SSPP/SSA
2019 July(7)
ၽူႈၸတ်းၵၢၼ်ၸေႈဝဵင်းမၢႆ(25) SSPP/SSA ဢွၼ်ႁူဝ်ၸတ်းႁဵတ်းပၢင်လိူၵ်ႈတင်ႈ တၢင်ႇၽူႈ ၵွၼ်းဢိူင်ႇ တီႈဝတ်ႉႁူမ်ႈယဵၼ်သီႇထွၵ်ႈ ဢိူင်ႇသီႇထွၵ်ႈ ၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ဝၼ်းထီႉ 6.7.2019 ယၢမ်း(10:00)ၵၢင်ၼႂ် တေႃႇယၢမ်း(04:00)မူင်းတၢမ်းၶမ်ႈၼၼ်ႉ ၽူႈမီးပုၼ်ႈၽွၼ်း ၵေႃႇမတီႇဝၢၼ်ႈ၊ ၸုမ်း၊ ဢိူင်ႇ ၼႂ်းဢိူင်ႇသီႇထွၵ်ႈ ဢွၼ် ၵၼ်ၸတ်းႁဵတ်းပၢင်လိူၵ်ႈတင်ႈ တၢင်ႇၽူႈၵွၼ်း ဢိူင်ႇ၊ မီးၽူႈၶၢမ်ႇလိူၵ်ႈတင်ႈ(9)ၵေႃႉ၊ ပေႃႈမႄႈၵူၼ်းမိူင်း ၼႂ်းဢိူင်ႇသီႇထွၵ်ႈတင်းသဵင်ႈ ၸိူဝ်းမီးသုၼ်ႇ လႆႈပၼ်ၶႅပ်းၵၢင်ၸႂ် ၸဵမ်ယိင်းၸဵမ်ၸၢႆး(789)ၵေႃႉ ၶိုၼ်ႈႁွတ်ႈယူႇယဝ်ႉ။
တီႈၼႂ်းပၢင်လိူၵ်ႈတင်ႈၼၼ်ႉ လုင်းၵႃႇလိင်ႇ ဝၢၼ်ႈၵိုတ်ႈ လႆႈမၢႆဝၢၵ်ႈ(285)ဝၢၵ်ႈ လႆႈၼမ်လိူဝ်ပိူၼ်ႈ ပဵၼ် ၽူႈၵွၼ်းဢိူင်ႇ၊ လုင်းသႃႇဢေး ဝၢၼ်ႈၼမ်ႉႁူၵ်း လႆႈမၢႆဝၢၵ်ႈ(227)ဝၢၵ်ႈ လႆႈၼမ်ထီႉ(2)ပဵၼ်ၵႅမ်ၽူႈၵွၼ်း ဢိူင်ႇ၊ ပဵၼ်မၢႆထွၼ်(2)ၵေႃႉ လိူဝ်ၼၼ်ႉပဵၼ်ၽူႈၶဝ်ႈပႃးၵေႃႇမတီႇဢိူင်ႇ တႃႇဢွၼ်ႁူဝ်ၼမ်းၼႃႈ ပေႃႈမႄႈၵူၼ်းမိူင်း ၼႂ်းဢိူင်ႇသီႇထွၵ်ႈၵႂႃႇယူႇယဝ်ႉ။
ၵဵဝ်ႇၵပ်းပၢင်လိူၵ်ႈတင်ႈ တၢင်ႇၽူႈၵွၼ်းဢိူင်ႇၼႆႉသေ လုင်းၵႃႇလိင်ႇၵေႃႉထုၵ်ႇလိူၵ်ႈပဵၼ် ၽူႈၸတ်း ၵၢၼ်ဢိူင်ႇလၢတ်ႈၼႄဝႃႈ“ပၢင်လိူၵ်ႈတင်ႈၼႆႉ မိူၼ်လၢႆးလူင်ပွင်ၸိုင်ႈၶဝ်ႁဵတ်း ၼၼ်ႉယူႇ၊ မီးပုင်းၵဝ်ႈပုင်း ၶႃႈတႄႉဢမ်ႇလႆႈၵႂႃႇတူၺ်း၊ ၵွပ်ႈပဵၼ်ၵၢင်ၸႂ်ၵူၼ်းမိူင်း ႁၼ်လီၵမ်ႉထႅမ်လိူၵ်ႈတၢင်ႇၶႃႈ ႁဝ်းလႄႈ ၶႃႈႁဝ်းၵေႃႈတေၶတ်းၸႂ်ႁဵတ်းၵၢၼ်လီၵႂႃႇယူႇ၊ သင်ဝႃႈၵူၼ်းမိူင်းဝႃႈ ဢမ်ႇၵိုင်ႇပဵၼ်ယဝ်ႉၵေႃႈ ၶႃႈႁဝ်းတေထွႆတူဝ်လီလီၵူၺ်း”လၢတ်ႈၼႄၼင်ႇၼႆယူႇ။
လွင်ႈလိူၵ်ႈတၢင်ႇၽူႈဢွၼ်ႁူဝ် ဝၢၼ်ႈ၊ ၸုမ်း၊ ဢိူင်ႇၼႆႉ တီႈၼႂ်းပိူင်ၵၢၼ်ဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈ တႆး တပ်ႉသိုၵ်းၸိုင်ႈတႆးၵေႃႈ သပ်းလႅင်းၸႅင်ႈၼႄဝႃႈ “ၸူဝ်ႈၶူပ်ႇ(ဢႃႇယူႉ)ၵေႃႇမတီႇဢိူင်ႇၼႆႉ တႄႇႁႅၵ်ႈဝၼ်း လိူၼ်၊ ပီႊ ဢၼ်လိူၵ်ႈတၢင်ႇၶွတ်ႇၽွတ်ႈၼၼ်ႉၵႂႃႇသေ ပေႃးၸူဝ်ႈၶူပ်ႇ(ဢႃႇယူႉ)တဵမ် ၼိုင်ႈပီႊယဝ်ႉ တေလႆႈၶိုၼ်းလိူၵ်ႈၵဵပ်းထႅင်ႈ”ၼႆယူႇယဝ်ႉ။၊
