ၶၢဝ်ႇ-SSPP info
2020 April, 13
ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး(SSPP/SSA) ၸွႆႈထႅမ်ၶိူင်ႈၵိၼ်ယႅမ်ႉ ပေႃႈမႄႈၵူၼ်းမိူင်း ဝၢၼ်ႈၼမ်ႉလိၼ်းသႂ် လင်ႁိူၼ်း(42)လင်၊ ဝၢၼ်ႈမၢၵ်ႇႁိၼ်မႅဝ်း လင်ႁိူၼ်း(19)လင်၊ ဝၢၼ်ႈမႂ်ႇ လင်ႁိူၼ်း (16)လင် ၼႂ်းၸုမ်း(1) ဢိူင်ႇဝၢၼ်ႈႁႆး တူင်ႇဝဵင်းၵေးသီး ၸိုင်ႈတႆးပွတ်းၸၢၼ်း။
ဝၼ်းထီႉ 13.4.2020 ယၢမ်း(9)မူင်းတေႃႇယၢမ်း(11)မူင်းၼၼ်ႉ ၸဝ်ႈသိုၵ်းလူင် သိူဝ်ပိူင်ႇၾႃႉ ဢွၼ်ႁူဝ် ၵေႃႇမတီႇဝၢၼ်ႈမူၼ်းၵူၼ်းၵိုၼ်းသေ တၢင်တူဝ်ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၸွႆႈထႅမ်ၶဝ်ႈၼမ်ႉတၢင်းၵိၼ် တႃႇ(77)လင်ႁိူၼ်း၊ ၼိုင်ႈႁိူၼ်းလႂ် ၸွႆႈထႅမ်ၶဝ်ႈသၢၼ်(1)ၶႂၢႆး၊ ၼမ်ႉမၼ်း (1)တဝ်ႈ၊ ထူဝ်ႇလိူင်(1)ၸွႆႉ၊ ၽၵ်းမီႇလႅင်(1)ၸွႆႉ၊ ၵိူဝ်(1)ထူင်ယူႇယဝ်ႉ။
လိူဝ်သေၼၼ်ႉလႆႈၵႂႃႇလူႇတၢၼ်း တီႈၵျွင်းမုၼ်ၸဝ်ႈ ဝၢၼ်ႈၼမ်ႉလိၼ်သႂ်၊ ၵျွင်းမုၼ်ၸဝ်ႈ ၼွင်ၵူပ်း၊ ၵျွင်းမုၼ်ၸဝ်ႈ မၢၵ်ႇႁိၼ်မႅဝ်း ၼိုင်ႈၵျွင်းလႂ် ၶဝ်ႈသၢၼ်(6)ၶႂၢႆး၊ ထူဝ်ႇလိူင်(6)ၸွႆႉ၊ ၼမ်ႉမၼ်း(6)တဝ်ႈ လႄႈ ၼိုင်ႈၵျွင်းလႂ်လူႇတၢၼ်းငိုၼ်း 100000 ပျႃးယူႇယဝ်ႉ။
ၽူႈမီးပုၼ်ႈၽွၼ်းၸဝ်ႈၼိုင်ႈလၢတ်ႈဝႃႈ“လွင်ႈလႆႈၸွႆႈထႅမ်ပေႃႈမႄႈၵူၼ်းမိူင်းၼႆႉ ဢိင်ၼိူဝ်ငဝ်းလၢႆး ၵၢပ်ႈတၢင်းပဵၼ်ၵႃႇလ (ၶူဝ်ႊဝိတ်ႉ-19)ၼႆႉသေ ၵူၼ်းမိူင်းၸိူဝ်းႁဵတ်းၵိၼ်ၵၢၼ် ဝၼ်းလႂ်ဝၼ်းၼၼ်ႉၼႆႉ မီးတၢင်းယၢပ်ႇတႃႇၵိၼ်ယႅမ်ႉလႄႈလႆႈၸွႆႈထႅမ်၊ ၵွပ်ႈၵူႈတီႈၵူႈတၢင်း ႁၢမ်ႈလွင်ႈၸူႉတုမ်ၶွၼ်ႈၵၼ် ႁၢမ်ႈ လွင်ႈၶဝ်ႈဢွၵ်ႇၵၼ်လႄႈ တႃႇၵႂႃႇႁႃႁဵတ်းၵၢၼ်ၵေႃႈမီးတၢင်းယၢပ်ႇ၊ ၸိူဝ်းဝၢၼ်ႈဢၼ်မီးတၢင်းယၢပ်ႇ လွင်ႈၵိၼ်ယႅမ်ႉ ဢၼ်မိူၼ်ဝၢၼ်ႈၸိူဝ်းၼႆႉ တေသိုပ်ႇၸွႆႈထႅမ်ၵႂႃႇၵေႃႈ ၵိုတ်းလၢႆဝၢၼ်ႈယူႇ” ဝႃႈၼႆ။လွင်ႈၸွႆႈထႅမ်ပေႃႈမႄႈၵူၼ်းမိူင်းၼႆႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဝႆႉပဵၼ်ပိူင် လူင်သေ ႁဵတ်းသၢင်ႈမႃးတႃႇသေႇသေဢမ်ႇၵႃး ဢၼ်ပဵၼ်ႁူဝ်ပဝ်ႈလူင် SSPP/SSA ၸွမ်သိုၵ်းလူင် ၸဝ်ႈပၢင်ႇၾႃႉၵေႃႈ သင်ႇလၢတ်ႈဝႃႈ“တႃႇမုၵ်ႉၸုမ်းတေၶိုၼ်ႈယႂ်ႇၼၼ်ႉ ၵူၼ်းမိူင်းႁဝ်းတေလႆႈၶိုၼ်ႈ ယႂ်ႇၵွၼ်ႇ၊ တႃႇၵူၼ်းမိူင်းတေၶိုၼ်ႈယႂ်ႇၼၼ်ႉ တေလႆႈၵေႃႇသၢင်ႈပၼ်ပိုၼ်ႉထၢၼ်လူင်(3)ပိူင်၊ ပၢႆးပိင်ႇ ၺႃႇ၊ ပၢႆးယူႇလီလႄႈသဵၼ်ႈတႃႈသၢႆတၢင်းၸိူဝ်းၼႆႉ”ၼႆယူႇယဝ်ႉ။
