ၶၢဝ်ႇ-SSPP/SSA
2019 August (19)
ၽူႈၸတ်းၵၢၼ်ၸေႈဝဵင်းမၢႆ(10) ၸေႈတွၼ်ႈမၢႆ(4) SSPP/SSA ႁဵတ်းၵၢၼ်ထိင်းသိမ်းထိူၼ်ႇၶိူဝ်းပႃႇမႆႉ ဝႆႉပဵၼ်ၵၢၼ်လူင်သေ ၵူတ်ႇထတ်းတီႉၺွပ်း ၵူၼ်းလၵ်ႉၽၼ်းထိူဝ်လိူဝ်ႈမႆႉၶၢႆ ၼႂ်းၼႃႈတီႈ ၸေႈဝဵင်း သီႇပေႃႉ ၸိုင်ႈတႆးပွတ်းႁွင်ႇ။
ဝၼ်းထီႉ 18.8.2019 ယၢမ်း 08:00 မူင်းၵၢင်ၼႂ်ၼၼ်ႉ ႁူဝ်သိုၵ်း ၸၢႆးၶိူဝ်း ဢွၼ်ႁူဝ်ႁူမ်ႇလူမ်ႈၸေႈဝဵင်း မၢႆ(10) 7ၵေႃႉသေ ၵႂႃႇတီႉမတ်ႉၵူၼ်းလၵ်ႉၽၼ်းထိူဝ်လိူဝ်ႈမႆႉၶၢႆ တီႈဝၢၼ်ႈၵွင်းႁုင်း(ၶူဝ်ႉၶႃႉ) ဢိူင်ႇတူၼ်ႈၵႅင်း ၼၼ်ႉလႆႈတီႉၺွပ်း ၸၢႆးၵမ်ႇ ဢႃႇယူႉ(20)ၶူပ်ႇ ယူႇဝၢၼ်ႈၵွင်းႁုင်း၊ ၸၢႆးလၢဝ် ဢႃႇယူႉ(21)ၶူပ်ႇ ယူႇဝၢၼ်ႈ ၵွင်းႁုင်း၊ ၸၢႆးပီး ဢႃႇယူႉ(28)ၶူပ်ႇ ယူႇဝၢၼ်ႈၵွင်းႁုင်း၊ သၢင်ႇမူး ဢႃႇယူႉ(41)ၶူပ်ႇ ယူႇဝၢၼ်ႈၵွင်းႁုင်း ၶဝ်(4)ၵေႃႉၼႆႉ ၵွပ်ႈပူၼ်ႉပႅၼ်လၵ်းမၢႆ ထိင်းသိမ်းထိူၼ်ႇၶိူဝ်းပႃႇမႆႉ လႄႈလႆႈတီႉၺွပ်းဢဝ်သႂ်ႇၶွၵ်ႈၶင်ဝႆႉသေ ၸွမ်းၼင်ႇပိူင်ၵၢၼ်မီးၼၼ်ႉ တေပၼ်တူတ်ႈတၢမ်ႇၵႂႃႇယူႇ ယဝ်ႉ။
ၵၢၼ်ထိင်းသိမ်းထိူၼ်ႇၶိူဝ်းပႃႇမႆႉ ၼႂ်းၼႃႈတီႈ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၵုမ်းၵမ် ယိုၼ်းထိုင်လႆႈၼၼ်ႉ ပေႃးဢမ်ႇလႆႈၶႅပ်းဝႂ်တီႈ ၵႅမ်ႁူဝ်ပဝ်ႈထီႉ-1 လႄႈၽူႈၸတ်းၵၢၼ်ဢုပ်ႉပိူင်ႇငဝ်ႈ ငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးၸိုင် တိုၼ်းဢမ်ႇမီးသုၼ်ႇလႆႈၽၼ်းထိူဝ်လိူဝ်ႈမႆႉ လႃးလႃးၼႆ တႅပ်းတတ်းဝႆႉယူႇယဝ်ႉ။
ၵၢၼ်ထိင်းသိမ်းထိူၼ်ႇၶိူဝ်းပႃႇမႆႉၼႆႉ တေလႆႈထိင်းဝႆႉၸိူဝ်းဢၼ်မီးဝႆႉၵူၺ်းဢမ်ႇၵႃး တေလႆႈမီးၽႅၼ် ၵၢၼ်ၽုၵ်ႇသွမ်ႈတူၼ်ႈမႆႉ ၵႃႈၼင်ႇပွင်ပဵၼ်လႆႈၼႆၵေႃႈ လုၵ်ႉတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉ သိုၵ်းၸိုင်ႈတႆး လႆႈၸီႉၸမ်ႈပၼ်သဵၼ်ႈတၢင်းဝႆႉယူႇယဝ်ႉ။
