ၶၢဝ်ႇ – SSPP Info / March 30, 2020
ႁွင်ႈၵၢၼ်ၽၢႆႇယူလီ ၽၢႆႇဢုပ်ႉပိူင်ႇၸေႈဝဵင်းမၢႆ (10) ၊ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး လူင်းပိုၼ်ႉတီႈသေ ၸွႆႈထႅမ်ယူတ်းယႃပၼ်ၵူၼ်းမိူင်း ၼႂ်းဢိူင်ႇတူၼ်ႈၵႅင်း ၊တူင်ႇဝဵင်းသီႇပေႃႉ။
ဝၼ်းထီႉ – 23.03.2020 ၶၢဝ်းယၢမ်းၵၢင်ၼႂ် (09:00)မူင်းၼၼ်ႉ သိုၵ်းႁၢၼ် လုင်းၶမ်း ၵေႃႉပဵၼ်မေႃယႃ ၼႂ်းၸေႈဝဵင်းမၢႆ(10)လူင်းပိုၼ်ႉတီႈၸွမ်းၽူႈၸတ်းၵၢၼ်ၸေႈဝဵင်း ႁဵတ်းပၢင်ၵုမ်ၼႂ်းဢိူင်ႇတူၼ်ႈၵႅင်း လႄႈ ဢွၼ်ႁူဝ်မေႃယႃ ႁႅင်းၵူၼ်း(21)ၵေႃႉသေ ၸွႆႈထႅမ်ယူတ်းယႃပၼ်ၵူၼ်းမိူင်း ၸိူဝ်းမႃးၶိုၼ်ႈႁွတ်ႈ ပၢင်ၵုမ်ၵႂႃႇယူႇ။
တၢင်းပဵၼ်ဢၼ်လႆႈယူတ်းယႃပၼ်ၵႂႃႇၸမ်ႉ – ၶူပ်းၶိုၼ်ႈ၊ ဢႆ၊ မဝ်း၊ ၼၢဝ်၊ တွင်ႉဢိဝ်ႈ၊ ၶူမ်း၊ လိူတ်ႈၶိုၼ်ႈ၊ ႁႅင်းယွမ်း၊ ၽိတ်းလိူတ်ႈ၊ ပဵၼ်ဝတ်း၊ ႁႅင်းသၢႆတႃယွမ်း၊ ၶေႃးၸဵပ်း၊ ထူင်ၶဝ်ႈၸဵပ်း၊ သလိူၵ်ႈ၊ ၸႂ်ၵပ်ႉ၊ သွင်ႁူၼ်၊ တိၼ်မိုဝ်းသၼ်ႇ၊ ႁူဝ်ၶႆႈ၊ ႁူဝ်ၼၵ်း၊ ၶဵဝ်ႈမႅင်းၶိုၼ်ႈ ၸိူဝ်းၼႆႉသေ လႆႈယူတ်းယႃပၼ် ၵူၼ်းပဵၼ် ၸၢႆး(42)ၵေႃႉ၊ ယိင်း(61)ၵေႃႉယူႇယဝ်ႉ။
ႁွင်ႈၵၢၼ်ၽၢႆႇယူႇလီၽၢႆႇပႃႇတီႇမႂ်ႇသုင်ၸိုင်ႈတႆး၊တပ်ႉသိုၵ်းၸိုင်ႈတႆးၼႆႉ တိုၼ်းမီးပုၼ်ႈၽွၼ်းတႃႇ တူၺ်းထိုင်ပၢႆးယူႇလီပေႃႈမႄႈၵူၼ်းမိူင်းလႄႈ လူင်းပိုၼ်ႉတီႈသေ ၸွႆႈထႅမ်ယူတ်းယႃပၼ်ပေႃႈမႄႈ ၵူၼ်းမိူင်းမႃးယူႇၵူႈပီႊပီႊ။ ၼႂ်းပီ 2020 ၼီႈၼႆႉ မေႃယႃၼႂ်း ႁွင်ႈၵၢၼ်ယူႇလီ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး လူင်ပိုၼ်ႉတီႈသေ ယူတ်းယႃပၼ်ပေႃႈမႄႈၵူၼ်းမိူင်း လၢႆပွၵ်ႈလၢႆၵမ်းယဝ်ႉ။
