July 29, 2019
By – သႅင်ၸုိင်ႈ
ၼႂ်းဝၼ်းတီႈလိူၼ်ၸူႇလၢႆႇ 28 ဝၼ်း ပီႊ 2019 ၼီႊၼႆႉ ေၵႃႇမတီႇၽဵဝ်ႈမူၺ်ႉယႃႈမဝ်းၵမ် တပ်ႉငဝ်ႈ သိုၵ်း(918) ပႃႈတႂ်ႈၵုမ်းၵမ် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸုိင်ႈတႆး(SSPP/ SSA) လူင်းၵူတ်ႇ ထတ်းတီႉၺွပ်းၽူႈၸိူဝ်းၵဵဝ်ႇၶွင်ႈယႃႈမဝ်းၵမ် ၼႂ်းေၸႈဝဵင်းမိူင်းသူႈ ၸိုင်ႈတႆးပွတ်းၸၢၼ်း ဝႃႈၼႆ။
ၸုမ်းၽူႈမီးပုၼ်ႈၽွၼ်းၽၢႆႇၵူတ်ႇထတ်းယႃႈမဝ်းၵမ် ဢၼ်ၶဝ်ႈပႃးၽၢႆႇတပ်ႉ၊ ၽၢႆႇဢုပ်ႉပိူင်ႇ ဢိၵ်ႇၵူၼ်းမိူင်း ႁူမ်ႈမိုဝ်းၵၼ်ၼၼ်ႉ လႆႈၵူတ်ႇထတ်းႁၼ် ၵူၼ်းၵိၼ်ၶၢႆယႃႈမဝ်းၵမ် ၼႂ်းပိုတ်ႉတီႈ ႁူမ်ႈသဵင်ႈမီးၸၢႆး(13)ေၵႃႉ ၼႆယဝ်ႉ။ ၼႂ်းၼၼ်ႉ ၵူၼ်းဝၢၼ်ႈလွႆယွင်း ၸၢဝ်းၶိူဝ်းလွႆႄလႈ ၸၢဝ်းၶိူဝ်းယၢင်းလမ် ၸိူဝ်းဢၼ်ၵိၼ်ယႃႈ မဝ်းၵမ်မီး(10)ေၵႃႉ၊ ၵူၼ်းဝၢၼ်ႈလွႆယွင်း ပဵၼ်ၸၢဝ်းၶိူဝ်းလွႆၼင်ႇၵဝ်ႇ ေၵႃႉဢၼ်ၶၢႆယႃႈမဝ်းၵမ်မီး(1)ေၵႃႉ ႄလႈ ၵူၼ်းဝၢၼ်ႈၼွင်ႁီႈ(1)ေၵႃႉ ဢိၵ်ႇတင်းၵူၼ်းသိုၵ်းၼႂ်းတပ်ႉၵွင်(1)ေၵႃႉ ၼႆယူႇ။
ၽူႈၸိူဝ်းၵိၼ်ၶၢႆယႃႈမဝ်းၵမ် ဢၼ်ထုၵ်ႇဢဝ်လိူင်ႈၵၢၼ်တိၺွပ်းမႃးၼႆႉ ၵမ်ႉၼမ်ပဵၼ်ၽူႈၸၢႆးဢႃႇယု (30)ၶူပ်ႇ ေတႃႇထိုင်ဢႃႇယု(50)ၶူပ်ႇေသ ၸွမ်းၼင်ႇပၵ်းပိူင်မီးၼၼ်ႉ ေတဢဝ်လိူင်ႈၵၢၼ်ပၼ်တၢမ်ႇ၊ ပၼ်ပိုၼ်ႉႁူႉ ႁႂ်ႈေမႃၸႅၵ်ႇေၽ ၽွၼ်းႁၢႆႉၸႃႉ ယႃႈမဝ်ႈၵမ်ၵႂႃႇ ၼႆယဝ်ႉ။
ၸွမ်းလူၺ်ႈေၶႃႈႁွင်ႉသႅၼ်ႇလုမ်ႈၾႃႉမီးဝႆႉ “ ယႃႈမဝ်းၵမ်ဢမ်ႇဢွၼ်လီ ၸၢင်ႈဢဝ်ၶိူဝ်းၵူၼ်းႁၢႆ” ၼႆ ၼၼ်ႉေသ ယူႇတီႈပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆးေၵႃႈ လႆႈၶတ်းၸႂ်သႂ်ႉႁႅင်း ႄႁႉႁၢမ်ႈပၼ် ပိုၼ်ႉႁူႉ ၽွၼ်းႁၢႆႉၸႃႉယႃႈမဝ်းၵမ်မႃး တၢင်းၼမ်ေသဢမ်ႇၵႃး လႆႈလူင်းၵူတ်ႇထတ်း ႁဵတ်းၵၢၼ်ထူပ်း မိုဝ်းၽဵဝ်ႈမူၺ်ႉယႃႈမဝ်းၵမ်မႃးေၵႃႈ မီးမႃးလၢႆပွၵ်ႈလၢႆၵမ်းယူႇယဝ်ႉ။
