April, 27 ဝၼ်း

By SSPP/SSA

ၵၢၼ်ပူၵ်းပွင်လႄႈ ၵၢၼ်ၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးၼႆႉ ၶဝ်ႈပႃးဝႆႉ ပၢႆးပိင်ႇၺႃႇ၊ ပၢႆးယူႇလီ၊ ၵၢၼ်သႃႇသၼႃႇ၊ သဵၼ်ႈတႃႈသၢႆတၢင်း၊ ၽၢႆ၊ ယွင်ၼမ်ႉလႄႈ ၾႆးၾႃႉ ၸိူဝ်းၼႆႉယူႇ။

ဝၼ်းထီႉ- 23/04/2020 တေႃႇထိုင် ဝၼ်းထီႉ- 25/04/2020 ၼၼ်ႉ ၸဝ်ႈသိုၵ်းလူင်/ၸၢႆးသႅင် ၽူႈၵွၼ်းပၢႆးမိူင်းတပ်ႉငဝ်ႈသိုၵ်း798 ဢွၼ်ႁူဝ်ၵူၼ်းသိုၵ်းလႄႈၵူၼ်းမိူင်း ၵေႃႇသၢင်ႈၽၢႆ တႃႇလဵင်ႉ ၼႂ်းဝၢၼ်ႈၵွင်းမွၼ်း၊ ဝၢၼ်ႈပၢင်ႇၶၢႆးလူင်၊ ဢိူင်ႇၶွၵ်ႈၸၢင်ႉ၊ ၸေႊဝဵင်းၵေႇသီႇ။

ၵူၼ်းဝၢၼ်ႈပၢင်ႇၶၢႆးလူင်ၵေႃႉၼိုင်ႈလၢတ်ႈဝႃႈ “ႁဝ်းၶႃႈၶႂ်ႈႁဵတ်းၽၢႆဢၼ်ၼႆႉ ႁိုင်ၼႃႇယဝ်ႉ၊ ႁဝ်းၶႃႈမီး တၢင်းယၢပ်ႇၽိုတ်ႇ လွင်ႈငိုၼ်းတွင်း/ငိုၼ်းၵွင်ၵၢင် တႃႇတေသိုဝ်ႉမၢၵ်ႇႁိၼ်၊ သၢႆး၊ လိၼ်ယၢင်၊  ၶိူင်ႈၸႂ်ႉၶိူင်ႈတိုဝ်းၸိူဝ်းၼႆႉလႄႈ ဢမ်ႇၸၢင်ႈႁဵတ်းပဵၼ်သေပွၵ်ႈ။ ငိၼ်းၸူမ်းၶွပ်ႈၸႂ်ထိုင် ၸဝ်ႈသိုၵ်းလူင်/ ၸၢႆးသႅင် ၽူႈၵွၼ်းပၢႆးမိူင်း တပ်ႉငဝ်ႈသိုၵ်း798ႁဝ်းၶႃႈ ဢၼ်မႃးဢွၼ်ႁူဝ်သေ ၵေႃႇသၢင်ႈပၼ်ၽၢႆၼမ်ႉ တႃႇလဵင်ႉလုၵ်ႈဝၢၼ်ႈၵူၼ်း သူၼ်ႁဝ်းၶႃႈ တေႉတေႉဝႃႈဝႃႈယူႇၶႃႈ”ဝႃႈၼႆ။

ၽူႈမီးပုၼ်ႈၽွၼ်းၸဝ်ႈၼိုင်ႈလၢတ်ႈဝႃႈ “ႁဝ်းၶႃႈဢွၼ်ၵၼ်ၵေႃႇသၢင်ႈၽၢႆဢၼ်ၼႆႉ တႄႇဝၼ်းထီႉ – 23/04/2020 တေႃႇထိုင် ဝၼ်းထီႉ-25/04/2020 ၼႆႉ လႆႈယဝ်ႉတူဝ်ႈလီငၢမ်းယဝ်ႉ။ ၼိုင်ႈဝၼ်းႁႅင်းၵူၼ်း ၵေႃႇသၢင်ႈၽၢႆဢၼ်ၼႆႉ ၵူၼ်းသိုၵ်းၵူၼ်းမိူင်း ႁူမ်ႈၵၼ်မီးယူႇ(60)ပၢႆ” ဝႃႈၼႆ။

မၼ်းၸဝ်ႈၶိုၼ်းသိုပ်ႇလၢတ်ႈထႅင်ႈဝႃႈ “ၵၢၼ်ၵေႃႇသၢင်ႈၽၢႆဢၼ်ၼႆႉ ယိူင်းဢၢၼ်းႁႂ်ႈပဵၼ်တႃႇ ၵူၼ်းဝၢၼ်ႈ ၵူၼ်းမိူင်း တေဢမ်ႇထူပ်းတၢင်းယၢပ်ႇၽိုတ်ႇလွင်ႈၼမ်ႉႁႅင်ႈ၊ ၼင်ႇႁိုဝ်ၼမ်ႉတေဢမ်ႇႁႅင်ႈၼႆႉ ႁဝ်းၶႃႈ လႆႈၽုၵ်ႇတူၼ်ႈမႆႉ တူၼ်ႈမၢၵ်ႇႁိမ်းႁွမ်းၽၢႆဝႆႉ  မိူၼ်ၼင်ႇ ၵူၺ်ႈ(80)တူၼ်ႈလႄႈ မႆႉၶႆႉ၊ မႆႉတွင်း၊ မႆႉလိူဝ်ႇၸိူဝ်းၼႆႉ (200) တူၼ်ႈပၢႆ။ ၽၢႆၼမ်ႉဢၼ်ၼႆႉ တႃႇလဵင်ႉၼႂ်းဝၢၼ်ႈၵွင်းမွၼ်းလႄႈ ဝၢၼ်ႈပၢင်ႇ ၶၢႆးလူင်”ဝႃႈၼႆ။

တႃႇၵေႃႇသၢင်ႈၽၢႆဢၼ်ၼႆႉ လႆႈၸႂ်ႉတိုဝ်း- မၢၵ်ႇဢုတ်ႇ(1000)လုၵ်ႈ၊ သၢႆးၼမ်ႉ(5)လမ်း၊ လိၼ်ယၢင် (100)ထူင်၊ မၢၵ်ႇႁိၼ်(5)လမ်း၊ မႆႉလၵ်းႁူဝ်ႉ တႃႇလွမ်ႉႁူဝ်ႉၽၢႆ(40)လႅမ်ႈ၊ ၸိူၵ်ႈလဵၵ်းတႃႇလွမ်ႉႁူဝ်ႉ (10)ၵဵၼ်လႄႈ ၸရိၵ်ႈၵိၼ်ယႅမ်ႉ ၸိူဝ်းၼႆႉ တူၵ်းမႅၼ်ႈသၢင်ႉငိုၼ်း(3,340,000)ၵျၢပ်ႈ ၼႆယူႇ။

ၵၢၼ်ၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇၼႆႉ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး လႆႈတမ်းဝၢင်း ၽႅၼ်ၵၢၼ်သေ ႁဵတ်းသၢင်ႈမႃးယူႇၵူႈပီႊပီႊ။ တႃႇၼႂ်းပီႊ2020ၼီႊၼႆႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/SSA) လႆႈယၼ်ႇဝႆႉငိုၼ်းၵွင်ၵၢင် တႃႇၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇ (10,000)သႅၼ်ၵျၢပ်ႈလႄႈ တႃႇပူၵ်းပွင်းၽဝၵူၼ်းမိူင်းၶိုၼ်ႈယႂ်ႇမႂ်ႇသုင်(5,000)သႅၼ်ၵျၢပ်ႈ ၼႆယူႇ။