ၶၢဝ်ႇ-SSPP info
February 8, 2020
ၽူႈၶဝ်ႈၵေႃႇမတီႇၸေႈဝဵင်းမၢႆ(10) ၼႂ်းၸေႈတွၼ်ႈမၢႆ(4) SSPP/SSA ႁူဝ်သိုၵ်း လၢဝ်ၶူင်း တၢင်တူဝ် ၼႂ်းႁွင်ႈၵၢၼ်ပၢႆးပိင်ႇၺႃႇသေ ၶိုၼ်ႈႁွတ်ႈပၼ်ႁႅင်းပၢင်ပွႆးတွၼ်ႈသူးလုၵ်ႈႁဵၼ်း တီႈႁူင်းႁဵၼ်း ဝၢၼ်ႈၼမ်ႉပူ ဢိူင်ႇႁၢင်ၼႃး တူင်ႇဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ဝၼ်းထီႉ 7.2.2020 ယၢမ်း (9:30)မူင်း တေႃႇထိုင်ယၢမ်း 12:30 မူင်းၼၼ်ႉ ၵေႃႇမတီႇပွင်ၵၢၼ် ႁူင်းႁဵၼ်း ပေႃႈမႄႈလုၵ်ႈႁဵၼ်းလႄႈၸုမ်းမေႃသွၼ် ဢိၵ်ႇပႃးၽူႈမီးပုၼ်ႈၽွၼ်းၼႂ်းဝၢၼ်ႈၼမ်ႉပူ ႁူမ်ႈၵၼ် ၸတ်း ႁဵတ်း ပၢင်ပွႆးတွၼ်ႈသူးလုၵ်ႈႁဵၼ်း ၸိူဝ်းဢွင်ႇပူၼ်ႉၸၼ်ႉၼႆလႄႈ ယူႇတီႈၽူႈမီးပုၼ်ႈၽွၼ်းၼႂ်းၼႃႈ တီႈ လႆႈၶိုၼ်ႈႁွတ်ႈမွၵ်ႇလၢတ်ႈၶေႃႈၵႂၢမ်းပၼ်ႁႅင်းၵႂႃႇဝႃႈ“လိၵ်ႈလၢႆးၼႆႉ ပဵၼ်ၵၢၵ်ႇသေႃးၵူႈလွင်ႈလွင်ႈ လႄႈ လူဝ်ႇဢွၼ်ၵၼ်ဝႆႉ ပၢႆးပိင်ႇၺႃႇပဵၼ်ၵၢၼ်လမ်ႇလွင်ႈသေ တိုၵ်းသူၼ်းပၼ်ႁႅင်း လုၵ်ႈဢွၼ်ႇ ၸိူဝ်း လူဝ်ႇလႆႈၶိုၼ်ႈႁဵၼ်းၼၼ်ႉ ႁႂ်ႈဢွၼ်ၵၼ်သူင်ႇၶိုၼ်ႈႁဵၼ်း၊ ၼႂ်းပီ 2020 ၼီႈၼႆႉ ယူႇတီႈႁွင်ႈၵၢၼ် ၸေႈ ဝဵင်းမၢႆ(10) တေဝႆႉပၢႆးပိင်ႇၺႃႇ ပဵၼ်ၵၢၼ်ထီႉ(1)သေ ႁဵတ်းသၢင်ႈၵႂႃႇလႄႈ ႁႂ်ႈပေႃႈမႄႈၵူၼ်းမိူင်း ပွင်ႇၸႂ် ႁူႉၸွမ်း၊ ပေႃးႁူင်းႁဵၼ်းလူင်ပွင်ၸိုင်ႈ လိုဝ်ႈၵိုတ်းၵၢၼ်ႁဵၼ်းယဝ်ႉ လူဝ်ႇတိုၵ်းသူၼ်းလုၵ်ႈလၢင်းၽႂ် မၼ်း ႁႂ်ႈသိုပ်ႇႁဵၼ်းဢဝ်လိၵ်ႈလၢႆးတႆးၵႂႃႇ”ၼႆယူႇယဝ်ႉ။
တီႈပၢင်ပွႆးတွၼ်ႈသူးၼၼ်ႉ လုၵ်ႈႁဵၼ်းၶိုၼ်ႈႁွတ်ႈ(90)ၵေႃႉ၊ ၸုမ်းမေႃသွၼ် (8)ၵေႃႉ၊ ပေႃႈလႄႈလုၵ်ႈ ႁဵၼ်းလႄႈၽူႈယႂ်ႇၵူၼ်းလူင်(94)ၵေႃႉ ႁူမ်ႈၽူႈၶိုၼ်ႈႁွတ်ႈပၢင်ပွႆးတွၼ်ႈသူးမီး(192)ၵေႃႉသေ ယူႇတီႈ ၵေႃႇမတီႇၸေႈဝဵင်း လႆႈသႂ်ႇငိုၼ်းၵွင်ၵၢင်ႁူင်းႁဵၼ်း 100,000ပျႃး ယူႇယဝ်ႉ။
