October 16,2019
By သႅင်ၸိုင်ႈ
ၼႂ်းလိူၼ်ဢွၵ်ႇတူဝ်ႇပႃႇ 14 ဝၼ်း ပီႊ 2019 ၼီႊ ယၢမ်းၵၢင်ၶိုၼ်း 11:30 မူင်းၼၼ်ႉ ၸဝ်ႈႁၢၼ် သၢႆႁုင်း(ႁွင်ႉ)လုင်းၸၢႆးၽေႇတၢၼ်း ဢႃႇယူႉ(74)ၶူပ်ႇ ၵေႃႉယၢမ်ႈပဵၼ်ၽူႈဢွၼ်ႁူဝ်လၢႆးလုၵ်ႉၽိုၼ်ႉ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) လႆႈၸပ်းတၢင်းပဵၼ် ယႃဢမ်ႇၶႅၼ်း ၸိုၼ်ႈလႆႈသေ လႆႈသဵင်ႈၵၢမ်ႇသုတ်းမုၼ်ၵႂႃႇ ဢွင်ႈတီႈႁိူၼ်းယေး တီႈဝၢၼ်ႈပၢင်ၼိဝ်ႉ၊ ဢိူင်ႇၼႃး ၵေႃႈ ၸေႈဝဵင်းသီႇပေႃႉ ဝႃႈၼႆ။
မိူဝ်ႈပီႊ 1962 ၼီႊ ၸဝ်ႈႁၢၼ် သၢႆႁုင်း(ႁွင်ႉ)ၸၢႆးၽေႇတၢၼ်း လႆႈၽၢတ်ႇယၢၼ်ႁူင်းႁဵၼ်း ၽၢတ်ႇ ယၢၼ်ႁိူၼ်းယေး မုင်ႉႁေႃႁိူၼ်းသေ လႆႈၶဝ်ႈႁၢပ်ႇထၢမ်းၵၢၼ်လၢႆးလုၵ်ႉၽိုၼ်ႉယိပ်းၵွင်ႈၵၢင်ႇၸိုင်ႈ တႆး ၼႂ်းတပ်ႉသိုၵ်းလွတ်ႉႈလႅဝ်းသဝ်းၶေႃၸိုင်ႈတႆး(SSIA) တေႃႇထိုင်ပေႃးၶွတ်ႇၽွတ်ႈပဵၼ်မႃး တပ်ႉ သိုၵ်းၸိုင်ႈတႆး(SSA) မိူဝ်ႈပီႊ 1964 ၼီႊ သေဢမ်ႇၵႃး ထိုင်ပၢၼ်ၶွတ်ႇၽွတ်ႇပူၵ်းတင်ႈပဵၼ်မႃး ပႃႇတီႇမႂ်ႇသုင်ၸိုင်ႈတႆး(SSPP) မိူဝ်ႈပီႊ 1971 ၼီႊၼၼ်ႉၵေႃႈ လႆႈသိုပ်ႇႁၢပ်ႇထၢမ်းၼႃႈၵၢၼ်မႃး ၶပ်ႉၶပ်ႉတၢမ်းတၢမ်း ၼႆယဝ်ႉ။
ၸဝ်ႈႁၢၼ် သၢႆႁုင်းၼႆႉ ၵမ်ႉပႃႈၼမ်လႆႈဢဝ်ပုၼ်ႈၽွၼ်းဢွၼ်ႁူဝ်ၸတ်းၵၢၼ်သိုၵ်းၶဝ်ႈပွႆးတိုၵ်းမႃး ပၢၼ်သိုပ်ႇပၢၼ်သေ မိူဝ်ႈပီႊ 1989 ၼီႊ မႅၼ်ႈမိူဝ်ႈတပ်ႉသိုၵ်းၸိုင်ႈတႆး(SSA) လႆႈဢဝ်ငမ်းယဵၼ် ၵၼ်တင်းလူင်ပွင်ၸိုင်ႈသိုၵ်းမၢၼ်ႈၼၼ်ႉၵေႃႈ ၼႂ်းၵေႃႇမတီႇဢွၼ်ႁူဝ်(7)ၵေႃႉၼၼ်ႉ လႆႈၶဝ်ႈပႃး ၵေႃႉၼိုင်ႈ ၼႆယဝ်ႉ။
မိူဝ်ႈပီႊ 2006 ၼီႊၼၼ်ႉ ဢိင်ၼိူဝ်ဢႃႇယူႉပၢႆးယူႇလီလႅၵ်ႈလၢႆႈၶၢႆႉယၢႆႉမႃးလႄႈ ၸဝ်ႈႁၢၼ် သၢႆႁုင်း လႆႈယွၼ်းၶႂၢင်ႉၵိုတ်းလိုဝ်ႈယူတ်းယႃတူဝ်တီႈႁိူၼ်းဝႆႉသေတႃႉ ၼမ်ႉၸႂ်လၢႆးလုၵ်ႉၽိုၼ်ႉ၊ ၼမ်ႉၸႂ် ႁၵ်ႉသႃၼိူဝ်ၸိူဝ်ႉၸၢတ်ႈဝၢၼ်ႈမိူင်း ဢမ်ႇႁူင်ႈႁၢႆပိူင်ႈပၢႆႈမႃးလႄႈ လႆႈထုၵ်ႇယုၵ်ႉယွင်ႈတၢင်ႇၽိုၼ် ၵိုၵ်းပိုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး ဢိၵ်ႇတင်းပိုၼ်းလၢႆးလုၵ်ႉၽိုၼ်ႉယိပ်းၵွင်ႈ ၵၢင်ႇၸိုင်ႈတႆး ၼႆယဝ်ႉ။
