ၶၢဝ်ႇ-SSPP info
April 30, 2020
တပ်ႉငဝ်ႈသိုၵ်း(918) SSPP/SSA ဢၼ်ဢဝ်ပုၼ်ႈၽွၼ်းၼႃႈတီႈ ၵုၼ်ပၢင်ၵုၼ်ၶူင်းၼၼ်ႉ လႆႈဢဝ် လိူင်ႈၵၢၼ် ၵူၼ်းႁဵတ်းလူၼ်ႉလိူဝ်ပူၼ်ႉပႅၼ်လၵ်းမၢႆပႃႇထိူၼ်ႇသေ လႆႈတႅပ်းတတ်းပၼ်တၢမ်ႇၶွၵ်ႈၵႂႃႇ ယူႇယဝ်ႉ။
ဝၼ်းထီႉ 14.4.2020 ၼၼ်ႉ ၸဝ်ႈသိုၵ်းလူင် ၸေႃးမိူင်း ၽူႈၵွၼ်းတပ်ႉငဝ်ႈသိုၵ်း(918) SSPP/SSA ဢွၼ်ႁူဝ် ၵေႃႇမတီႇတႅမ်းတတ်းဢမူႉတြႃး (17)ၵေႃႉသေ တႅပ်းတတ်းပၼ်တၢမ်ႇတူၵ်းၶွၵ်ႈ ၸိူဝ်းၵူၼ်း ပူၼ်ႉပႅၼ်လၵ်းမၢႆပႃႇထိူၼ်ႇသေ ၸုတ်ႇထိူၼ်ႇၸုတ်ႇပႃႇ တႄႇၼႂ်းပၢတ်ႈ(3)လိူၼ်တေႃႇပၢတ်ႈ(4)လိူၼ် ၼၼ်ႉ မီးတြႃးၶၢမ်ႇ(36)ၵေႃႉ၊ တႃႇၵူၼ်း(29)ၵေႃႉၼၼ်ႉ တင်ႈၸႂ်ၸုတ်ႇလႄႈလႆႈတႅပ်းတတ်းပၼ် တၢမ်ႇၶွၵ်ႈ(6)လိူၼ်၊ တႃႇ(6)ၵေႃႉတႄႉ ၵွပ်ႈလၵ်ႉသူႇယႃႈသေ ဢဝ်ၾႆးလၢမ်းမႆႈပႃႇထိူၼ်ႇၵႂႃႇလႄႈ လႆႈပၼ်တၢမ်ႇၶွၵ်ႈ(1)ပီ၊ ဢၼ်လႆႈၸုတ်ႇႁႆႊသေ လၢမ်းမႆႈပႃႇထိူၼ်ႇၼၼ်ႉ လႆႈပၼ်တၢမ်ႇၶွၵ်ႈ(3)လိူၼ် ၵႂႃႇယူႇယဝ်ႉ။ၵၢၼ်ထိင်းသိမ်းထိူၼ်ႇၶိူဝ်းပႃႇမႆႉၼႆႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လႆႈ ဢွၵ်ႇလိၵ်ႈပိုၼ်ၽၢဝ်ႇထိုင်ပေႃႈမႄႈၵူၼ်းမိူင်း ဢိၵ်ႇၵေႃႉသိုၵ်းၵေႃႉႁၢၼ် ႁႂ်ႈဢွၼ်ၵၼ်ထိင်းသိမ်းထိူၼ်ႇ ပႃႇမႆႉ၊ ႁႂ်ႈဢွၼ်ႁဵတ်းၸွမ်းမူႇပိူင်မီးၼၼ်ႉ ပေႃးထိုင်ၶၢဝ်းႁႅင်ႈၶၢဝ်းႁွင်မႃးၼၼ်ႉ လႆႈပိုၼ်ၽၢဝ်ႇမႃးၵူႈပီႊ သေ ၶၢဝ်းတၢင်းၼႃႈၼၼ်ႉ တေလိူဝ်တိူဝ်းပၼ်တၢမ်ႇၵူၼ်းၸုတ်ႇပႃႇထိူၼ်ႇၵႂႃႇၼႆယူႇယဝ်ႉ။
