ၶၢဝ်ႇ – sspp info
April 9, 2020
ၵူၼ်းဝၢၼ်ႈထုၵ်ႇၺႃးယိုဝ်းတၢႆထင်တီႈ(5)ၵေႃႉ ၼႂ်းပၢင်ၵၢတ်ႇၵိၼ်ယႃႈမဝ်းၵမ်ႁိမ်းဝၢၼ်ႈၵုင်းမူင်ႈ ၼႂ်းတူင်ႇဝဵင်းသီႇပေႃႉ ဢမ်ႇႁူႉၵူၼ်းယိုဝ်း။
မိူဝ်ႈဝၼ်းထီႉ – 08/04/2020 ၶၢဝ်းယၢမ်းၵၢင်ၶမ်ႈမွၵ်ႈ(10:00)မူင်းၼၼ်ႉ ၵူၼ်းဝၢၼ်ႈ(5)ၵေႃႉ ၺႃးယိုဝ်းတၢႆ တီႈႁိူၼ်းလင်ၼိုင်ႈ ဢၼ်မီးၸဵင်ႇၸၢၼ်းဝၼ်းတူၵ်း ဝၢၼ်ႈၵုင်ႈမူင်ႈ ယၢၼ်ၵႆဝၢၼ်ႈမွၵ်ႈ (1)လၵ်းပၢႆ မီးၵူၼ်းဢမ်ႇလႆႈႁူႉပိုၼ်းတူဝ်၊ တီႈယူႇ ၵူၼ်းၸၢႆး ဢႃႇယူႉ(40)ပၢႆ (2)ၵေႃႉ၊ လုၵ်ႈဢွၼ်ႇၸၢႆး ဢႃႇယူႉ 12 ၶူပ်ႇ (1)ၵေႃႉလႄႈ ၵူၼ်းယိင်းသႅၼ်းဢႃႇယူႉ 40 ပၢႆ (2) ၵေႃႉ ထုၵ်ႇၺႃးယိုဝ်းတၢႆထင်တီႈၼႆယူႇ။
ဝၼ်းထီႉ – 09/04/2020 ယၢမ်းၵၢင်ၼႂ် (09:00) မူင်းၼၼ်ႉ ၸဝ်ႈၼႃႈတီႈပလိၵ်ႈ ဝဵင်းသီႇပေႃႉလႄႈ ၸုမ်းပရႁိတဢမ်ႇၶႅၼ်ႈလႅၼ် ဝဵင်းသီႇပေႃႉ(နယ်စည်းမခြား ပရဟိတ သီပေါ) ၶဝ်မႃးဢဝ်တူဝ်တၢႆ ၵူၼ်းဝၢၼ်ႈၸိူဝ်းထုၵ်ႇၺႃးယိုဝ်းၼၼ်ႉ သူင်ႇၵူတ်ႇထတ်းတူၺ်း တီႈႁူင်းယႃႇလူင်ဝဵင်းသီႇပေႃႉ ဝႃႈၼႆ။
မိူဝ်ႈပူၼ်ႉမႃးၼႂ်းႁၢင်ပီႊ 2019 လိူၼ်တီႇၸိမ်ႇပႃႇၼၼ်ႉၵေႃႈ ၵူၼ်းၸၢႆး(3)ၵေႃႉထုၵ်ႇယိုဝ်းတၢႆ၊ ၼႂ်းလုၵ်ႈလိူၼ်ၸၼ်ႇၼဝႃႇရီႇၼၼ်ႉၵေႃႉ မီးၵူၼ်းၸၢႆး(2)ၵေႃႉထုၵ်ႇယိုဝ်းတၢႆ၊ ၼႂ်းလိူၼ်ၾႅပ်ႇၾဝႃႇရီႇ ၵေႃႈၼင်ႇၼၼ် ၵူၼ်းၸၢႆးထႅင်ႈ(2)ၵေႃႉထုၵ်ႇယိုဝ်းတၢႆ။
လွင်ႈထုၵ်ႇၺႃးယိုဝ်းတၢႆႁိမ်းၸေႊဝဵင်းသီႇပေႃႉၼႆႉ မီးမႃး(4)ပွၵ်ႈ ပႃးပွၵ်ႈၼႆႉ။ ပၼ်ႁႃတင်း(4)ပွၵ်ႈ ဢမ်ႇတီႉၺွပ်းလႆႈၵူၼ်းႁၢႆႉမႃးယိုဝ်းဝႃႈၼႆ။ႁိမ်းဝၢၼ်ႈၵုင်းမူင်ႈ တီႈဢၼ်ပဵၼ်ပၼ်ႁႃလွင်ႈၶႃႈႁႅမ်ၵူၼ်းတၢႆၼႆႉ ပဵၼ်တီႈၵူၼ်းသူႇသမ်းၵိၼ်ၶၢႆ ယႃႈမဝ်းၵမ် ယူႇသဝ်းတႃႇသေႇ။ ၵူၼ်းမိူင်းဢမ်ႇသူႈလႃႈလီႁတ်းၵႂႃႇမႃး။ တီႈပၢင်သူႇသမ်းၵိၼ်ၶၢႆယႃႈ မဝ်းၵမ် ႁိမ်းၵုင်းမူင်ႈၼႆႉ တိတ်းၸပ်းတၢင်းၵႃးလူင် သီႇပေႃႉ-လႃႈသဵဝ်ႈလႄႈ ယၢမ်ႈမီးလွင်ႈယိုဝ်းၵၼ် တၢႆၸိူင်ႉၼႆမႃး လၢႆလၢႆပွၵ်ႈယဝ်ႉ ပၢင်သူႇသမ်းၵိၼ်ၶၢႆယႃႈမဝ်းၵမ် ႁိမ်းဝၢၼ်ႈၵုင်းမူင်ႈၼႆႉ လႆႈယၢႆႈႁၢႆၵႂႃႇၸူဝ်ႈၵႅပ်ႉသေ ၶိုၼ်းၶၢႆႉပၢင်ယႃႈမဝ်းၵမ်ၶဝ် ၶဝ်ႈၵႂႃႇၽၢႆႇၼႂ်းယၢၼ်ၵႆသဵၼ်ႈတၢင်း မွၵ်ႈ (1)လၵ်း တီႈဢၼ်ပဵၼ်ပၼ်ႁႃယိုဝ်းၵၼ်တၢႆပွၵ်ႈၼႆႉယူႇယဝ်ႉ။
