ၶၢဝ်ႇ- SSPP info
September(14)
ပၢင်သွၼ်ငဝ်ႈၶၢမ်ႇပိုၼ်ႉ ၵၢၼ်ၸႂ်ႉတိုဝ်းၶွမ်း(Computer) ၸုပ်ႈထီႉ(2) လႆႈပူင်သွၼ်ပၼ်လုၵ်ႈႁဵၼ်း ၶၢဝ်းတၢင်း ၼိုင်ႈလိူၼ်တဵမ်သေ လႆႈၸတ်းႁဵတ်းပၢင်ၵႅဝ်ႈ လူင်လိုဝ်ႈပၢင်ၵႂႃႇ တီႈႁွင်ႈၵၢၼ် Computer ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA) ဝၢၼ်ႈႁႆး ၸေႈဝဵင်းၵေႇသီႇ ၸိုင်ႈ တႆးပွတ်းၸၢၼ်း။
ဝၼ်းထီႉ 14.09.2019 ယၢမ်းဝၢႆးဝၼ်း 02:00 မူင်းၼၼ်ႉ ၸဝ်ႈႁၢၼ် ၽုင်းႁၢၼ် ဢွၼ်ႁူဝ်ၸတ်းႁဵတ်း ပၢင်ၵႅဝ်ႈလူင်းလိုဝ်ႈ ပၢင်သွၼ်ငဝ်ႈၶၢမ်ႇပိုၼ်ႉ ၵၢၼ်ၸႂ်ႉၶွမ်း(Computer)၊ ၸဝ်ႈသိုၵ်း ပႃႉထုၼ်း တၢင်တူဝ် ၵေႃႇမတီႇငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးတင်းသဵင်ႈသေ မွၵ်ႇလၢတ်ႈၶေႃႈၵႂၢမ်း ၵိုတ်းလိုဝ်ႈပၢင်သွၼ်ဝႃႈ“ၵၢၼ်လဵပ်ႈႁဵၼ်းၼႆႉ ႁဝ်းလဵပ်ႈႁဵၼ်းမႃးၶၢဝ်းတၢင်းၼိုင်ႈလိူၼ်ယဝ်ႉ မၼ်းတေ မေႃတင်းမူတ်းဢမ်ႇၸႂ်ႈလႄႈ တႃႇသိုပ်ႇလဵပ်ႈႁဵၼ်းၼၼ်ႉ မၼ်းၵိုတ်းတင်းၼမ်၊ လူဝ်ႇလႆႈသိုပ်ႇၶတ်း ၸႂ်လဵပ်ႈႁဵၼ်းၵႂႃႇတိၵ်းတိၵ်း၊ ယႃႇၵူဝ်ၶိူင်ႈၶွမ်းႁဝ်းလႅဝ်၊ တေလႆႈႁတ်းၸၢမ်းႁတ်းႁဵတ်း ၵဵဝ်ႇၵပ်း Software လႄႈ Hardware ၸိူဝ်းၼႆႉ သိုဝ်ႉဢဝ်လႆႈထႅင်ႈယူႇ၊ ပေႃးႁဝ်းၵူဝ်ၶိူင်ႈႁဝ်းလႅဝ်ၵေႃႈ ႁဝ်းတေဢမ်ႇႁူႉဢမ်ႇမေႃၼၼ်ႉယဝ်ႉ”ၼႆ ပၼ် ႁႅင်းလုၵ်ႈႁဵၼ်းၵႂႃႇယူႇယဝ်ႉ။
ၽူႈၵွၼ်းႁွင်ႈၵၢၼ် Computer ၸဝ်ႈႁၢၼ် ၽုင်းႁၢၼ်ၵေႃႈ မွၵ်ႇလၢတ်ႈၶေႃႈၵႂၢမ်းလူပ်းလင်ဝႃႈ“ဢၼ် ႁဝ်းလႆႈလဵပ်ႈႁဵၼ်းမႃးၼႆႉ မၼ်းပဵၼ်ငဝ်ႈၶၢမ်ႇပိုၼ်ႉၵူႈလွင်ႈလွင်ႈလႄႈ ႁဝ်းလူင်းပၢင်သွၼ်ယဝ်ႉၵေႃႈ ၵၢၼ် ၵပ်းသၢၼ်(Network)ႁဝ်းၼၼ်ႉ ယႃႇႁႂ်ႈမၼ်းၶၢတ်ႇသေဢမ်ႇၵႃး ၼင်ႇႁိုဝ်တေဢမ်ႇလိုမ်းၼၼ်ႉ လူဝ်ႇဢွၼ်ၵၼ်သိုပ်ႇလဵပ်ႈႁဵၼ်း ၵၢၼ်လဵပ်ႈႁဵၼ်းၼႆႉ တေလႆႈလဵပ်ႈႁဵၼ်းတေႃႇထဝ်ႈတေႃႇတၢႆလႄႈ ၸွမ်းၼင်ႇၼႃႈၵၢၼ်ပုၼ်ႈၽွၼ်းၽႂ်မၼ်းမီးၼၼ်ႉ ဢွၼ်ၵၼ်ၶတ်းၸႂ်ၵႂႃႇသေၵမ်း”ဝႃႈၼႆ ယူႇယဝ်ႉ။
ပၢင်သွၼ်ငဝ်ႈၶၢမ်ႇပိုၼ်ႉ ၵၢၼ်ၸႂ်ႉတိုဝ်းၶွမ်း (Computer)ၼႆႉ လႆႈဢဝ်ၽႃႇသႃႇ(7)ၽႃႇသႃႇ မိူၼ်ၼင်ႇ Hardware, Microsoft Word, Microsoft Publisher, Microsoft Excel, Copier&Printer, လၢႆးမႄး/လၢႆး ၵုမ်းထိင်းၶွမ်း, Adobe Photoshop လၢႆးတိုတ်ႉၸၼ်ႁၢင်ႈ ၸိူဝ်းၼႆႉ မီးမေႃသွၼ်ၽူႈလူင်ႉလႅၼ်ႇလွင်ႈ ၶွမ်း(Computer) (6)ၵေႃႉ ဢဝ်ပုၼ်ႈၽွၼ်းပူင်သွၼ်ပၼ် ၶၢဝ်းတၢင်းၼိုင်ႈလိူၼ်တဵမ်တဵမ်၊ မီးလုၵ်ႈႁဵၼ်း ၵူႈတပ်ႉၵူႈႁွင်ႈၵၢၼ် ပႃးၸဵမ်ၵူၼ်းမိူင်းၶိုၼ်ႈႁဵၼ်းဢဝ်(48)ၵေႃႉသေ လူင်း လိုဝ်ႈပၢင်သွၼ်ၵႂႃႇယူႇယဝ်ႉ။
