2019 August(19)
By- ႁိူၼ်းၶႃး
ၵူၼ်းၼုမ်ႇလၢႆဢိူင်ႇ ၼႂ်းတူင်ႇဝဵင်းသီႇပေႃႉ ဢွၼ်ၵၼ်ၶိုၼ်ႈလဵပ်ႈႁဵၼ်း သၽႃႇဝႃႉ ၼမ်ႉလိၼ်ႁိၼ်ၽႃ ၼိူဝ်သၼ်လွႆၶိူဝ်း ဢၼ်တၢင်းသုင်မီး(6000)ထတ်းပၢႆၼၼ်ႉ ၵႂႃႇယူႇယဝ်ႉ။
ဝၼ်းထီႉ 17.8.2019 ယၢမ်းၵၢင်ၼႂ် 0930 မူင်းၼၼ်ႉ ၸၢႆးမၢဝ်းၶိူဝ်းႁၢၼ် ဢွၼ်ႁူဝ် မုၵ်ႉၸုမ်းၵူၼ်းၼုမ်ႇ တႆး ဝဵင်းသီႇပေႃႉ၊ ၼမ်ႉလၼ်ႈ၊ လႃႈသဵဝ်ႈ၊ ၼွင်ႈၵေႃႈ၊ သီႇထွၵ်ႈ၊ ဢိူင်ႇမိူင်းၶိူဝ်း ၸိူဝ်းၼႆႉ ႁူမ်ႈႁႅင်းၵူၼ်း (43)ၵေႃႉ ၶိုၼ်ႈလဵပ်ႈႁဵၼ်း ၾိင်ႈယူႇသဝ်းၵိၼ်သၢင်ႈ ၵူၼ်းမိူင်းဢၼ်ၸိူဝ်းယူႇၼိူဝ်သၼ်လွႆၶိူဝ်းသေ လဵပ်ႈႁဵၼ်းပႃး သၽႃႇဝႃႉၼမ်ႉလိၼ်ႁိၼ်ၽႃၸွမ်းသၼ်လွႆလႄႈ လဵပ်ႈႁဵၼ်းပႃးတီႈလွႆၵွင်းထၢတ်ႈ ဝၢၼ်ႈမွၼ်း သၼ်လွႆၶိူဝ်းၼၼ်ႉၵႂႃႇယူႇ။
မီးယိူင်းဢၢၼ်းၸိူင်ႉႁိုဝ်လႄႈ လႆႈပၼ်ၶၢဝ်းယၢမ်းသေ ၶိုၼ်ႈလဵပ်ႈႁဵၼ်းၼၼ်ႉတႄႉ ဢမ်ႇလႆႈတွင်ႈ ထၢမ် ၸိူဝ်းၽူႈၶဝ်ႈၸုမ်းသေတႃႉ ၾိင်ႈၵူၼ်းၼုမ်ႇၼႆႉ တိုၼ်းၶႂ်ႈသွတ်ႇႁူႉသွတ်ႇႁၼ် ဢၼ်ပဵၼ်တႄႉ မီးတႄႉလႄႈ ၵူၼ်းတီႈတူင်ႈၶႂ်ႈႁူႉလွင်ႈယူႇၵိၼ်ၵူၼ်းယူႇၸွမ်းသၼ်လွႆ ၵူၼ်းသၼ်လွႆၶႂ်ႈႁူႉလွင်ႈယူႇ ၵိၼ်ၵူၼ်းယူႇသဝ်းတီႈတူင်ႈၼႆၼၼ်ႉ ပဵၼ်သၽႃႇဝႃႉၵူၼ်းၼုမ်ႇယဝ်ႉၼႆ ထတ်းသၢင်မႅၼ်ႈၼင်ႇၼႆ။
