April 1, 2020
SSPP info
လိူၼ် March 30 ဝၼ်း၊ ပီႊ 2020 ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး လႆႈဢၢပ်ႈ ပၼ်ႁူင်းႁဵၼ်းသွၼ်လိၵ်ႈ တီႈၵူၼ်းမိူင်း ဝၢၼ်ႈၵွင်းမွၼ်း၊ ဢိူင်ႇၶွၵ်ႇၸၢင်ႉ ၸေႈဝဵင်းၵေးသီး ၵူၼ်းမိူင်း ၶိုၼ်ႈ ႁွတ်ႈႁိမ်းၸမ်(100)ၵေႃႉ။
ပၢင်ၵႅဝ်ႈဢၢပ်ႈႁူင်းႁဵၼ်းၼႆႉ လႆႈၸတ်းႁဵတ်းယၢမ်း(10:00)မူင်း ထိုင်(11:00)မူင်း တီႈႁူင်းႁဵၼ်းမႂ်ႇ ဝၢၼ်ႈၵွင်းမွၼ်း၊ တီႈပၢင်ၵႅဝ်ႈၼၼ်ႉ ၽူႈၸတ်းၵၢၼ်ၸေႈတွၼ်ႈ ၸဝ်ႈႁၢၼ် သၢင်ႇၶွင်ႇ၊ ၽူႈၸတ်းၵၢၼ် ၸေႈဝဵင်းမၢႆ(4) ၸဝ်ႈၼေႃႇၶိူဝ်းၶဝ် တၢင်တူဝ် ၽူႈယႂ်ႇၵူၼ်းလူင် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆးတႆး၊ တပ်ႉ သိုၵ်းၸိုင်ႈတႆးသေ ၶိုၼ်ႈႁွတ်ႈပၼ်ႁႅင်း ဢၢပ်ႈပၼ်ၼႂ်းမိုဝ်းမိူင်း။
ႁူင်းႁဵၼ်းမႂ်ႇဝၢၼ်ႈၵွင်းမွၼ်းၼႆႉ လႆႈတႄႇႁဵတ်းသၢင်ႈမႃး မိူဝ်ႈ(11.03.2020)သေ ယဝ်ႉတူဝ်ႈၵႂႃႇ ဝၼ်းထီႉ(30.03.2020)၊ ၼႃႈယၢဝ်းမီး(54)ထတ်း ၊ ၸႅၵ်ႇဝႆႉ(6)ႁွင်ႈ၊ ၼႃးပွတ်း(25)ထတ်း၊ သုင်(14)ထတ်း၊ မုင်းလဵၵ်းၵင်ႈဢုတ်ႇ၊ ဝၢၼ်ႈၵွင်းမွၼ်းၼႆႉ ႁူဝ်ၵူၼ်းၵမ်ႉပႃႈၼမ် ပဵၼ်ၸၢဝ်းၶိူဝ်းယၢင်းလမ် ယူႇသဝ်းၵိၼ် သၢင်ႈ၊ မီးတၢင်းတူၵ်း ငဝ်ႈငုၼ်း ဝၢၼ်ႈႁႆးယၢၼ်ႈၵႆမွၵ်ႈ(7)လၵ်း။
ၵဵဝ်ႇၵပ်းၵၢၼ်ၵေႃႇသၢင်ႈတွၼ်ႈလိၼ်ႁုၼ်ႈမုၼ်းၶိုၼ်ႈယႂ်ႇသေ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး ဝႆႉၵၢၼ်ၵေႃႇသၢင်ႈပၢႆးပိင်ႇၺႃႇ၊ ပၢႆးယူႇလီ၊ သဵၼ်ႈတႃႈသၢႆတၢင်းပဵၼ်ပိူင်လူင်သေ ၵေႃႇသၢင်ႈတွပ်ႇတႅၼ်း ၵုင်ႇမုၼ်ပေႃႈမႄႈၵူၼ်းမိူင်းၵူႊပီႊပီႊ၊ ၼႂ်းပီႊ2020ၼႆႉ ယၼ်ႇဝႆႉငိုၼ်းတႃႇၵေႃႇသၢင်ႈတွၼ်ႈလိၼ် ၶိုၼ်ႈယႂ်ႇ သင်ႉငိုၼ်း(10000)သႅၼ်ပျႃးလႄႈ ငိုၼ်းတႃႇပူၵ်းပွင်ၸွႆႈထႅမ်ၽဝၵူၼ်းမိူင်းႁႂ်ႈၶိုၼ်ႈယႂ်ႇမႂ်ႇသုင် သင်ႉငိုၼ်း (5000)သႅၼ်ပျႃးယူႇယဝ်ႉ။
