October 17,2019
By – SSPP/ SSA
ၼႂ်းလိူၼ်ဢွၵ်ႇတူဝ်ႇပႃႇ 16 ဝၼ်း ပီႊ 2019 ၼီႊ ယၢမ်းၵၢင်ၼႂ် 9:00 မူင်းၼၼ်ႉ လုင်းဢွင်ႇပီး ဢႃႇယူႉ(62)ၶူပ်ႇလႄႈ လုင်းၵျေႃႇ ဢႃႇယူႉ(48)ၶူပ်ႇ ယူႇဝၢၼ်ႈပၢင်ႇသိမ်ႇ ဢိူင်ႇမိူင်းၸိတ်ႇ ၸေႈ ဝဵင်းသီႇပေႃႉ လႆႈၽိတ်းမေႃးထဵင်ထွင် ႁိမ်ၵၼ်ဢဝ်ၼမ်ႉၼႃးသေ ပေႃႉထုပ်ႉႁူဝ်ၵၼ်တႅၵ်ႇ ၼႆယူႇ။
မႅၼ်ႈမိူဝ်ႈလုင်းဢွင်ႇပီး ၵႂႃႇတူၺ်းၼမ်ႉၼႃးတီႈႁူဝ်ၽၢႆ ၼႂ်းၼႃးလုင်းၵျေႃႇ ဢၼ်မီးၽၢႆႇၸၢၼ်း ဝၢၼ်ႈပၢင်ႇသိမ်ႇ ယၢၼ်ၵႆဝၢၼ်ႈမွၵ်ႈ(5)ၵီႇလူဝ်ႇမီႇတႃႇၼၼ်ႉ လႆႈမီးလွင်ႈၽိတ်းမေႃးထဵင်ထွင်ၵၼ် တင်းလုင်းၵျေႃႇ လူၺ်ႈလွင်ႈတၢင်းႁိမ်ၵၼ်ၼမ်ႉၼႃးၼႆယူႇ။
မိူဝ်ႈလႆႈၽိတ်းမေႃးၵၼ်ၼၼ်ႉ လုင်းၵျေႃႇ လႆႈဢဝ်ၶွၼ်ႉမႆႉသၢင်း တၢင်းယၢဝ်းမီး(1)သွၵ်ႇပၢႆ ပေႃႉ ထုပ်ႉသႂ်ႇႁူဝ်လုင်းဢွင်ႇပီး တႅၵ်ႇလိူတ်ႇၵႂႃႇသေ ၸၢႆးၶမ်းၽိတ်ႈ ၵေႃႉပဵၼ်လုၵ်ႈၸၢႆးလုင်းၵျေႃႇ လႆႈ ၵႂႃႇႁၼ်ႁၢမ်ႈသီးပၢင်ၽိတ်းမေႃးၵၼ် ၼႆယဝ်ႉ။
မိူဝ်ႈၵႂႃႇႁၢမ်ႈသိမ်းၼၼ်ႉ ၸၢႆးၶမ်းၽိတ်ႈ မႆႈၸႂ်ၵူဝ်လုင်းဢွင်ႇပီး ဢဝ်ၽႃႉၽၼ်းလုင်းၵျေႃႇလႄႈ ၼႅတ်ႈသိမ်းဢဝ်ၽႃႉသေ လုၵ်ႉတီႈၼႂ်းၼႃး လႅၼ်ႈဢႅၼ်ႇမိူဝ်းလၢတ်ႈႁူဝ်ၼႃႈဝၢၼ်ႈပၢင်ႇသိမ်ႇ ၼႆ ယဝ်ႉ။ လုင်းဢွင်ႇပီး ၵေႃႉဢၼ်ႁူဝ်တႅၵ်ႇၼၼ်ႉ လႆႈယူတ်းယႃတူဝ်ဝႆႉ တီႈႁိူၼ်းလုင်းယုင်း ဝၢၼ်ႈ ပၢင်ႇသိမ်ႇ ၼႆယူႇ။
ၵဵဝ်ႇၵပ်းလူၺ်ႈ လွင်ႈဢမူႉၽိတ်းမေႃးၵၼ်ၼႆႉသေ ၽူႈမီးပုၼ်ႈၽွၼ်းၽၢႆႇဢုပ်ႉပိူင်ႇ(SSPP/ SSA) ၼႂ်းဢိူင်ႇမိူင်းၸိတ်ႇ တေႁပ်ႉပုၼ်ႈၽွၼ်းသေ ၵေႈလိတ်ႈၵၼ်ၵႂႃႇ ၼႆယဝ်ႉ။
