January – 25,2020
By – SSPP/ SSA
ၼႂ်းလိူၼ်ၸၼ်ႇဝႃႇရီႇ ပီႊ 2020 ၼီႊၼႆႉ ယိူင်းဢၢၼ်းတႃႇပဵၼ်ၵၢၼ်တွပ်ႇၵုင်ႇၵုၼ်းမုၼ်ပေႃႈမႄႈ ၵူၼ်းမိူင်းၼႆသေ ၸွမ်သိုၵ်းလူင် ၸဝ်ႈပၢင်ႇၾႃႉ ၵေႃႉပဵၼ်ႁူဝ်ပဝ်ႈလူင် ပႃႇတီႇမႂ်ႇသုင်ၸိုင်ႈတႆး၊ တပ်ႉ သိုၵ်းၸိုင်ႈတႆး(SSPP/ SSA) လႆႈဢွၼ်ႁူဝ်ၼၢမ်းၼႃႈ ၵေႃႇသၢင်ႈၽၢႆႇၼမ်ႉ တႃႇပေႃႈမႄႈၵူၼ်းမိူင်း ၼႂ်းပိုၼ်ႉတီႈၸေႈဝဵင်းတၢင်ႉယၢၼ်းၵႂႃႇယူႇ။
ၼမ်ႉသႃႈ ဢၼ်ယင်ႇႁၵ်ႈတီႈႁိမ်တူၼ်းသၼ် လွႆလၢၼ်းလူင်ၼၼ်ႉ ပဵၼ်ၵေးၼမ်ႉ ဢၼ်ၵိုၵ်းၵပ်း မီးပိုၼ်းၵိုၵ်းႁွမ်းၵၼ်တင်း တူၼ်းသၼ်လွႆလၢၼ်းလူင်ၼၼ်ႉသေ လုၵ်ႉတီႈၼႃႈမိူင်း ၽၢႆႇႁွင်ႇလႆ လတ်းလေႃႇလူင်းၸူးမႄႈၼမ်ႉၶူင်းယူႇ။
ၶူပ်ႇပီႊၼိုင်ႈပွၵ်ႈ ၼႂ်းၶၢဝ်းႁိုဝ်ႉၶၢဝ်းၽူၼ်ၼၼ်ႉ ပေႃႈမႄႈၵူၼ်းမိူင်းၼႂ်းပိုၼ်ႉတီႈ လႆႈဢွၼ်ၵၼ် ၵေႃႇ သၢင်ႈၽၢႆႇမႆႉ တီႈၼိူဝ်မႄႈၼမ်ႉသႃႈသေ ၵွၵ်ႇဢဝ်ၵႄးၼမ်ႉသႃႈ လႆလေႃႇလဵင်ႉသႂ်ႇၼႂ်းတိူၵ်ႇလွၵ်း ၼႃး ႁိမ်းတူၼ်းလုၵ်ႈလွႆလၢၼ်းလူင်ၼၼ်ႉမႃး ၵူႊပၢၼ်ပၢၼ်ယူႇ။
ၽၢႆၼမ်ႉသႃႈ ဢၼ်ပေႃႈမႄႈၵူၼ်းမိူင်း လႆႈဢဝ်ႁႅင်းတူဝ်ႁႅင်းၸႂ်သေ ၵေႃႇသၢင်ႈမႃးၼၼ်ႉ ယွၼ်ႉ ဢမ်ႇၵမ်ႉငၢမ်ႇၵၼ်တင်း ႁႅင်းၼမ်ႉလႆလေႃႇ မိူဝ်ႈၶၢဝ်းၽူၼ်လႄႈ လႆႈၵူၼ်ႇပင်းၶၢတ်ႇယၢတ်ႇၵႂႃႇၵူႊ ပီႊသေ ႁဵတ်းႁႂ်ႈပေႃႈမႄႈၵူၼ်းမိူင်းၼႂ်းပိုၼ်ႉတီႈ လႆႈႁၢမ်းၵၢၼ်ၽုၵ်ႇသွမ်ႇ တႃႇႁဵတ်းၵိၼ်ၵၢၼ်ၼႃး မႃးၵူႊပီႊယူႇယဝ်ႉ။
တႃႇတေၵႄႈလိတ်ႈပၼ် ပၼ်ႁႃၵၢၼ်ၽုၵ်ႇသွမ်ႈ ပေႃႈမႄႈၵူၼ်းမိူင်းၼႂ်းပိုၼ်ႉတီႈၵႂႃႇၼၼ်ႉ ၸွမ် သိုၵ်းလူင် ၸဝ်ႈပၢင်ႇၾႃႉ ၵေႃႉပဵၼ်ႁူဝ်ပဝ်ႈလူင် ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/ SSA) ၸင်ႇလႆႈဢွၼ်ႁူဝ်ၼၢမ်းၼႃႈသေ ၵေႃႇသၢင်ႈၽၢႆႁိၼ် တဵင်ၼမ်ႉလေႃႇလႆ တႃႇပွၼ်ႈ သွမ်လဵင်ႉလူတိူၵ်ႇၼႃး ပေႃႈမႄႈၵူၼ်းမိူင်းၵႂႃႇယူႇ။
