March 23,2020
By – SSPP/ SSA
ၼႂ်းလိူၼ်မၢတ်ႉ 22 ဝၼ်း ပီႊ 2020 ၼီႊ ၶၢဝ်းယၢမ်းၵၢင်ၼႂ် 10:00 မူင်း တေႃႇထိုင် ယၢမ်းတဵင်ႈ ဝၼ်း12:00 မူင်းၼၼ်ႉ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) လႆႈၸတ်းႁဵတ်း ပၢင်ပွႆးသွၼ်ႉမိင်ႈၵူပ်ႉၵူႈပဵၼ်ႁိူၼ်းပၼ် ၵေႃႉသိုၵ်းၵေႃႉႁၢၼ် ၸိူဝ်းတႄႇၼႃႈႁိူၼ်း တမ်ႈတီႈႁူင်း ႁဵၼ်းသိုၵ်းငဝ်ႈငုၼ်းၵႂႃႇယူႇ။
ပၢင်ပွႆးသွၼ်ႉမိင်ႈၵူပ်ႉၵူႈပဵၼ်ႁိူၼ်းပွၵ်ႈၼႆႉ ၸဝ်ႈမၢဝ်ႇၸဝ်ႈသၢဝ်မီး(5)ၵူႈသေ ၽူႈယႂ်ႇၵူၼ်းလူင်ငဝ်ႈ ငုၼ်း(SSPP/ SSA)လၢႆလၢႆၸဝ်ႈလႄႈ ပေႃႈမႄႈပီႈၼွင်ႉၸဝ်ႈမၢဝ်ႇၸဝ်ႈသၢဝ် လႆႈၶဝ်ႈႁူမ်ႈသုတ်း မုၼ်းပၼ်ၵႂၢမ်းၽွၼ်း မင်ႇၵလႃႇၵူပ်ႉၵူႈၵႂႃႇယူႇ။
ၵေႃႉႁၢၼ်မၢဝ်ႇ ယိင်းႁၢၼ်သၢဝ် ၸိူဝ်းဢၼ်ၵူပ်ႉၵူႈၵၼ်ၼၼ်ႉ ၸၢႆးၼုမ်ႇတႆးလႄႈၼၢင်းသူၺ်ႇႁၢၼ်ႇ၊ ၸၢႆးၼၼ်ႇတေႃးလႄႈၼၢင်းၸိင်ႇပုၼ်ႉ၊ ၸၢႆးထုၼ်းလႄႈၼၢင်းသူၺ်ႇၼူႉ၊ ၸၢႆးၸၢမ်ႇၽေႇလႄႈ ၼၢင်းၵူမ်ၶိူဝ်း ဢိၵ်ႇတင်းၸၢႆးပီးလႄႈၼၢင်းသူၺ်ႇဢိင်ႇ ၼႆယူႇ။
ၶပ်ႉမၢႆပၢင်ပွႆးသွၼ်ႉမိင်ႇတွၼ်ႈၵၢင်ၼႂ်ၼၼ်ႉ ၽူႈယႂ်ႇၵူၼ်းလူင်ငဝ်ႈငုၼ်းလႄႈ ပေႃႈမႄႈပီႈၼွင်ႉ ၵေႃႉႁၢၼ်မၢဝ်ႇ ယိင်းႁၢၼ်သၢဝ်ၶဝ် လႆႈသုတ်ႇမုၼ်းပၼ်ၵႂၢမ်းၽွၼ်း မင်ႇၵလႃႇသေ တွၼ်ႈဝၢႆးဝၼ်း ၼၼ်ႉ လႆႈၸတ်းႁဵတ်းပၢင်ၵိၼ်ၶဝ်ႈသုမ်လီ ႁွင်ႉၽဵင်းၵႂၢမ်းလဝ်ႇမူၼ်ႈတူၼ်ႈၸႂ်ၵၼ်ၵႂႃႇယူႇ။ ပွႆးသွၼ်ႉမိင်ႇၵူပ်ႉၵူႈပဵၼ်ႁိူၼ်း ႁူမ်ႈၵၼ်(5)ၵူႈၼႆႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈ တႆး လႆႈၸတ်းႁဵတ်းၵႂႃႇပဵၼ်ပွၵ်ႈဢွၼ်တၢင်းသုတ်းသေ ၸွမ်းၼင်ႇငဝ်းလၢႆးၵူႈၽၢႆႇၽၢႆႇၽၢၼ်ႇပွင်မီး ၼၼ်ႉ မိူဝ်းၼႃႈၶၢဝ်းလိုၼ်းမႃးၵေႃႈ တေၸၢင်ႈပွင်သၢင်ႈၸတ်းႁဵတ်းၵႂႃႇထႅင်ႈယူႇ။
