ၶၢဝ်ႇ- SSPP info
February 7, 2020
ၸွမ်းၼင်ႇၸုမ်းပၢႆးယူႇလီလုမ်ႈၾႃႉ ပိုၼ်ၽၢဝ်ႇဝၼ်းထီႉ 7.2.2020 ၼၼ်ႉ ၸိူဝ်ႉမႅင်းၵူဝ်ႊရူဝ်ႊၼႃႊ (Coronavirus) ဢမ်ႇၼၼ် ၸိူဝ်ႉမႅင်းဝူႊႁၢၼ်ႊ (Wuhun Virus) ၼႆႉ ၽႄႈထိုင်ၵႂႃႇၼႂ်းလုၵ်ႈ (28)မိူင်း၊ ၵူၼ်းၸပ်းတင်းပဵၼ်မီး (31164)ၵေႃႉ၊ ၵူၼ်းတၢႆယွၼ်ႉမၼ်းမီး(637)ၵေႃႉသေ ၵူၼ်းဢၼ်ယႃၶႅၼ်း မီး (1543)ၵေႃႉ ၼႆယူႇယဝ်ႉ။
ၼႂ်းသဵၼ်ႈမၢႆ ၸုမ်းပၢႆးယူႇလီလုမ်ႈၾႃႉ(WHO) ပိုၼ်ၽၢဝ်ႇၼၼ်ႉ ဢမ်ႇႁၼ်ပႃး မိူင်းႁူမ်ႈတုမ် မိူင်းမၢၼ်ႈ သေတႃႉ မိူင်းႁူမ်ႈတုမ်(မျၢၼ်ႊမႃႊ)ၼႆႉ ပဵၼ်မိူင်းဢၼ်တိတ်းၸပ်းမိူင်းၶေႇ ဢၼ်ၵူၼ်းမိူင်းၶဝ်ႈဢွၵ်ႇ ၵႂႃႇမႃးၵၼ် ၼမ်မိူင်းၼိုင်ႈယူႇလႄႈ ပဵၼ်လွင်ႈမႆႈၸႂ်ၵူၼ်းမိူင်း ထိုင်တီႈဢမ်ႇၶႂ်ႈၵႂႃႇမႃး တီႈၵူၼ်းၶွၼ်ႈ ၵူၼ်းၵိုၼ်းၼၼ်ႉယူႇ။ယွၼ်ႉပိူဝ်ႈတၢင်းပဵၼ်ၼႆႉသေ တုမ်ႉတိူဝ်ႉပႃးၵၢၼ်မၢၵ်ႈမီးမိူင်းၶေႇၵူၺ်းဢမ်ႇၵႃး တုမ်ႉတိူဝ်ႉပႃးပၢႆးမၢၵ်ႈ မီးလုမ်ႈၾႃႉယူႇၼႆ ၵူၼ်းႁဵတ်းၵၢၼ်မၢၵ်ႈမီးလူင် ၼႂ်းလုမ်ႈၾႃႉ ၵမ်ႈၽွင်ႈၼပ်ႉသၢင်ႈၼင်ႇၼႆ။ ဢၼ် လႆႈႁၼ်တုမ်ႉတိူဝ်ႉပၢႆးမၢၵ်ႈမီးၵမ်းသိုဝ်ႈၵေႃႈ ပဵၼ်ၵူၼ်းမိူင်းႁူမ်ႈတုမ် မိူင်းမၢၼ်ႈ၊ မိူၼ်ၼင်ႇမိူင်းတႆး လႄႈမိူင်းၶၢင်ၸိူဝ်းၼႆႉ ပဵၼ်တူဝ်ယၢင်ႇမၼ်းယူႇယဝ်ႉ။
