ၶၢဝ်ႇ-SSPP info
February 11, 2020
ၽူႈၶဝ်ႈၵေႃႇမတီႇၸေႈဝဵင်းမၢႆ(10) ၼႂ်းၸေႈတွၼ်ႈမၢႆ(4) SSPP/SSA ဢၼ်ၽူႈၸတ်းၵၢၼ် ၸေႈဝဵင်းမၢႆ(10) ဢွၼ်ႁူဝ် တၢင်တူဝ်ၼႂ်းႁွင်ႈၵၢၼ်ပၢႆးပိင်ႇၺႃႇသေ ၶိုၼ်ႈႁွတ်ႈပၼ်ႁႅင်းပၢင်ပွႆးတွၼ်ႈ သူးလုၵ်ႈႁဵၼ်း တီႈႁူင်းႁဵၼ်း ဝၢၼ်ႈၼႃးၽႅမ်း ၸုမ်း(1) ဢိူင်ႇတူၼ်ႈၵႅင်း ၸေႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ။
ဝၼ်းထီႉ 11.2.2020 ယၢမ်းၵၢင်ၼႂ် (0940)မူင်းၼၼ်ႉ တူဝ်ၽူႈၸတ်းၵၢၼ်ၸေႈဝဵင်းမၢႆ(10) ပႃႈတႂ်ႈၵုမ်း ၵမ်ၸေႈတွၼ်ႈမၢႆ(4) SSPP/SSA ၶိုၼ်ႈပၼ်ႁႅင်းပၢင်ပွႆး တွၼ်ႈသူးလုၵ်ႈႁဵၼ်း ဢွင်ႇပူၼ်ႉၸၼ်ႉ တီႈႁူင်းႁဵၼ်းၸၼ်ႉငဝ်ႈ ဝၢၼ်ႈၼႃးၽႅမ်းသေ မွၵ်ႇလၢတ်ႈၶေႃႈၵႂၢမ်းပၼ်ႁႅင်း ႁႂ်ႈဢွၼ်ၵၼ်ပၼ်ႁႅင်း တုၵ်းသူၼ်း လုၵ်ႈၽႂ်လၢင်းမၼ်း ႁဵၼ်းသွၼ်ပိင်ႇၺႃႇဝႃႈ““လိၵ်ႈလၢႆးၼႆႉ ပဵၼ်ၵၢၵ်ႇသေႃးၵူႈလွင်ႈလွင်ႈ လႄႈ လူဝ်ႇဢွၼ်ၵၼ်ဝႆႉ ပၢႆးပိင်ႇၺႃႇပဵၼ်ၵၢၼ်လမ်ႇလွင်ႈသေ တိုၵ်းသူၼ်းပၼ်ႁႅင်း လုၵ်ႈဢွၼ်ႇ ၸိူဝ်း လူဝ်ႇလႆႈၶိုၼ်ႈႁဵၼ်းၼၼ်ႉ ႁႂ်ႈဢွၼ်ၵၼ်သူင်ႇၶိုၼ်ႈႁဵၼ်း၊ ၼႂ်းပီ 2020 ၼီႈၼႆႉ ယူႇတီႈႁွင်ႈၵၢၼ် ၸေႈ ဝဵင်းမၢႆ(10) တေဝႆႉပၢႆးပိင်ႇၺႃႇ ပဵၼ်ၵၢၼ်ထီႉ(1)သေ ႁဵတ်းသၢင်ႈၵႂႃႇလႄႈ ႁႂ်ႈပေႃႈမႄႈၵူၼ်းမိူင်း ပွင်ႇၸႂ် ႁူႉၸွမ်း၊ ပေႃးႁူင်းႁဵၼ်းလူင်ပွင်ၸိုင်ႈ လိုဝ်ႈၵိုတ်းၵၢၼ်ႁဵၼ်းယဝ်ႉ လူဝ်ႇတိုၵ်းသူၼ်းလုၵ်ႈလၢင်းၽႂ် မၼ်း ႁႂ်ႈသိုပ်ႇႁဵၼ်းဢဝ်လိၵ်ႈလၢႆးတႆးၵႂႃႇ”ၼႆယူႇယဝ်ႉ။
တီႈပၢင်ပွႆးတွၼ်ႈသူးလုၵ်ႈႁဵၼ်းၼၼ်ႉ ၽၢႆႇၸေႈဝဵင်းမၢႆ(10) တင်းသဵင်ႈၶိုၼ်ႈႁွတ်ႈ(11)ၵေႃႉ၊ ၸုမ်းမေႃ သွၼ် ႁူင်းႁဵၼ်းပိုၼ်ႉတီႈ(23)ၵေႃႉ၊ လုၵ်ႈႁဵၼ်း ႁူင်းႁဵၼ်းၸၼ်ႉငဝ်ႈ ဝၢၼ်ႈၼႃးၽႅမ်း ၸၢႆး/ယိင်း(67) ၵေႃႉ၊ ၵေႃႇမတီႇပွင်ၵၢၼ်ပၢႆးပိင်ႇၺႃႇပိုၼ်ႉတီႈလႄႈဢိၵ်ႇပႃးပေႃႈမႄႈလုၵ်ႈႁဵၼ်း ဢွၼ်ၵၼ်ၶိုၼ်ႈႁွတ်ႈ သေ မီးႁႅင်းၵူၼ်း(200)ပၢႆ ၶိုၼ်ႈႁွတ်ႈပၼ်ႁႅင်းၵႂႃႇ၊ ယူႇတီႈၵေႃႇမတီႇၸေႈဝဵင်းမၢႆ(10) လႆႈၸွႆႈထႅမ်ငိုၼ်း (100,000) ပျႃး ၵႂႃႇယူႇယဝ်ႉ။
