April 20,2020
By – SSPP/ SSA
ၼႂ်းႁူဝ်ပီႊ 2020 ၼီႊၼႆႉ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) လႆႈၶတ်းၸႂ် ၶိုၼ်ႈၵေး ၵၢၼ်ၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇ ၼႂ်းၼႃႈတီႈဢုပ်ႉပိူင်ႇမႃး ႁၢဝ်ႉႁၢဝ်ႉႁႅင်းႁႅင်း ဢမ်ႇ ထၢတ်ႇဢမ်ႇဝၢႆးသေ ပဵၼ်ဢၼ်ဢွင်ႇမၢၼ် ယဝ်ႉတူဝ်ႈလီငၢမ်းမႃးပဵၼ်ၶၵ်ႉပဵၼ်ငၵ်ႉယူႇ။
ၼႂ်းလိူၼ်ဢေႇပီႇ 1 ဝၼ်း ပီႊ 2020 ၼီႊၼၼ်ႉၵေႃႈ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး(SSPP/ SSA) လႆႈၸွႆႈထႅမ်တေႇႁႅၵ်ႈပူၵ်းသဝ်မင်ႇၵလႃႇၵျွင်းမုၼ်ၸဝ်ႈ တီႈဝၢၼ်ႈမႅၵ်ႉမႄး လႄႈ ဝၢၼ်ႈပၢင်ပႅၼ်ႈသေ ပူၵ်းပွင်ၵၢၼ်သႃႇသၼႃႇ ၼႂ်းဢိူင်ႇၼမ်ႉလပ်ႉ ၸေႈဝဵင်းမၢႆ(7) ၸေႈတွၼ်ႈ မၢႆ(1) တူင်ႇဝဵင်းတၢင်ႉယၢၼ်းမႃးယူႇ။
တီႈၵၢၼ်ၵေႃႇသၢင်ႈၵျွင်းမုၼ်ၸဝ်ႈ ဝၢၼ်ႈမႅၵ်ႉမႄးၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး(SSPP/ SSA) လႆႈၸွႆႈထႅမ် လဵၵ်းမုင်းသႅၵ်ႉမဵဝ်းၸုင်ႇ(431)ၶႅပ်း၊ ၽၵ်းတူႁူးလႅင်းလႄႈ ၽၵ်းတူလူင်(17) ၶႅပ်း၊ ၵႃႈမိုဝ်း(200)သႅၼ်ပျႃးလီငၢမ်းသေ တီႈၵၢၼ်ၵေႃႇသၢင်ႈၵျွင်းမုၼ်ၸဝ်ႈ ဝၢၼ်ႈ ပၢင်ပႅၼ်ႈၼၼ်ႉၵေႃႈ လႆႈၵမ်ႉၸွႆႈငိုၼ်းမေႃမိုဝ်း(250)သႅၼ်ပျႃးယူႇ။
ၸွမ်းၼင်ႇငဝ်းလၢႆး ရႃႇသီႇၾႃႉၽူၼ် ၽၢၼ်ႇပွင်ပဵၼ်မီးမႃးၼၼ်ႉသေ ၵၢၼ်ၵေႃႇသၢင်ႈတွၼ်ႈလိၼ် ၶိုၼ်ႈယႂ်ႇ ၼႂ်းၼႃႈတီႈဢုပ်ႉပိူင်ႇပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) မၢင်တီႈမၢင် တွၼ်ႈၼၼ်ႉၵေႃႈ တေယင်ႉလိုဝ်ႈၵိုတ်းယိုတ်းၵႂႃႇပဵၼ်ပွတ်းပဵၼ်ယူႇ။
ၵၢၼ်ၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) တေၵိုတ်းယိုတ်းၵႂႃႇၸူဝ်ႈၶၢဝ်းၼႆသေတႃႉ ၵၢၼ်ၸွႆႈထႅမ်ပူၵ်းပွင်ၽဝၵၢၼ်ယူႇသဝ်းၵိၼ်သၢင်ႈပေႃႈမႄႈ ၵူၼ်းမိူင်း ႁႂ်ႈၶိုၼ်ႈယႂ်ႇမႂ်ႇသုင်ၼၼ်ႉတႄႉ တေသိုပ်ႇၶၢဝ်းတၢင်းၵႂႃႇထႅင်ႈယူႇ။
