ၶၢဝ်ႇ-SSPP info
February 8, 2020
ပေႃႈမႄႈၵူၼ်းမိူင်း ၼႂ်းတူင်ႇဝဵင်းၵေးသီး ႁပ်ႉႁုၼ်ႇႁၢင်ႈ ၸဝ်ႈၾႃႉသူၺ်ႇမုင်ႇ (ဢၼ်ပဵၼ်ၸဝ်ႈၾႃႉ ဢုပ်ႉမိူင်းၵေးသီး ပႃးလိုၼ်းသုတ်း) သေ ပၢင်းၸၢမ်ႇႁၢင်ႈႁေႃ တီႈၼႂ်းႁွင်ႈၼႄပိုၼ်းမၼ်းၸဝ်ႈ ယိူင်း တႃႇပဵၼ်မၢႆတွင်း ဝၼ်းၶိူဝ်းတႆးၶွပ်ႈၶူပ်ႇ(73)ပီ လႆႈၸတ်းႁဵတ်းၵႂႃႇတီႈ ဝဵင်းၵေးသီး ၸိုင်ႈတႆးၵွၼ်ၵၢင် ၵႂႃႇယူႇ။
ဝၼ်းထီႉ 7.2.2020 ၼႆႉ ၸွမ်းၼင်ႇၼႂ်းပိုၼ်း လိၵ်ႈႁူမ်ႈမၢႆပၢင်လူင်မီးမႃးၼၼ်ႉ ဝၼ်းၶိူဝ်းတႆးၶွပ်ႈၶူပ်ႇ (73)ပီလႄႈ ၵႃႈပဵၼ်ၸၢဝ်းၶိူဝ်းတႆး ၵူႈတီႈၵူႈတၢင်းၵႃႈပွင်ပဵၼ်လႆႈၼၼ်ႉ ဢွၼ်ၵၼ်ၸတ်းႁဵတ်းပၢင်ၵႅဝ်ႈ ၶုၵ်းထူပ်း ဝၼ်းၵိုၵ်းပိုၼ်း ဢၼ်ဢမ်ႇလီလူင်လိုမ်း(February, 7)ဝၼ်းၼႆႉ သိုဝ်ႈၽႂ်မၼ်းယူႇ။တီႈပၢင်ၵႅဝ်ႈ ဝၼ်းၶိူဝ်းတႆး(ႁိုဝ်) ဝၼ်းၸိူဝ်ႉၸၢတ်ႈၸိုင်ႈတႆး ဝဵင်းၵေးသီးၼၼ်ႉ ၸဝ်ႈသိုၵ်း ၸၢႆးသူႉ ၽူႈ ၼမ်းၼႂ်း(2) ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၶဝ်ႈႁူမ်ႈပၼ်ႁႅင်း ဢိၵ်ႇပႃးၸွႆႈထႅမ်ငိုၼ်း 2,000,000 (သၢဝ်းသႅၼ်)ပျႃးသေ လႆႈလူဢၢၼ်ႇၽိုၼ်လိၵ်ႈ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ယိုၼ်ႈထိုင်ပၢင်ၵႅဝ်ႈ ဝၼ်းၶိူဝ်းတႆး ၶွပ်ႇၶူပ်ႇ(73) ၵႂႃႇယူႇယဝ်ႉ။
