ၶၢဝ်ႇ-SSPP/SSA
2019 Agust(2)
ၽူႈမီးပုၼ်ႈၽွၼ်းၽၢႆႇဢုပ်ႉပိူင်ႇ တူင်ႉၼိုင်ၸွႆႈထႅမ်ပၼ်ႁႅင်းပၢႆးပိင်ႇၺႃႇ လုၵ်ႈဢွၼ်ႇ ၼင်ႇႁိုဝ်တေမီး ၼမ်ႉၸႂ်ၶႂ်ႈၶိုၼ်ႈႁဵၼ်းၼၼ်ႉ လႆႈလူင်းၸႅၵ်ႇပၼ်ပပ်ႉလုၵ်ႈႁဵၼ်း တီႈႁူင်းႁဵၼ်းသွၼ်လိၵ်ႈတႆးၶၢဝ်းပွတ်း တီႈဝၢၼ်ႈႁူဝ်လွၼ်ႊ ဢိူင်ႇ(19)ဝၢၼ်ႈ ၸေႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
ဝၼ်းထီႉ 1.8.2019 ယၢမ်းၵၢင်ၼႂ်း(07:00) ၵေႃႇမတီႇၸေႈဝဵင်းမၢႆ(14)SSPP/SSA တၢင်တူဝ်ၼႂ်း ၵေႃႇမတီႇၸေႈဝဵင်းသေ ၸွႆႈထႅမ်ၸႅၵ်ႇ ပၼ်ပပ်ႉႁဵၼ်းလိၵ်ႈတႆး ၸၼ်ႉငဝ်ႈ(19)ပပ်ႉ၊ ၸၼ်ႉၼိုင်ႈ(5)ပပ်ႉ၊ ၸၼ်ႉသွင်(12)ပပ်ႉ တႃႇလုၵ်ႈႁဵၼ်း(59)ၵေႃႉ တီႈႁူင်းႁဵၼ်းသွၼ်လိၵ်ႈတႆး ဝၢၼ်ႈႁူဝ်လွၼ်ႊၵႂႃႇယူႇယဝ်ႉ။ ဢၼ်ဢဝ်ပုၼ်ႈၽွၼ်း ပူင်သွၼ်ပၼ်လုၵ်ႈ ႁဵၼ်းၼၼ်ႉ မီးမေႃသွၼ် ၸၢႆး(2)ၵေႃႉလႄႈမေႃသွၼ်ယိင်း(1)ၵေႃႉ ပူင်သွၼ်ပၼ်သေ မီးလုၵ်ႈႁဵၼ်းၸၢႆး(22)ၵေႃႉလႄႈ လုၵ်ႈႁဵၼ်းယိင်း(37)ၵေႃႉ ၶိုၼ်ႈႁဵၼ်းသွၼ်လိၵ်ႈတႆးဝႆႉယူႇ ၼႆယဝ်ႉ။
ၵဵဝ်ႇၵၢၼ်ပၢႆးပိင်ႇၺႃႇၼႆႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးၵေႃႈ လႆႈတမ်း ဝၢင်းၽႅၼ်ၵၢၼ် ဢၼ်ၶိုၵ်ႉတွၼ်းဢၼ်ၼိုင်ႈသေ ပူၵ်းပွင်ၸွႆႈထႅမ်ၵႂႃႇ ၵႃႈၼင်ႇယိုၼ်းထိုင် ႁူႉ/ငိၼ်း လႆႈၼၼ်ႉယူႇယဝ်ႉ။ ဢၼ်လုၵ်ႉတီႈငဝ်ႈငုၼ်းႁပ်ႉပုၼ်ႈၽွၼ်း ႁူဝ်တေႃႇတိၼ်သေ ပူၵ်းပွင်ၸွႆႈထႅမ်ဝႆႉ လုၵ်ႈဢွၼ်ႇၸၢႆး/ယိင်း(600)ၵေႃႉပၢႆ ၸိူဝ်းဢူႈမႄႈမီးတၢင်းယၢပ်ႇ တႃႇၵမ်ႉၸွႆႈၶိုၼ်ႈႁူင်းႁဵၼ်းၼၼ်ႉ ဢဝ်ဢၢပ်ႈပၼ်တီႈမုၵ်ႉၸုမ်းလူင် SSPP/SSA သေ ၸွႆႈထႅမ်ပူၵ်းပွင်ဝႆႉတီႈ ႁူင်းႁဵၼ်းၼေႃႇတႅၼ်းၶိူဝ်း ဢၼ်ပိုတ်ႇၶဝ်ႈတၢင်းၵၢၼ် တီႈပၢင်သဝ်းငဝ်ႈငုၼ်း SSPP/SSA(ဝၢၼ်ႈႁႆး) တူင်ႇဝဵင်းၵေးသီး ၸိုင်ႈတႆး ပွတ်းၸၢၼ်းၵေႃႈ မီးဝႆႉယူႇယဝ်ႉ။
