ၶၢဝ်ႇ-SSPP/SSA
2019 July (27)
တပ်ႉငဝ်ႈသိုၵ်း(918)လႄႈၽၢႆႇဢုပ်ႉပိူင်ႇ ၸေႈတွၼ်ႈမၢႆ(1) SSPP/SSA ဢိၵ်ႇပႃးၽူႈမီးပုၼ်ႈၽွၼ်း ၼႂ်း ၵူၼ်းမိူင်း ႁူမ်ႈၵၼ်ၵူတ်ႇထတ်းတီႉၺွပ်း ၵူၼ်းသူႇ/ သမ်း/ ၵိၼ်/ ၶၢႆ ယႃႈမဝ်းၵမ် ဢမ်ႇၵိုတ်းဢမ်ႇလိုဝ်ႈ လိူဝ်တိူဝ်းၵူတ်ႇထတ်းႁၢဝ်ႉႁႅင်း ၼႂ်းတူင်ႇၸေႈဝဵင်းမိူင်းသူႈ ၸိုင်ႈတႆးပွတ်းၸၢၼ်း။
ဝၼ်းထီႉ 26.7.2019 ၼၼ်ႉ ယူႇတီႈၽူႈၵွၼ်းတပ်ႉၸုမ်း(702) တပ်ႉငဝ်ႈသိုၵ်း(918) ဢွၼ်ႁူဝ်ၽၢႆႇတပ်ႉ၊ ၽၢႆႇဢုပ်ႉပိူင်ႇလႄႈ ၽူႈမီးပုၼ်ႈၽွၼ်း ဝၢၼ်ႈ/ ၸုမ်း/ ဢိူင်ႇ ၼႂ်းၸေႈဝဵင်းမၢႆ(3)၊ ၸေႈဝဵင်းမၢႆ(7)သေ လူင်းၵူတ်ႇထတ်းတီႉၺွပ်း ၵူၼ်းၵဵဝ်ႇၶွင်ႈယႃႈမဝ်းၵမ် ၼႂ်းဢိူင်ႇတွင်ႁဵဝ်း ၼႃႈတီႈၸေႈဝဵင်းမၢႆ(7)SSPP/SSA လႄႈဢိူင်ႇၼွင်ဢႅပ်း ၼႃႈတီႈၸေႈဝဵင်းမၢႆ(3)SSPP/SSA တီႉလႆႈၵူၼ်းၶၢႆယႃႈမဝ်းၵမ်(4)ၵေႃႉ(ပဵၼ်ၼၢင်းယိင်း)၊ ၺွပ်းလႆႈၵူၼ်းသူႇ/ သမ်း/ ၵိၼ် ယႃႈမဝ်းၵမ် (4)ၵေႃႉ(ၸၢႆး) ၸိူဝ်းၼႆႉလႆႈဢဝ်လိူင်ႈၵၢၼ်သႂ်ႇၶွၵ်ႈၶင်ဝႆႉယူႇယဝ်ႉ။
ၵၢၼ်တူင်ႉၼိုင်ၵူတ်ႇထတ်းၵူၼ်းၵဵဝ်ႇၶွင်ႈယႃႈမဝ်းၵမ်ၼႆႉ ၼႂ်းၼႃႈတီႈတပ်ႉငဝ်ႈသိုၵ်း(918)ၵူၺ်းဢမ်ႇ ၵႃး တူင်ႇသိုပ်ႇယႃႈမဝ်းၵမ် ၵွင်ႉၵၢႆႇၵႂႃႇမီးတီႈလႂ်ၵေႃႈ တိူဝ်းၶႂၢၵ်ႈတီႉၺွပ်းၸွမ်း လူၺ်ႈဢမ်ႇမၵ်းတတ်း ၼႃႈတီႈသေ ႁဵတ်းသၢင်ႈတူင်ႉၼိုင်မႃးယူႇယဝ်ႉ။
ၵဵဝ်ႇၵၢၼ်ၽဵဝ်ႈမူၺ်ႉယႃႈမဝ်းၵမ်ၼႆႉ ၸွမ်းလူၺ်ႈၶေႃႈပိုၼ်ၽၢဝ်ႇ ၵေႃႇမတီႇၽဵဝ်ႈမူၺ်ႉယႃႈမဝ်းၵမ် ပိုၼ်ၽၢဝ်ႇဢွၵ်ႇဝၼ်းထီႉ 25.7.2019 ၼၼ်ႉ ၵူႈၼႃႈတီႈ တိုၼ်းတေလႆႈတူင်ႉၼိုင် ႁဵတ်းၵၢၼ်ၽဵဝ်ႈ မူၺ်ႉယႃႈမဝ်းၵမ်ၵႂႃႇ၊ ၵူၼ်းၸိူဝ်းတီႉၺွပ်းလႆႈဝႆႉၼၼ်ႉ ၸွမ်းၼင်ႇပိူင်ၵၢၼ်ၽဵဝ်ႈမူၺ်ႉယႃႈမဝ်းၵမ် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးမီးၼၼ်ႉ တေတႅပ်းတတ်းတြႃးပၼ်တူတ်ႈတၢမ်ႇ ၸွမ်းၼင်ႇတၢင်းၽိတ်း ၼၵ်း/မဝ် ၽႂ်မၼ်းၼၼ်ႉယူႇယဝ်ႉ။
