December 31,2019
By – SSPP/ SSA
ၼႂ်းလိူၼ်တီႇၸိမ်ႇပႃႇ 31 ဝၼ်း ပီႊ 2019 ၼီႊ ယၢမ်းၵၢင်ၼႂ် 8:30 မူင်း တေႃႇထိုင် ယၢမ်း 10:00 မူင်း ၼၼ်ႉ ၸုမ်းၵူၼ်းၼုမ်ႇ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSP/ SSA) ၸတ်း ႁဵတ်းပၢင်ၵုမ်လူင်မေႃသွၼ် ပီႊ 2019 ၼီႊ ဢွင်ႈတီႈႁူင်းႁဵၼ်းၽူႈမီးၸၼ်ႉငဝ်ႈငုၼ်း ၼႆယူႇ။
ၼႂ်းပၢင်ၵုမ်လူင်မေႃသွၼ်ၼႆႉ လႆႈၸတ်းႁဵတ်းၵႂႃႇ ၼႂ်းလိူၼ်တီႇၸိမ်ႇပႃႇ 29 ဝၼ်း တေႃႇထိုင် လိူၼ် တီႇၸိမ်ႇပႃႇ 31 ဝၼ်း ၶၢဝ်းတၢင်း(3)ဝၼ်းသေ ၼႂ်းပၢင်ၵုမ်လူင်ၼႆႉ မေႃသွၼ်ၸၢႆးလႄႈယိင်း ၶိုၼ်ႈ ႁွတ်ႈ(107)ၵေႃႉ ၼႆယူႇ။
ပၢင်ၵုမ်လူင်မေႃသွၼ် ပီႊ 2019 ၼီႊ ပဵၼ်ပၢင်ၵုမ်ပီႊသုတ်းလႄႈ မေႃသွၼ်းၸၢႆးလႄႈယိင်း ၸိူဝ်း ႁၢပ်ႇထၢမ်းၵၢၼ်သွၼ်ႁဵၼ်းလိၵ်ႈလၢႆး ၼႂ်းလၢႆလၢႆၸေႈဝဵင်း လႆႈႁူမ်ႈၵၼ်ၼပ်ႉသၢင်ႈထတ်းသၢင် လွင်ႈၶိုၼ်ႈယႂ်ႇ၊ လွင်ႈယူပ်ႈယွမ်း ဢၼ်လႆႈႁဵတ်းသၢင်ႈမႃးၼႂ်းပီႊ 2019 ၼီႊသေဢမ်ႇၵႃး လႆႈႁူမ်ႈ ၵၼ်ၼပ်ႉသၢင်ႈပႃးငဝ်းလၢႆးပေႃႈမႄႈလုၵ်ႈႁဵၼ်းလႄႈ လုၵ်ႈႁဵၼ်း ဢိၵ်ႇတင်းငဝ်းလၢႆးႁူင်းႁဵၼ်းလႄႈ လွၵ်းလၢႆးပူင်သွၼ်၊ တႃႇၽိူမ်ႉထႅမ်ပိင်ႇၺႃႇတၢင်းမေႃၵၢၼ်ႁႃၵိၼ်လဵင်ႉတွင်ႉ တႃႇလုၵ်ႈႁဵၼ်းၸၼ်ႉ သုင်ၸိူဝ်းၼႆႉၵႂႃႇယူႇ။
လိူဝ်ၼၼ်ႉ လႆႈဢွၼ်ၵၼ်တမ်းဝၢင်းၽႅၼ်ၵၢၼ်မိူဝ်းၼႃႈ တႃႇၵေႃႇသၢင်ႈႁူင်းႁဵၼ်းၸိူဝ်ႉၸၢတ်ႈ၊ တႃႇ သူၼ်းတုမ်ပေႃႈမႄႈၵူၼ်းမိူင်း ႁႂ်ႈမီးၼမ်ႉၸႂ်ပၼ်ႁႅင်းၵၢၼ်ႁဵၼ်းသွၼ်လိၵ်ႈလၢႆး၊ တႃႇၽိူမ်ႉထႅမ် ယုၵ်ႉမုၼ်းၼမ်ႉၵတ်ႉမေႃသွၼ် ၸိူဝ်းၼႆႉယူႇယဝ်ႉ။
ၼႂ်းလိူၼ်တီႇၸိမ်ႇပႃႇ 31 ဝၼ်း ပီႊ 2019 ၼီႊ ယၢမ်းၵၢင်ၼႂ် 8:30 မူင်းၼၼ်ႉ ၸွမ်ႁၢၼ်/ ၶုၼ်သႅင် ၵႅမ်ႁူဝ်ပဝ်ႈထီႉ(2) ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) လႆႈၶဝ်ႈ ႁူမ်ႈပၢင်ၵႅဝ်ႈဝၼ်းၵိုတ်းလိုဝ်ႈပၢင်ၵုမ်လူင်မေႃသွၼ်သေ မွၵ်ႈလၢတ်ႈၶေႃႈၵႂၢမ်းသူင်ႇသင်ႇပၼ်ႁႅင်း ၸႂ် မေႃသွၼ်ၵႂႃႇယူႇ။
ၸၢႆးႁိၼ်သႅင် ၵေႃႉပဵၼ်ၽူႈၵွၼ်းႁွင်ႈၵၢၼ်ၵူၼ်းၼုမ်ႇလၢတ်ႈဝႃႈ “ တေႇပီႊ 2014 ၼီႊ တေႃႇထိုင် ပီႊ 2019 ၼီႊၼႆႉ ႁဝ်းၶႃႈလႆႈၵေႃႇတင်ႈႁူင်းႁဵၼ်း ၼႂ်းၸေႈတွၼ်ႈမၢႆ(1,3,5,8) ၸိူဝ်းၼႆႉမႃးၶပ်ႉၶပ်ႉ တၢမ်းတၢမ်းသေ ဢဵၼ်ႁႅင်းမေႃသွၼ် ၸၢႆးယိင်း ဢၼ်လႆႈႁၢပ်ႇၵၢၼ်ဝႆႉမီးယူႇမွၵ်ႈ(107)ၵေႃႉသေ ၼႂ်းၼၼ်ႉမေႃသွၼ်ၸၢဝ်းၶိူဝ်းယၢင်းလမ်ၵေႃႈ ပႃးဝႆႉမွၵ်ႈ(10)ၵေႃႉပၢႆ။ တီႈႁူင်းႁဵၼ်းၵျွင်းမုၼ်ၸဝ်ႈ ဝၢၼ်ႈလူင်မူႉ၊ ဝၢၼ်ႈလွႆလွမ်ႉ၊ ဝၢၼ်ႈႁူၺ်ႈၵဵင် ၸေႈဝဵင်းတၢင်ႉယၢၼ်းလႄႈ ဝၢၼ်ႈပိင်ႈ ၸေႈဝဵင်းၵေး သီးၸိူဝ်းၼႆႉၵေႃႈ ႁဝ်းၶႃႈလႆႈၸွႆႈၽိူမ်ႉထႅမ်ဢဵၼ်ႁႅင်းမေႃသွၼ်မႃးယူႇၶႃႈ။ ပၢင်ၵုမ်ႁဝ်းၶႃႈ လႆႈႁဵတ်း မႃးၶၢဝ်းတၢင်း(3)ဝၼ်းသေ မေႃသွၼ်ႁဝ်းၶႃႈ လႆႈဢွၼ်ၵၼ်ၼပ်ႉသၢင်ႈတီႈၶိုၼ်ႈယႂ်ႇ၊ တီႈယူပ်ႈယွမ်း၊ တမ်းဝၢင်းၽႅၼ်ၵၢၼ်မိူဝ်းၼႃႈလႄႈ ၽိူမ်ႉထႅမ်ၸႅၵ်ႇမႅင်ႇ ၶိူင်ႈၵမ်ႉၵႅမ်တႃႇမေႃသွၼ် ၸိူဝ်းၼႆႉ” ၼႆ ယူႇ။
ၼႂ်းလိူၼ်တီႇၸိမ်ႇပႃႇ 31 ဝၼ်း ယၢမ်းႁူဝ်ၶမ်ႈ 6:00 မူင်းၼႆႉ ၸုမ်းမေႃသွၼ်ငဝ်ႈငုၼ်းပႃႇတီႇမႂ်ႇသုင် ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) တေမီးပၢင်ၵိၼ်ၶဝ်ႈသုမ်လီႁပ်ႉတွၼ်ႈပီႊမႂ်ႇလုမ်ႈၾႃႉ 2020 ၼီႊၵႂႃႇယူႇ။
ႁူင်းႁဵၼ်း ၼႂ်းၸေႈတွၼ်ႈမၢႆ(1,3,5,8) ဢၼ်လႆႈတေႇပိုတ်ႇမႃးၼႂ်းပီႊ 2016 ၼီႊ တေႃႇထိုင် ပီႊ 2019 ၼီႊၼႆႉ မီးဝႆႉၼႂ်းၼႃႈတီႈၸၢဝ်းၶိူဝ်း တႆး၊ ယၢင်းလမ်၊ လႃးႁူႇ၊ မႅၼ်း၊ ၶၢင်၊ လွႆ(ပလွင်ႈ) ၸိူဝ်းၼႆႉသေ ၼင်ႇႁိုဝ်ၵၢၼ်ပၢႆးပိင်ႇၺႃႇၸၢဝ်းၶိူဝ်း ပေႃႇတေၶိုတ်းၸၼ်ႉထၢၼ်ႈသုင်မႃးၼၼ်ႉ ယူႇတီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) တေသိုပ်ႇၶတ်းၸႂ်ၽေႃႇၼႄတူဝ်ၵႂႃႇ ပဵၼ်ၶၵ်ႉပဵၼ်တွၼ်ႈယူႇ။
