ၶၢဝ်ႇ-SSPP info
2 February 2020
တပ်ႉၽွမ်ႉႁူမ်ႈ FPNCC လူႇတၢၼ်းၸွႆႈထႅမ် ၽူႈတူမ်းသူပ်း/ၶူႈၼင် တီႈလူင်ပွင်ၸိုင်ႈမိူင်းၶေႇ ၽွင်း ၸိူဝ်ႉမႅင်း ၵူဝ်ႊရူဝ်ႊၼႃႊ ဢမ်ႇၼၼ် ၸိူဝ်ႉမႅင်းဝူႊႁၢၼ်ႊ တိတ်းၸပ်းၵႂႃႇ 20 မိူင်းပၢႆ။
ဝၼ်းထီႉ 02.02.2020 ယၢမ်း11:15 မူင်းၼၼ်ႉ ၽူႈတၢင်တူဝ် တပ်ႉၽွမ်ႉႁူမ်ႈ FPNCC လႆႈဢဝ်ၽႅၼ်ႇ တူမ်းသူပ်း/ၶူႈၼင် 424220 ဢၼ် ယိုၼ်ႈမွပ်ႈလူႇတၢၼ်းပၼ် တီႈၽူႈမီးပုၼ်ႈၽွၼ်း ၸေႈဝဵင်း သူၺ်ႇလီႇ ၸေႈတွၼ်ႈ ယူႇၼၢၼ်ႇ ၸိုင်ႈမိူင်းၶေႇၵႂႃႇယူႇယဝ်ႉ။
ယွၼ်ႉၵွပ်ႈၸိူဝ်ႉမႅင်း ၵူဝ်ႊရူဝ်ႊၼႃႊသေ ၵူၼ်းမိူင်းၼႂ်းၸိုင်ႈမိူင်းၶေႇလႄႈသင် တီႈမိူင်းႁိမ်းႁွမ်းလႄႈ သင် ဢွၼ်ၵၼ်ၾၢင်ႉလႄႈ ၽႃႈတူမ်းသူပ်း/ၶူႈၼင် ဢမ်ႇၵုမ်ႇဢမ်ႇလွၵ်ႉၵူၼ်းလႆႈ၊ မီးငိုၼ်းၵေႃႈသိုဝ်ႉ ဢမ်ႇလႆႈယဝ်ႉလႄႈ ယူႇတီႈတပ်ႉၽွမ်ႉႁူမ်ႈ FPNCC လႆႈၵဵပ်းသိုဝ်ႉလၢႆလၢႆတီႈသေ လူႇတၢၼ်းၸွႆႈထႅမ် ပၼ်ၵႂႃႇယူႇ။
ၸိူဝ်ႉမႅင်း ၵူဝ်ႊရူဝ်ႊၼႃႊ ဢမ်ႇၼၼ် ၸိူဝ်ႉမႅင်းဝူႊႁၢၼ်ႊၼႆႉ မၼ်းပဵၼ်ၸိူဝ်ႉမႅင်းဢၼ်လုၵ်ႉတီႈ ႁွင်ႈၵၢၼ်ၶူၼ်ႉၶႂႃႉ ၵဵဝ်ႇၵၢၼ်ႁဵတ်းဢွၵ်ႇၶိူင်ႈၵွင်ႈၵၢင်ႇလွတ်ႈဢွၵ်ႇပဵၼ်မႃးလႄႈ ၽႄႈဝႆးတိတ်းဝႆးတၢႆဝႆး တေႃႇထိုင်ယၢမ်းလဵဝ် ဢမ်ႇပႆႇႁႃႁၼ်ယႃႈယႃမၼ်းလႄႈတိုၵ်ႉလႆႈၸႂ်ယႂ်ႇလၢႆးႁေႉၵင်ႈမၼ်းၵူၺ်းၼၼ်ႉ ယူႇ။ ၵဵဝ်ႇလွင်ႈ ၸိူဝ်ႉမႅင်းၵူဝ်ႊရူဝ်ႊၼႃႊ လႆႈလွတ်ႈဢွၵ်ႇႁွင်ႈၵၢၼ်ၶူၼ်ႉၶႂႃႉ တီႈၸၼ်ႉၸွမ်ႁႃႊပႅတ်ႊၼၼ်ႉ ယွၼ်ႉမီးၽူႈလၵ်ႉၶေႃႈမုၼ်းလႄႈၵူၼ်းၵိၼ်သူးၵိၼ်လၢပ်ႈလႄႈ ႁွင်ႈၵၢၼ်ၶၢဝ်ႇၶိုၵ်ႉတွၼ်း ဢႅပ်ႉပီႇ ဢၢႆႊၶဝ်လႆႈတီႉၺွပ်းၵုမ်းၶင်ဝႆႉ ၽူႈပၢႆးမေႃမၼ်း မိူဝ်ႈဝၼ်းထီႉ 28.01.2020 ၼၼ်ႉယဝ်ႉလႄႈ တႃႇတေ ႁႃလၢႆးၵေႈမၼ်းလႆႈၵေႃႈ ၶႅၼ်းတိူဝ်းၵႆၵႂႃႇယူႇယဝ်ႉ။
