လိူၼ် March (16)ဝၼ်း၊ ပီႊ2020
ၶၢဝ်ႇ – SSPP Info
မိူဝ်ႈၼႆႉ ဝၼ်းထီႉ- 16/03/2020 ယၢမ်း(09:00)မူင်း တေႃႇထိုင် (12:00)မူင်းၼၼ်ႉ ၽၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး လႆႈႁဵတ်းသၢင်ႈပၢင်ၵုမ် ၶွတ်ႇၽွတ်ႈၸုမ်းၸၢႆးယိင်းပၢၼ်မႂ်ႇ တီႈၵွင်းၸဝ်ႈမိူင်း ဝၢၼ်ႈၼႃးလၢၼ်ႇ ဢိူင်ႇပႃႇၵၢင်း ၸေႊဝဵင်းမၢႆ(9) ၸေႊတွၼ်ႈမၢႆ(4) ၵႂႃႇယူႇ။
ၽၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး ၼႂ်းၸေႊတွၼ်ႈမၢႆ(4)၊ ၸေႊဝဵင်းမၢႆ(9) လႆႈႁဵတ်းသၢင်ႈပၢင်ၵုမ် တႃႇၶွတ်ႇၽွတ်ႈမုၵ်ႉၸုမ်းၸၢႆးယိင်းပၢၼ်မႂ်ႇ တီႈၵွင်းၸဝ်ႈမိူင်း ဝၢၼ်ႈၼႃးလၢၼ်ႇ သေ ၽၢႆႇဢုပ်ႉပိူင်ႇလႄႈ ၽၢႆႇႁူမ်ႇလူမ်ႈ ၶိုၼ်ႈႁွတ်ႈ(21)ၵေႃႉ၊ ၵေႃႇမတီႇဢုပ်ႉပိူင်ႇ ၸုမ်း/ဢိူင်ႇ (8)ၵေႃႉ၊ ၵေႃႇမတီႇ ၸၢႆးယိင်း(9)ၵေႃႉ၊ မုၵ်ႉၸုမ်းၸၢႆးယိင်းပၢၼ်မႂ်ႇ(361)ၵေႃႉ ႁွင်ႈၵၢၼ်လူင် တပ်ႉငဝ်ႈသိုၵ်း-999 (1)ၵေႃႉ ႁူမ်ႈသဵင်ႈ ၽူႈၶိုၼ်ႈႁွတ်ႈမီး (401)ၵေႃႉၼႆယူႇ။
တီႈၼႂ်းပၢင်ၵုမ်ၼၼ်ႉ ၽူႈၸတ်းၵၢၼ်ၸေႊဝဵင်း လႆႈမွၵ်ႈလၢတ်ႈသပ်းလႅင်းၼႄ လွင်ႈပိူင်ၵၢၼ်ဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး၊ ပိူင်ၵၢၼ်ၸၢႆးယိင်းပၢၼ်မႂ်ႇ၊ ပုၼ်ႈၽွၼ်းၽူႈၶဝ်ႈၸုမ်းၸၢႆး ယိင်းပၢၼ်မႂ်ႇလႄႈ သုၼ်ႇလႆႈၸၢႆးယိင်းပၢၼ်မႂ်ႇၸိူဝ်းၼႆႉၵႂႃႇယူႇ။ လိူဝ်ၼၼ်ႉ ၽူႈၶိုၼ်ႈႁွတ်ႈပၢင်ၵုမ် တၢင်ႇၼႄတၢင်းႁၼ်ထိုင်ၽႂ်မၼ်းၸိူဝ်းၼႆႉသေ လႆႈၽွတ်ႈႁႅၼ်း မုၵ်ႉၸုမ်းၸၢႆးယိင်းပၢၼ်မႂ်ႇ ၼႂ်းဢိူင်ႇပႃႇၵၢင်း ၸေႊဝဵင်းမၢႆ(9) ယဝ်ႉတူဝ်ႈၵႂႃႇလီငၢမ်းယူႇယဝ်ႉ။
ၽၢႆႇဢုပ်ႉပိူင်ႇ ၼႂ်းၸေႊဝဵင်းမၢႆ(9) လႆႈၽွတ်ႈႁႅၼ်းႁဵတ်းသၢင်ႈပၢင်ၵုမ်မႃး ၼႂ်းဢိူင်ႇႁူဝ်ယ၊ ဢိူင်ႇဝၢၼ်ႈ မေႃႈ၊ ဢိူင်ႇပႃႇၵၢင်းၸိူဝ်းၼႆႉသေ တေသိုပ်ႇႁဵတ်းသၢင်ႈပၢင်ၵုမ်တႃႇၶွတ်ႇၽွတ်ႈ မုၵ်ႉၸုမ်းၸၢႆးယိင်း ပၢၼ်မႂ်ႇ ၼႂ်းဢိူင်ႇသႅင်ၵႅဝ်ႉ၊ ဢိူင်ႇႁူဝ်တိုဝ်ႉလႄႈ ဢိူင်ႇဝၢၼ်ႈပၢၼ်းၸိူဝ်းၼႆႉၵႂႃႇထႅင်ႈယူႇ။
