ၢဝ်ႇ-SSPP/SSA
2019 July(23)
ၽၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး(SSPP/SSA) ႁဵတ်းၵၢၼ်ၽေႃႇၼမ်ႉၼႄ တူဝ် ပိူင်ၵၢၼ်ၽဵဝ်ႈမူၺ်ႉယႃႈမဝ်းၵမ် ၼႂ်းၼႃႈတီႈၽႂ်မၼ်း ၸိူဝ်းတူင်ႉၼိုင်ႁွတ်ႈၽႅဝ်ၼၼ်ႉ ၵူတ်ႇ ထတ်းတီႉၺွပ်းဢဝ်လိူင်ႈၵၢၼ် ဢမ်ႇထၢတ်ႇဢမ်ႇဝၢႆးယူႇယဝ်ႉ။
ဝၼ်းထီႉ 19.7.2019 ယၢမ်း(15:00)မူင်း ၽၢႆႇဢုပ်ႉပိူင်ႇၼႃႈတီႈၸေႈဝဵင်းမၢႆ(9) ႁူမ်ႈၵၼ်တင်း ၽၢႆႇတပ်ႉ တပ်ႉငဝ်ႈသိုၵ်း(999) သေ ၵႂႃႇၵူတ်ႇထတ်းတီႉၺွပ်း ၵူၼ်းၵိၼ်ၶၢႆယႃႈမဝ်းၵမ် တီႈဝၢၼ်ႈၼမ်ႉပူၵ်ႇ ဢိူင်ႇ ပႃႇၵၢင်း ၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၵူတ်ႇထတ်းတီႉၺွပ်းလႆႈယႃႈမႃႉ တီႈၸၢႆးပၢင်ႇ ဢႃႇယူႉ (36)ၶူပ်ႇ ၸိုဝ်ႈဢူႈမႄႈ လုင်းၼူၵ်ႉ+ပႃႈမၢတ်ႈ တီႈယူႇၼွင်ယႃႉ ဢိူင်ႇဝၢၼ်ႈပုင်ႇၸေႈဝဵင်းမိူင်းယႆၼၼ်ႉ (977)မဵတ်ႉလႄႈၶိူင်ႈသူႇယႃႈမႃႉလႄႈၶိူင်ႈသူႇယႃႈလမ်သေ လႆႈဢဝ်လိူင်ႈၵၢၼ် ၸွမ်းၼင်ႇပိူင်ၵၢၼ်မီး ၼၼ်ႉယူႇယဝ်ႉ။
ဝၼ်းထီႉ 21.7.2019 ၵေႃႉမတီႇၸေႈဝဵင်းမၢႆ(10)SSPP/SSA လႄႈတပ်ႉႁူမ်ႇလူမ်ႈၸေႈဝဵင်း ၵႂႃႇၵူတ်ႇ ထတ်းတီႉၺွပ်း လုင်းသေႃးၼ ဢႃႇယူႉ(43)ၶူပ်ႇ ဢူႈမႄႈ ၶိင်းမျႃႉ+ၼၢႆးမၼ်ႈ တီႈယူႇဝၢၼ်ႈလွႆငိုၼ်း ဢိူင်ႇမိူင်းၸိတ်ႇ ၸေႈဝဵင်းမိူင်းယႆၼၼ်ႉ ယွၼ်ႉၶၢႆယႃႈမႃႉ ၸွမ်းၼင်ႇလၵ်းထၢၼ်လႄႈလွင်ႈယွမ်းႁပ်ႉ ၽူႈမီးတၢင်းၽိတ်းၼၼ်ႉ လႆႈဢဝ်လိူင်ႈၵၢၼ်ၸွမ်းၼင်ႇပိူင်ၵၢၼ်မီးယူႇယဝ်ႉ။
ၼႂ်းၼႃႈတီႈတပ်ႉငဝ်ႈသိုၵ်း(918)SSPP/SSA လႄႈၼႃႈတီႈၸေႈတွၼ်ႈမၢႆ(1) ၸေႈဝဵင်းတၢင်ႉ၊ ၸေႈဝဵင်းမိူင်းသူႈၵေႃႈ ၽၢႆႇတပ်ႉလႄႈၽၢႆႇဢုပ်ႉပိူင်ႇ ဢိၵ်ႇပႃးၽူႈမီးပုၼ်ႈၽွၼ်း ဝၢၼ်ႈ၊ ၸုမ်း၊ ဢိူင်ႇ ႁူမ်ႈၵၼ်သေ ၵူတ်ႇထတ်းၵူၼ်းၵဵဝ်ႇၶွင်ႈယႃႈမဝ်း ၵမ်ႁၢဝ်ႉႁၢဝ်ႉႁႅင်းႁႅင်းယူႇယဝ်ႉ။
