August 5 ,2019
By – သႅင်ၸိုင်ႈ
မိူဝ်ႈဝႃးၼႂ်းလိူၼ်ေဢႃးၵၢတ်ႉ 4 ဝၼ်း ပီႊ 2019 ၼီႊ ယၢမ်း 9:30 မူင်း ေတႃႇ ယၢမ်း 10:30 မူင်းၼႆႉ ၽၢႆႇ ၵူတ်ႇထတ်းၽဵဝ်ႈမူၺ်ႉယႃႈမဝ်းၵမ် ၼႂ်းတပ်ႉငဝ်ႈသိုၵ်း(909) ပႃႈတႂ်ႈၵုမ်းၵမ် ငဝ်ႈငုၼ်းပႃႇတီႇမႂ်ႇသုင်ၸုိင်ႈ တႆး၊ တပ်ႉသိုၵ်းၸိုင်ႈတႆး(SSPP/ SSA) လႆႈလူင်းၵူတ်ႇထတ်း တီႉၺွပ်းၵူၼ်းၵိၼ်ၶၢႆယႃႈမဝ်းၵမ် ၼႂ်းပိုၼ်ႉ တီႈေသ လႆႈဢဝ်တူဝ်မႃးၵုမ်းၶင်ဝႆႉ တီႈၶွၵ်ႈၶင်ေၸႈဝဵင်းဝၢၼ်ႈႁႆး ဝႃႈၼႆ။
ၽူႈဢုပ်ႉပိူင်ႇေၸႈဝဵင်း ဝဵင်းမႂ်ႇဝၢၼ်ႈႁႆး ဢွၼ်ႁူဝ်ၸုမ်းၵူတ်ႇထတ်းၽဵဝ်ႈမူၺ်ႉယႃႈမဝ်းၵမ် ၼႂ်းတပ်ႉငဝ်ႈ သိုၵ်း(909)ေသ လူင်းၵူတ်ႇထတ်းၽူႈၵဵဝ်ႇၶွင်ႈယႃႈမဝ်းၵမ် ၼႂ်းဢိူင်ႇၶုမ်ႇပၢင် ေၸႈဝဵင်းေၵးသီး၊ ဢိူင်ႇဝၢၼ်ႈ ေသႃႉ ေၸႈဝဵင်းမိူင်းသူႈ၊ ဢိူင်ႇတူယႃး ေၸႈဝဵင်းမူိင်းၼွင် ၸိူဝ်းၼႆႉေသ ၼႂ်းၵၢၼ်လူင်းၵူတ်ႇထတ်း ယႃႈ မဝ်းၵမ်ပွၵ်ႈၵမ်းၼႆႉ တီႉၺွပ်းလႆႈ ၽူႈၵဵဝ်ႇၶွင်ႈယႃႈမဝ်းၵမ် ႁူမ်ႈသဵင်ႈၸၢႆး (6)ေၵႃႉ၊ ယႃႈမႃႉႁူမ်ႈသဵင်ႈ (1,383)မဵတ်ႉၼႆယဝ်ႉ။
ၽူႈၸိူဝ်းၵဵဝ်ႇၶွင်ႈယႃႈမဝ်းၵမ် ဢၼ်ထုၵ်ႇတီႉၺွပ်းတူဝ်မႃးၼႆႉ ၽူႈမီးပုၼ်ႈၽွၼ်းၽၢႆႇၵူတ်ႇထတ်းၽဵဝ်ႈ မူၺ်ႉယႃႈမဝ်းၵမ် လႆႈပၼ်ပိုၼ်ႉႁူႉ သပ်းလႅင်းႄၼ ၽွၼ်းလီၽွၼ်းၸႃႉ ယႃႈမဝ်းၵမ်ၵႂႃႇေသ မိူဝ်းၼႃႈမႃး ယႃႇေပႁႂ်ႈၵဵဝ်ႇၶွင်ႈထႅင်ႈ ၼႆယဝ်ႉ။ ၵၢၼ်ၽဵဝ်ႈမူၺ်ႉယႃႈမဝ်းၵမ်ၼႆႉ ယူႇတီႇငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး လႆႈပၼ်ေၶႃႈပူင် ႁႂ်ႈလူင်းၵူတ်ႇထတ်း ၼႂ်းၵူႈတပ်ႉၵူႈႁွင်ႈၵၢၼ်ႄလႈ ၼႂ်းၵူႈေၸႈဝဵင်း ၵူႈေၸႈတွၼ်ႈ ၼႆယဝ်ႉ။
