ၶၢဝ်ႇ- SSPP/SSA
March 2,2020
ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၸတ်းႁဵတ်းပၢင်လူင်းလိုဝ်ႈပၢင်သွၼ်ငဝ်ႈၶၢမ်ႇပိုၼ်ႉၵၢၼ်သိုၵ်း ၸုပ်ႈထီႉ (39) တီႁူင်းႁဵၼ်းၽိုၵ်းသွၼ်ၵၢၼ်သိုၵ်း ၸေႈဝဵင်းၵေးသီး ၸိုင်ႈတႆး ပွတ်းၸၢၼ်း မီးၵူၼ်းသိုၵ်း ၶဝ်ႈႁူမ်ႈ ၼပ်ႉႁူဝ်ပၢၵ်ႇ ။
ဝၼ်းထီႉ- 01- လိူၼ်မၢသ်ႉ-2020 ၼႆႉယူႇတီႈၸွမ်သိုၵ်း ၶိၼ်ႇမိၼ်ႇ ၽူႈပွင်ၵၢၼ်သိုၵ်း ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဢွၼ်ႁူဝ်ပိုတ်ႇပၢင်လူင်းပၢင်သွၼ်ငဝ်ႈၶၢပ်ႇပိုၼ်ႉၵၢၼ်သိုၵ်းၵႂႃႇ မီးၽူႈယႂ်ႇၵူၼ်းလူင် ၵေႃႇမတီႇလုမ်း ပွင်ၵၢၼ်သိုၵ်း ၊ ၽူႈၼမ်းၼႂ်း ၊ ၽူႈမီးၸၼ်ႉထႅင်ႈလၢႆလၢႆၸဝ်ႈ လႄႈ လုၵ်ႈႁဵၼ်းသိုၵ်း ၶူးပူင်သွၼ် ၶိုၼ်ႈႁွတ်ႈ ႁူဝ်ၵူၼ်း 200 ပၢႆ ဝႃႈၼႆ။
ၸွမ်သိုၵ်း ၶိၼ်ႇမိၼ်ႇ ၽူႈပွင်ၵၢၼ်သိုၵ်း မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵႂႃႇဝႃႈ – ၸိူဝ်းပဵၼ်လုၵ်ႈႁဵၼ်းတင်းသဵင်ႈၼႆႉ မိူဝ်ႈမီးၼႂ်းႁူင်းႁဵၼ်းတႄႉ ပဵၼ်သိုၵ်းႁၢၼ် ပေႃးဢွၵ်ႇၼွၵ်ႈႁူင်းႁဵၼ်းသိုၵ်းၵႂႃႇယဝ်ႉ တေလႆႈပဵၼ်ၵူၼ်းၵတ်ႉငၢၼ် ၊ တေလႆႈ ႁဵတ်းၸွမ်းပၵ်းပိူင်လၵ်းမၢႆ ၊ တေလႆႈထွမ်ႇၶေႃႈပူင်ၶေႃႈၸီႉသင်ႇၽူႈယႂ်ႇၵူၼ်းလူင်တမ်းဝၢင်းပၼ် ၊ တေလႆႈၶတ်းၸႂ် ႁဵတ်းသၢင်ႈၼႃႈၵၢၼ် ၸွမ်းၼင်ႇပုၼ်ႈၽွၼ်းတူဝ်ၸဝ်ႈၵဝ်ႇမီးၼၼ်ႉ တဵမ်တဵမ်ထူၼ်ႈထူၼ်ႈ ၸင်ႇတေၸၢင်ႈၶိုၼ်ႈယႂ်ႇ ၊ လိူဝ်သေၼၼ်ႉ လူဝ်ႇမီးၸႂ်မေႃႁၵ်ႉၸိူဝ်ႉၶိူဝ်းတူဝ်ၵဝ်ႇ လူဝ်ႇလႆႈမေႃဝူၼ်ႉဝႃႈ မီးၵမ်းပိူၼ်ႈၵေႃႈ တေၸၢင်ႈမီးၵမ်းႁဝ်း မိူဝ်ႈလဵဝ် ပိူၼ်ႈယိုဝ်းၽူႈၶဵၼ်မေႃးယူႇၵေႃႈ ဝၼ်းၼိုင်ႈႁဝ်းၵေႃႈတိုၼ်းတေလႆႈယိုဝ်းၽူႈၶဵၼ်မိူၼ်ၵၼ်ယဝ်ႉ ယႃႇပေလူင်လိုမ်း၊ တိူဝ်ႉၽႂ် ၵေႃႈလီ ၸၢဝ်းၶိူဝ်းဢၼ်ယူႇႁူမ်ႈ ၼႂ်းမိူင်းတႆးၼႆႉ တိုၼ်းပဵၼ်ပီႈၼွင်ႉၵၼ်မူတ်းမူတ်းယဝ်ႉ ႁဝ်းတိုၼ်းလူဝ်ႇမေႃ ၸွႆႈထႅမ် ၵၼ်ၵႂႃႇ ဝႃႈၼႆ။ၼႂ်းပၢင်လူင်းၵၢၼ်သွၼ်ငဝ်ႈၶၢမ်ႇပိုၼ်ႉၵၢၼ်သိုၵ်းပွၵ်ႈၼႆႉ လုၵ်ႈႁဵၼ်းသိုၵ်းၶဝ် ၼႄၽၢင်ႁၢင်ႈသိုၵ်း လၢႆးၼပ်ႉယမ် လၢႆးမိုဝ်း လၢႆးၵွင်ႈ ၊ လၢႆးတႅင်းႁွၵ်ႇ ၊ လၢႆးၽႅၼ်ႉၼႃႈသိုၵ်း လၢႆးၶိုၼ်ႈၼႃႈသိုၵ်း ၸိူဝ်းၼႆႉသေ ၽူႈယႂ်ႇၵူၼ်းလူင် ယိုၼ်ႈဢၢပ်ႈပၼ် ၶႅပ်းဝႂ်တူဝ်ယဝ်ႉ ၵိၼ်ၶဝ်ႈသုမ်လီ ၸွမ်းၵၼ်ၵႂႃႇ ဝႃႈၼႆ။
