By – SSPP/SSA
လိူၼ် March,30ဝၼ်း၊ ပီႊ2020ၼီႊ
ၽူႈမီးပုၼ်ႈၽွၼ်း ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး ဢၼ်တူင်ႉၼိုင်ၼႂ်းထုင်ႉမိူင်းယေႃ လူင်းထူပ်းပေႃႈမႄႈၵူၼ်းမိူင်း သပ်းလႅင်းလွင်ႈတၢင်းပဵၼ်ၶူဝ်ႊဝိတ်ႉ-19လႄႈ ႁေႉႁၢမ်ႈတႃႇတေဢမ်ႇပဵၼ် လွင်ႈၵူၼ်းၶွၼ်ႈၼမ်သေ ႁဵတ်းပွႆးႁဵတ်းလၢမ်း။
မိူဝ်ႈၼႆႉ ဝၼ်းထီႉ-(26/03/2020) ၶၢဝ်းယၢမ်း(08 45)မူင်း တေႃႇထိုင်(09 20)မူင်း ၽူႈၸတ်းၵၢၼ် ၸေႊတွၼ်ႈမၢႆ(10)လႄႈ ၽူႈၸတ်းၵၢၼ်ၸေႊဝဵင်းမၢႆ(28) ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး ဢိၵ်ႇပႃးႁူဝ်ၼႃႈဝၢၼ်ႈ၊ ဢိူင်ႇလႄႈ ႁူဝ်ၼႃႈၸုမ်းၵူၼ်းၼုမ်ႇတႆး ၼႂ်းထုင်ႉမိူင်းယေႃ ဢိၵ်ႇပႃးပေႃႈမႄႈ ၵူၼ်းမိူင်း ၸိူဝ်းဢၼ်တေဢဝ်လုၵ်ႈလၢင်းၶၢမ်ႇသၢင်ႇလွင်းၼၼ်ႉသေ သပ်းလႅင်းပၼ်ပိုၼ်ႉႁူႉ တႃႇၵႅတ်ႇၶႄႁေႉၵင်ႈ ၵဵဝ်ႇလူၺ်ႈလွင်ႈတၢင်းပဵၼ်ၶူဝ်ႊဝိတ်ႉ(19)ယဝ်ႉ ႁၢမ်ႈတႃႇတေဢမ်ႇပဵၼ်လွင်ႈၵူၼ်း ၶွၼ်ႈၼမ် ႁဵတ်းပွႆးႁဵတ်းလၢမ်း ၵႂႃႇယူႇ။
ဝၼ်းထီႉ – 25/03/2020 ၼၼ်ႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး ဢွၵ်ႇၶေႃႈ ပူင်ပိုၼ်ၽၢဝ်ႇ တႃႇၵႅတ်ႇၶႄႁေႉၵင်ႈ တၢင်းပဵၼ်ၵၢပ်ႈလူင်(ၵႃႇလ)ၶူဝ်ႊဝိတ်ႉ-19 သေ ၼႂ်းလိၵ်ႈပိုၼ်ၽၢဝ်ႇ ၼၼ်ႉ ပႃးဝႆႉဝႃႈ တေလႆႈငိူင်ႉဝႄႈလွင်ႈၵူၼ်းၶွၼ်ႈၸုတုမ်ၵၼ်၊ လွင်ႈၶႅၵ်ႇတၢင်ႇတီႈမႃးၼွၼ်းၶၢင်ႉၶိုၼ်း၊ လွင်ႈၵူၼ်းလုၵ်ႉၼွၵ်ႈမိူင်းမႃး တေလႆႈၵူတ်ႇထတ်းပၢႆးယူႇလီ ဢွၵ်ႇယူႇၼွၵ်ႈဝၢၼ်ႈတႃႇၶၢဝ်းတၢင်း(14-15)ဝၼ်း ပႂ်ႉတူၺ်းပၢႆးယူႇလီသေ လႆႈတမ်းၸႂ်ယဝ်ႉၸင်ႇႁွင်ႉၶဝ်ႈဝၢၼ်ႈ ယူႇၸွမ်းမုင်ႉႁေႃႁိူၼ်းၽႂ်မၼ်း ၸိူဝ်းၼႆႉယူႇယဝ်ႉ။
