March 16,2020
By – SSPP/ SSA
ၼႂ်းလိူၼ်မၢတ်ႉ 14 ဝၼ်း ပီႊ 2020 ၼီႊ ၶၢဝ်းယၢမ်းၵၢင်ၼႂ် 9:50 မူင်း တေႃႇထိုင်ၶၢဝ်းယၢမ်းဝၢႆးဝၼ်း 2:30 မူင်းၼၼ်ႉ ၸဝ်ႈႁၢၼ် သၢင်ႇၶွင်ႇ ၵေႃႉပဵၼ်ၽူႈၸတ်းၵၢၼ်ၸေႈတွၼ်ႈမၢႆ(3) လႆႈဢွၼ်ႁူဝ် ၸတ်းႁဵတ်းပၢင်လိူၵ်ႈတင်ႈၽူႈဢွၼ်ႁူဝ်ဢိူင်ႇလႄႈ ၵႅမ်ၽူႈဢွၼ်ႁူဝ်ဢိူင်ႇ ၼႂ်းဢိူင်ႇဝၢၼ်ႈၽုၺ်း ၸေႈဝဵင်းၵေးသီး ၵႂႃႇယူႇ။
ပၢင်လိူၵ်ႈတင်ႈၼၼ်ႉ လႆႈၸတ်းႁဵတ်းၵႂႃႇ တႂ်ႈတူၼ်ႈမႆႉႁုင်း ၼႂ်းဝၢင်းၵျွင်းမုၼ်ၸဝ်ႈဝၢၼ်ႈပႃတႅပ်း ဢိူင်ႇပၢင်ႇၸႄႈ ၼႂ်းၸေႈဝဵင်းမၢႆ(5) ၸေႈတွၼ်ႈမၢႆ(3)သေ ၽူႈၶၢမ်ႇလိူၵ်ႈတင်ႈပဵၼ်ၽူႈဢွၼ်ႁူဝ် ဢိူင်ႇလႄႈ ၵႅမ်ၽူႈဢွၼ်ႁူဝ်ဢိူင်ႇမီး(17)ၵေႃႉ၊ ၵေႃႇမတီႇၸေႈတွၼ်ႈဢိၵ်ႇၸေႈဝဵင်းၶိုၼ်းႁွတ်ႈ(7) ၵေႃႉ၊ ၽူႈၵႅဝ်ပၢင်လိူၵ်ႈတင်ႈ(2)ၵေႃႉ၊ ပေႃႈမႄႈၵူၼ်းမိူင်းၸၢႆးဢိၵ်ႇယိင်းၶိုၼ်ႈႁွတ်ႈ(226)ၵေႃႉ ႁူမ်ႈ သဵင်ႈၽူႈၶိုၼ်ႈႁွတ်ႈမီး(252)ၵေႃႉ ၼႆယူႇ။
ၸွမ်းၼင်ႇၶေႃႈတုၵ်းယွၼ်းပေႃႈမႄႈၵူၼ်းမိူင်းလႄႈ မူႇပိူင်လၢႆးၵၢၼ်ဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈ တႆး၊ တပ်ႉသိုၵ်းၸိုင်ႈတႆး(SSPP/ SSA)မီးၼၼ်ႉ တၢမ်တူဝ်ၽူႈၸတ်းၵၢၼ်ၸေႈတွၼ်ႈမၢႆ(3) ၸင်ႇ လႆႈဢွၼ်ႁူဝ်ၸတ်းႁဵတ်းပၢင်လိူၵ်ႈတင်ႈၽူႈဢွၼ်ႁူဝ်ဢိူင်ႇ ၼႂ်းဢိူင်ႇဝၢၼ်ႈၽုၺ်းၵႂႃႇယူႇ။
