August 12,2019
By – မွၵ်ႇၶမ်းၶူင်း
ၼႂ်းလိူၼ်ဢေႃးၵၢတ်ႉ 12 ဝၼ်း ၶၢဝ်းယၢမ်း 8 မူင်း တေႃႇထိုင် 9 မူင်းၼႆႉ ႁွင်ႈၵၢၼ်ၶွမ်ႇပိဝ်ႇတႃႇ ငဝ်ႈငုၼ်း(Headquater’s Computer Department )လႆႈၸတ်းႁဵတ်းပၢင်ပိုတ်ႇၽုၺ်ႇငဝ်ႈၶၢမ်ႇပိုၼ်ႉ လၢႆးၸႂ်ႉတိုဝ်းၶွမ်ႇပိဝ်ႇတႃႇ ၸုပ်ႈထီႉ(2) တီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/ SSA) ဝႃႈၼႆ။
ၽူႈၶိုၼ်ႈႁွတ်ႈပၢင်လဵပ်ႈႁဵၼ်းပွၵ်ႈၼႆႉ ၸၢႆးယိင်းႁူမ်ႈသဵင်ႈမီး(38)ၵေႃႉသေ ၸွမ်းၼင်ႇၶပ်ႉမၢႆမီး ၼၼ်ႉ လႆႈဢွၼ်ၵၼ်တၵ်ႉယမ်ၸွမ်ပိဝ်၊ ၼပ်ႉယမ်ၽူႈႁတ်းႁၢၼ်လုၵ်ႉၽိုၼ်ႉလႄႈ သိုပ်ႇမိုတ်ႈတူဝ် ၵႂႃႇ ၼႆယဝ်ႉ။
ၸဝ်ႈသိုၵ်း ပႃႉထုၼ်း ၽူႈၼမ်းၼႂ်းထီႉ(3) လႆႈၶူၼ်ႉၶႆႈၼႄ ပိုၼ်းၵၢၼ်ႁဵၼ်းသွၼ်ၶွမ်ႇပိဝ်ႇတႃႇ ဢၼ်လႆႈလတ်းၽၢၼ်ႇမႃး ၼႂ်းၵႄႈလွင်ႈယၢပ်ႇၽိုတ်ႇ တေႇပၢၼ်တပ်ႉၸုမ်း(1) တေႃႇထိုင်ယၢမ်း လဵဝ်သေ တိုၵ်းသူၼ်းပၼ်ႁႅင်း ႁႂ်ႈလုၵ်ႈႁဵၼ်း ဝႆႉၼမ်ႉၼၵ်းၵႃႈၶၼ်ၼိူဝ် တိုဝ်ႉတၢင်းသုၼ်ႇလႆႈ ၵၢၼ်ႁဵၼ်းသွၼ်လႄႈ ႁႂ်ႈလဵပ်ႈႁဵၼ်းႁူႉႁၼ်ပႃး ပိုၼ်းတႆး၊ ပိုၼ်းလၢႆးလုၵ်ႉၽိုၼ်ႉ၊ ပိုၼ်းမိူင်းႁူမ်ႈတုမ်၊ ပိုၼ်းၸဵပ်းသၢင်ႈလူၺ်ႈၵၢၼ်မိူင်း ၵၢၼ်သိုၵ်း ဢိၵ်ႇတင်းၶေႃႈယိူင်းဢၢၼ်းၵၢၼ်ၸိူဝ်ႉၸၢတ်ႈၸိူဝ်း ၼႆႉ ဝႃႈၼႆ။
“ ပေႃးမေႃဝႆႉၼမ်ႉၼၵ်းၵႃႈၶၼ်ၼိူဝ် ၵၢၼ်ႁဵၼ်းသွၼ် ဢိၵ်ႇတင်းပိုၼ်းၵူႈပၢႆးပၢႆးယဝ်ႉၸင်ႇ ၸဝ်ႈၵဝ်ႇတေပဵၼ်မႃး ၽူႈၵေႃႉဢၼ်ႁၢပ်ႇထၢမ်းၼႃႈၵၢၼ်ၸိူဝ်ႉၸၢတ်ႈလႆႈတဵမ်တဵမ်ထူၼ်ႈထူၼ်ႈ တေဢမ်ႇမိူၼ်ၵူၼ်းၵိၼ်ၸၢင်ႈ ႁဵတ်းၵၢၼ်ၼႂ်းၶွမ်ႇပၼ်ႇၼီႇ” ၼႆယဝ်ႉ။
သိုပ်ႇၼၼ်ႉ ၸဝ်ႈႁၢၼ် ၽုင်းႁၢၼ် ၵေႃႉပဵၼ်ၽူႈၵွၼ်းႁွင်ႈၵၢၼ်ၶွမ်ႇပိဝ်ႇတႃႇငဝ်ႈငုၼ်းလၢတ်ႈဝႃႈ “ ႁႂ်ႈမေႃႁူႉၵႃႈၶၼ်တိုဝ်ႉတၢင်းလီ ဢၼ်ငဝ်ႈငုၼ်းႁဝ်းၶႃႈ ၸတ်းသၢင်ႈႁဵတ်းပၼ်ပၢင်သွၼ်၊ မိူဝ်ႈပၢၼ် ၶႃႈႁဝ်းလႆႈၵႂႃႇၶိုၼ်ႈ ၶွမ်ႇပိဝ်ႇတႃႇၵေႃးလဵၵ်ႉၼၼ်ႉ ပေႃးၾႆးၾႃႉမႃး ၶွမ်းဢမ်ႇလီ ပေႃးၶွမ်းလီၾႆး ၾႃႉသမ်ႉဢမ်ႇမႃး ၶိူင်ႈၵႅမ်မိုဝ်းၵေႃႈဢမ်ႇတဵမ်ထူၼ်ႈ လႆႈတေႃႇသူႈတၢင်းယၢပ်ႇၽိုတ်ႇသေ ၵႂႃႇသွၼ် ႁဵၼ်းဢဝ်ၽၢႆႇၼွၵ်ႈၽွင်ႈ။ ၵွပ်ႈၼၼ်တိုၵ်းသူၼ်ထိုင် ၽူႈလဵပ်ႈႁဵၼ်းႁဝ်းၶဝ်ၵူႈၵေႃႉ ႁႂ်ႈမေႃဝႆႉၵႃႈ ၶၼ်ၶၢဝ်းယၢမ်းသေ လဵပ်ႈႁဵၼ်းၵႂႃႇ တေႃႇပၢင်သွၼ်ႁဝ်းၶႃႈပေႃးယဝ်ႉတူဝ်ႈဢွင်ႇမၢၼ် ” ၼႆယဝ်ႉ။
ၽူႈၵွၼ်းႁွင်ႈၵၢၼ်ၶွမ်ႇပိဝ်ႇတႃႇ သိုပ်ႇလၢတ်ႈဝႃႈ “ ၼႂ်းၶၢဝ်းဝၼ်းမိူဝ်းၼႃႈၼၼ်ႉၵေႃႈ ၵၢၼ်ပူင်သွၼ် လဵပ်ႈႁဵၼ်းၶွမ်ႇပိဝ်ႇတႃႇၼႆႉ ဢိင်ၼိူဝ်ငဝ်းလၢႆးၵူႈၽၢႆႇၽၢႆႇသေ တေသိုပ်ႇၶတ်းၸႂ်ႁဵတ်းသၢင်ႈၵႂႃႇ ၽဵၼ်ႈၽဵၼ်ႈ၊ ယၢမ်းလဵဝ်လႆႈယိုၼ်ႁပ်ႉၽူႈလဵပ်ႈႁဵၼ်း ဢၼ်ဢိူမ်ႈၸမ်ငဝ်ႈငုၼ်းၸိူဝ်းၼႆႉသေ ပိုတ်ႇ ပၢင်သွၼ်ၵႂႃႇၼႆသေတႃႉ မိူဝ်းၼႃႈမႃးၵေႃႈ ယိူင်းၽႅၼ်ဝႆႉ တေယိုၼ်ႁပ်ႉႁွင်ႉဢဝ်ၽူႈလဵပ်ႈႁဵၼ်း ၼႂ်းၽၢႆႇဢုပ်ႉပိူင်ႇ၊ ၽၢႆႇတပ်ႉလႄႈ ၼႂ်းႁွင်ႈၵၢၼ် ဢိၵ်ႇတင်းၼႂ်းပေႃႈမႄႈၵူၼ်းမိူင်းၸိူဝ်းၼႆႉသေ ပိုၼ်ႇပၢင်သွၼ်ၵႂႃႇယူႇ” ၼႆယဝ်ႉ။
