ၶၢဝ်ႇ- SSPP info
2020 (31) January
ၸၢဝ်းၶိူဝ်းၶေႇ ၸိုဝ်ႈ ဝၢၼ်ႊၵျိၼ်ႊပိင်ႊ ဢႃႇယူႉ (55)ၶူပ်ႇ ၼၼ်ႉ လုၵ်ႉတီႈဝဵင်းၵႂၢၼ်ႊၵျူဝ်ႊသေ ၼင်ႈႁိူဝ်းမိၼ် China Southern Airline ၽႅဝ်မႃးတႃႈၵုင်ႈယၢမ်း 10:45 မူင်း ၵွပ်ႈမီးလွင်ႈထၢင်ႇထိူမ် ပဵၼ် ၵူၼ်းတိတ်းၸပ်းၸိူဝ်ႉမႅင်း ၵူဝ်ႊရူဝ်ႊၼႃႊလႄႈ လုၵ်ႉတီႈဝၢင်းႁိူဝ်းမိၼ် မင်ႇၵလႃႇတူင်ႇသေ ဢဝ်ၵႂႃႇ တီႈႁူင်းယႃ ဝူၺ်ႇပႃႇၵီႇယဝ်ႉဝႃႈၼႆ။
ႁိူဝ်းမိၼ် ဢၼ်လုၵ်ႉတီႈဝဵင်းၵႂၢၼ်ႊၵျူဝ်း မိူင်းၶေႇသေ ၽႅဝ်မႃးတီႈဝဵင်းတႃႈၵုင်ႈၼၼ်ႉ ပႃးၵူၼ်းမႃး (86)ၵေႃႉ သင်ဝႃႈ ဝၢၼ်ႊၵျိၼ်ႊပိင်ႊၼၼ်ႉ တိတ်းၸပ်းၸိူဝ်ႉမႅင်း ၵူဝ်ႊရူဝ်ႊၼႃႊ(တၢင်းပဵၼ်ပွတ်ႇၸဵပ်း )မၢၼ်ႇမႅၼ်ႈယူႇၼႆ ပဵၼ်လွင်ႈမႆႈၸႂ်တွၼ်ႈတႃႇမိူင်းမၢၼ်ႈတႄႉတႄႉယူႇၼႆ ၵမ်ႉၼမ်ထတ်းသၢင်ၼင်ႇ ၼႆယူႇ။ၸိူဝ်ႉမႅင်းၵူဝ်ႊရူဝ်ႊၼႃႊၼႆႉ တႄႇပဵၼ်တီႈဝဵင်းဝူႊႁၢၼ်ႊ မိူင်းၶေႇ မိူဝ်ႈၼႂ်းလိူၼ် တီႊၸိၼ်ႊပႃႊ ပီ 2019 ၼၼ်ႉသေတႃႉ ၵွပ်ႈၽၢႆႇလူင်ပွင်ၸိုင်ႈၶေႇ ႁူမ်ႇတူမ်းဝႆႉမဝ်မၢင်မၼ်းလႄႈ ယၢမ်းလဵဝ်ၽႄႈတိူၼ်း ၵႂႃႇၸွမ်းမိူင်းႁိမ်းႁွမ်း 20 မိူင်းယဝ်ႉၼႆ ယူႇတီႈၽၢႆႇယူႇလီလူမ်ႈၾႃႉ (WHO)ၵေႃႈ ဝၼ်းထီႉ 31.1.2020 ၼႆႉ ၵူၼ်းတၢႆယွၼ်ႉ ၸိူဝ်ႉမႅင်းၵူဝ်ႊရူဝ်ႊၼႃႊမီး 213ၵေႃႉ၊ ၵူၼ်းၸိူဝ်းတိတ်းၸပ်းၸိူဝ်ႉမႅင်းမီးၵႂႃႇ ႁိမ်း10,000ၵေႃႉလႄႈ လႆႈပိုၼ်ၽၢဝ်ႇ ပဵၼ်ငဝ်းလၢႆးပၢႆးယူႇလီလုမ်ႈၾႃႉ ၶိုၵ်ႉၶၢၵ်ႉယူႇယဝ်ႉ။
