်ႈလွႆယွင်း မီးလင်ႁိူၼ်းၵူၼ်းမွၵ်ႈ(32)လင်၊ ဝၢၼ်ႈၼွင်ႁီႈ မီးလင်ႁိူၼ်းၵူၼ်းမွၵ်ႈ(38)လင်သေ မိူဝ်ႈပူၼ်ႉမႃးပေႃႈမႄႈၵူၼ်းမိူင်းၼႂ်းပိုၼ်ႉတီႈ လႆႈထူပ်းတၢင်းယၢပ်ႇၽိုတ်ႇ လွင်ႈၼမ်ႉဢမ်ႇၵုမ်ႇထူၼ်ႈ တႃႇၸႂ်ႉတိုဝ်းလႄႈ တႃႇၽုၵ်ႇသွမ်ႈၼႆယူႇ။ၼႂ်းလိူၼ်ၸၼ်ႇၼဝႃႇရီႇ တေႃႇထိုင်လိူၼ်မေႇပီႊ2020ၼီႊၼႆႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/SSA) လႆႈၵေႃႇသၢင်ႈၽၢႆႁိၼ်လႄႈ ၵူင်းၸၢၵ်ႈတိုတ်ႉၼမ်ႉပၼ်ပေႃႈမႄႈ ၵူၼ်းမိူင်း ၼႂ်းဢိူင်ႇၼႃးၶႃႇ၊ ၸေႊဝဵင်းမၢႆ(7)လႄႈ ၼႂ်းဢိူင်ႇၼွင်ဢႅပ်း၊ ၸေႊဝဵင်းမၢႆ(3) ၸေႊတွၼ်ႈမၢႆ(1) မႃးယူႇ။
