January 10,2020
By – SSPP/ SSA
ၼႂ်းဝၼ်းထီႉ-06.01.2020 ယၢမ်း 11:00 မူင်း တေႃႇထိုင် ဝၢႆးဝၼ်း 2:00 မူင်းၼၼ်ႉ ၽူႈယႂ်ႇၵူၼ်းလူင် ငဝ်ႈငုၼ်းပႃႇတီႇ မႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) လႆႈၸတ်းႁဵတ်းပၢင်ႁူပ်ႉထူပ်း ၸုမ်းၵူၼ်းၼုမ်ႇပိတ်ႉမၢၵ်ႇၼင်(14)ၸုမ်း တီႈႁူင်းႁေႃးလူင်ၼွင်ငိုၼ်း ၵႂႃႇယူႇ။
ၼႂ်းၸုမ်းၵူၼ်းၼုမ်ႇပိတ်ႉမၢၵ်ႇၼင်(14)ၸုမ်းၼၼ်ႉ ၶဝ်ႈပႃးၸုမ်းၵုင်းသႃႇ ၸေႈဝဵင်းသီႇပေႃႇ၊ ၸုမ်း ၽွမ်ႉႁူမ်ႈ ဝဵင်းၼမ်ႉၶမ်း၊ ၸုမ်းလွႆႁူဝ်သိူဝ်၊ ၸုမ်းမိူင်းလိူၼ်း(မိူင်းၵၢဝ်လူင်)၊ ၸုမ်းမိူင်းဝူၺ်း၊ ၸုမ်း မိူင်းယႆ၊ ၸုမ်းသႅဝ်ဝီ၊ ၸုမ်းလႃႈသဵဝ်ႈ၊ ၸုမ်းၵေးသီး၊ ၸုမ်းမိူင်းသူႈ၊ ၸုမ်းဝၢၼ်ႈသေႃႉ၊ ၸုမ်းမိူင်းၼွင်၊ ၸုမ်းဝၢၼ်ႈႁႆး(ၵ)၊ ၸုမ်းဝၢၼ်ႈႁႆး(ၶ) ၸိူဝ်းၼႆႉယဝ်ႉ။
ၸုမ်းၵူၼ်းၼုမ်ႇပိတ်ႉမၢၵ်ႇၼင်(14)ၸုမ်း လႆႈတေႇလဵၼ်ႈၶဵင်ႇပိတ်ႉမၢၵ်ႇၼင်ၵၼ် တေႇဢဝ်ၼႂ်း ဝၼ်းထီႉ-06.01.2020 တေႃႇထိုင် ဝၼ်းထီႉ-08.01.2020 ၶၢဝ်းတၢင်းႁိုင်(3)ဝၼ်းယူႇယဝ်ႉ။
ယိူင်းဢၢၼ်းပၢင်လဵၼ်ႈၶဵင်ႇပိတ်ႉမၢၵ်ႇၼင်ပွၵ်ႈၼႆႉ ပိူဝ်ႈတႃႇၵူၼ်းၼုမ်ႇၼႂ်းဝဵင်းလႄႈ ၵူၼ်းၼုမ်ႇၼႂ်း ပိုၼ်ႉတီႈ ဢိၵ်ႇတင်းၽူႈယႂ်ႇၵူၼ်းလူင်ငဝ်ႈငုၼ်း(SSPP/ SSA) မီးလွင်ႈမိုတ်ႈၵိုဝ်းၸမ်ၸႂ်ၵၼ်သေ တႃႇႁႂ်ႈႁူမ်ႈသၢၼ်မိုဝ်းၵၼ်သေ ၵႅတ်ႇၶႄႁႄႉၵင်ႈယႃႈမဝ်းၵမ် ၵႂႃႇၼႆယူႇ။
ၼႂ်းပၢင်ႁူပ်ႉထူပ်းၵၼ်ၼၼ်ႉ ၽူႈၶိုၼ်ႈႁွတ်ႈႁူမ်ႈသဵင်ႈမီး(315)ၵေႃႉသေ ၸွမ်သိုၵ်းလူင် သိူဝ်ထႅၼ်ႈ ၵေႃႉပဵၼ်ၽူႈၼၢမ်းၼႃႈ ထီႉ(1)ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး လႆႈၶူၼ်ႉၶႆႈၼႄ ပိုၼ်း
လၢႆးလုၵ်ႉၽိုၼ်ႉယိပ်းၵွင်ႈၵၢင်ႇၸိုင်ႈတႆးလႄႈ ယိူင်းဢၢၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈ တႆးၵႂႃႇယူႇ။
ၸွမ်သိုၵ်း ၶိူဝ်းတႆး ၵေႃႉပဵၼ်ၵႅမ်ႁူဝ်ပဝ်ႈ ထီႉ(1) ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး SSPP/ SSA လႆႈသိုပ်ႇသပ်းလႅင်းၼႄပိူင်ၵၢၼ်လၢႆးၵၢၼ်ပႃႇတီႇလႄႈ တပ်ႉသိုၵ်းသေ ၼင်ႇႁိုဝ်ၵူၼ်းၼုမ်ႇ တႆးၵူႈတီႈတီႈ ပေႃးတေမီးလွင်ႈမိုတ်ႈၵိုဝ်းၸမ်ၸႂ်ၵၼ်ၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆး၊ တပ်ႉ သိုၵ်းၸိုင်ႈတႆး တေၶတ်းၸႂ်သႂ်ႇႁႅင်းသေ ၶိုင်ပွင်ၵႂႃႇ ၼႆယူႇ။
ၼႂ်းဝၼ်းထီႉ-08.01.2020 ယၢမ်းႁူဝ်ၶမ်ႈ 6:00 မူင်း တေႃႇထိုင် ယၢမ်းၵၢင်ၶမ်ႈ 10:45 မူင်းၼၼ်ႉ ၽူႈယႂ်ႇၵူၼ်းလူင်ငဝ်ႈငုၼ်းလႄႈ ၸုမ်းၵူၼ်းၼုမ်ႇပိတ်ႉမၢၵ်ႇၼင်(14)ၸုမ်း လႆႈၵိၼ်ၶဝ်ႈသုမ်လီၵၼ် တီႈႁူင်းႁေႃးလူင် ၼွင်ငိုၼ်းၵႂႃႇသေ ၽူႈယႂ်ႇၵူၼ်းလူင်ငဝ်ႈငုၼ်း(SSPP/ SSA) လႆႈၸွႆႈထႅမ်ငိုၼ်း ၸႂ်ႉၸၢႆႇၵႃႈၸရိၵ်ႈတၢင်းၵႂႃႇမႃးပႆ တႃႇသၢင်ႉငိုၼ်းမၢၼ်ႈ ၸမ်(300)သႅၼ်ပျႃး ယူႇယဝ်ႉ။
