ၶၢဝ်ႇ-SSPP info
2019 November 28,
ပၢင်ၵႅဝ်ႈ ပၢင်ပွႆးႁပ်ႉၸဵင်ပီမႂ်ႇတႆး ၸတ်းႁဵတ်းတီႈၵွင်းမူးၶမ်းၵဵင်းလိူၼ်ၼၼ်ႉ လုင်းၸရေးထမ်ႇမ ဝၢၼ်ႈၶူင်ႈလူင် ဢိူင်ႇဝၢၼ်ႈၸၢတ်ႈ တၢင်ႇတူဝ်ၵူၼ်းမိူင်းသေ မွၵ်ႇလၢတ်ႈၶေႃႈၵႂၢမ်း တိူဝ်ႉယၢမ်မႅၼ်ႈ ၸွမ်းငဝ်းလၢႆးယၢမ်းလဵဝ်။
တီႈပၢင်ၵႅဝ်ႈၼၼ်ႉ ၸဝ်ႈသြႃႇ ဝိႁၢရ်ႇသူၼ်မွၼ်း မွၵ်ႇလၢတ်ႈပိုၼ်းၽဵင်ႈၵေႃႇၸဵင်၊ ၸဝ်ႈၶူး ဝိႁၢရ်ႇ ဝူၺ်ႇ ပုင်ႇလ ဝၢၼ်ႈႁႆး မွၵ်ႇလၢတ်ႈသပ်းလႅင်း ပိုၼ်းၵႅပ်ႈၸဝ်ႈၶူးမေႃလိၵ်ႈတႆး၊ ၸဝ်ႈသိုၵ်းလူင် ၵျေႃႇလႃႉ တၢင် တူဝ်ၵူၼ်းလူင် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးသေ လူဢၢၼ်ႇၽိုၼ်လိၵ်ႈ ဢၼ် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ယိုၼ်ႈထိုင်ဝၼ်းပၢင်ၵႅဝ်ႈလႄႈ လုင်းၸရေးထမ်ႇ မ ဝၢၼ်ႈၶူင်ႈလူင် တၢင်တူဝ်ၵူၼ်းမိူင်း မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ“ၵူၼ်းၼုမ်ႇဝၼ်းမိူဝ်ႈၼႆႉ ဢမ်ႇသူင်ႇ ထွမ်ႇၵႂၢမ်းတႆးပၢၼ်ၵဝ်ႇ၊ ၵႂၢမ်းပၢၼ်ၵဝ်ႇႁဝ်းၼႆႉ မၼ်းပဵၼ်ၽဵင်ႈဢၼ်ၶိုၵ်ႉၶႅမ်ႉ ၼႂ်းလုမ်ႈၾႃႉၼႆႉ ဢမ်ႇ မီးၵူၼ်းၶိူဝ်းလႂ်ႁဵတ်းလႆႈမိူၼ်တႆးႁဝ်း ၽဵင်ႈဢၼ်ၶိုၵ်ႉၶႅမ်ႉၼႆႉ ဢၼ်ပဵၼ်ၼေႃႇတႅၼ်းၶိူဝ်းႁဝ်းသမ်ႉ ဢမ်ႇသူင်ၸိုင် မိူဝ်းၼႃႈမႃး ၽဵင်ႈဢၼ်ၶိုၵ်ႉၶႅမ်ႉႁဝ်းၸၢင်ႈႁၢႆ၊ ၶိူဝ်းတႆးႁဝ်းၶႃႈၼႆႉ ပူႇမွၼ်ႇၼၢႆးယႃႈႁဝ်း လုၵ်ႉမိူင်းမုၼ်ႇၵူဝ်းလူင်းမႃးႁႃပၼ် တီႈယူႇတီႈသဝ်းႁဝ်း မီးဝၢၼ်ႈမီးမိူင်း မီးတီႈၽုၵ်ႇတီႈသွမ်ႈယဝ်ႉ ႁဝ်းဢမ်ႇႁၵ်ႉသႃ ဝႆႉပႅတ်ႈႁႄ ဢွၼ်ၵၼ်ၵႂႃႇမိူင်းထႆး ဢၼ်ၵႂႃႇမိူင်းထႆးၼၼ်ႉ တီႈလိၼ်ၼိုင်ႈသွၵ်ႇၼိုင်ႈ ဝႃးၵေႃႈဢမ်ႇပႅင်ႇ ၵွပ်ႈၼၼ် လူဝ်ႇဢွၼ်ၵၼ်မႃးလုမ်းလႃးပႂ်ႉပႃး ၼမ်ႉလိၼ်ႁိၼ်ၽႃဝၢၼ်ႈမိူင်းႁဝ်း ယဝ်ႉ၊ ပေႃးမႃးတူၺ်းႁူဝ်ၼပ်ႉၵူၼ်းတႆးႁဝ်းၵေႃႈ ဢေႇမႃးတိၵ်းတိၵ်း ၼၢင်းယိင်းၵေႃႈ ပေႃးမီးလုၵ်ႈ 2 ၵေႃႉယဝ်ႉၵေႃႈ တတ်းပႅတ်ႈ ၶႂ်ႈႁဵတ်းသၢဝ်ၸိူဝ်းၼႆႉ ဢမ်ႇလီပဵၼ် လူဝ်ႇလႆႈမီးလုၵ်ႈလၢင်း 5 ၵေႃႉၶိုၼ်ႈ ၼိူဝ်”ၼႆ သပ်းလႅင်းၵႂႃႇၵႂၢင်ႈၶႂၢင်ယူႇ။
တီႈပၢင်ပွႆးႁပ်ႉၸဵင် ဢၼ်လႆႈၸတ်းႁဵတ်းတီႈၵွင်းမူးၶမ်းၵဵင်းလိူၼ်ၼႆႉ ၸတ်းပႃး မၢႆၵိုမ်းဝၼ်ၵိူတ်ႇ ပီ ၵွၼ်းသႅင် မေႃၵႂၢမ်းတႆးပၢၼ်မႂ်ႇ ၸၢႆးသၢႆမၢဝ်းလႄႈ ပၢင်ပွႆးၵိုၼ်းလိူဝ်တိူဝ်းၵူႈပီပူၼ်ႉမႃးယူႇယဝ်ႉ။
