ၶၢဝ်ႇ-SSPP/SSA
2019 July(29)
ယွၼ်ႉဢမ်ႇမေႃဝႆႉဝၢင်း ႁႂ်ႈတူၵ်းမႅၼ်ႈလႄႈ လုၵ်ႉတီႈၾႆးသႅင်လႅတ်ႇ(ၾႆးသူဝ်ႇလႃႇ)ၼၼ်ႉသေ ၾႆးမႆႈႁိူၼ်းၵူၼ်းဝၢၼ်ႈၼႃးလွႆ ဢိူင်ႇႁၢင်ၼႃး ၸေႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ဝၼ်းထီႉ 28.7.2019 ယၢမ်းဝၢႆးဝၼ်း 13:00 မူင်းၼၼ်ႉ ၾႆးမႆႈႁိူၼ်း လုင်းထုၼ်း+ပႃႈယိင်းၸၢမ်ႇ မိူဝ်ႈၽွင်းၸဝ်ႈႁိူၼ်းၵႂႃႇၵၢၼ် ဢမ်ႇမီးၵူၼ်းယူႇတီႈႁိူၼ်း၊ ၵူၼ်းဝၢၼ်ႈဢွၼ်ၵၼ်ၸွႆႈႁူတ်းၾႆးလႄႈ ထိုင်ယၢမ်း 13:30 မူင်းၼၼ်ႉ ၾႆးၸင်ႇမွတ်ႇ၊ ၶူဝ်းႁိူၼ်းၽိူၼ်ဝၢၼ်ႇ ဢၼ်မီးၼႂ်းႁိူၼ်းၼၼ်ႉ ဢမ်ႇတၼ်းလႆႈလႄႈ ၵႃႈၶၼ်ၶူဝ်းၶွင်ဢၼ်သုမ်းၼၼ်ႉ ဢမ်ႇယွမ်း(80)သႅၼ်ပျႃး ဝႃႈၼႆ။
ႁိူၼ်းလုင်းထုၼ်း+ပႃႈယိင်းၸၢမ်ႇၼႆႉ ပဵၼ်ႁိူၼ်းသုင်ယူင်ႉမႆႉ မုင်းလဵၵ်း၊ ၵင်ႈၽၢၵ်ႈ၊ သိူဝ်ႇၽၢၵ်ႈ ယွၼ်ႉၾႆးသႅင်လႅတ်ႇသွတ်ႉလႄႈ ၾႆးလၢမ်းမႆႈႁိူၼ်းလႆႈႁူႉၼင်ႇၼႆ။ လုင်းထုၼ်း+ပႃႈယိင်းၸၢမ်ႇၼႆႉ မီးလုၵ်ႈလၢင်း(3)ၵေႃႉ လႆႈႁူႉၼင်ႇၼႆ။
ဢိင်ၼိူဝ်ၵၢပ်ႈပၢၼ်ဢၼ်ၶိုတ်းၵၢပ်ႈမႃးလႄႈ တီႈဢၼ်ဢမ်ႇမီးၾႆးၾႃႉၼၼ်ႉ ဢွၼ်ၵၼ်သိုဝ်ႉၾႆးသႅင် လႅတ်ႇသေတႆႈၾႆး၊ ၸိူဝ်းႁဵတ်းႁႂ်ႈမီးၸၼ်ႉသေၸႂ်ႉႁုင်ၶဝ်ႈၽၵ်း၊ ၸႂ်ႉတူႈယဵၼ်၊ ၽတ်ႉလူမ်းၸိူဝ်းၼႆႉ ၵေႃႈ ႁဵတ်းလႆႈမႃးသေ ၸိူဝ်းဢမ်ႇပွင်ပဵၼ်လႆႈၸၼ်ႉႁႂ်ႈၸႂ်ႉႁုင်ၶဝ်ႈၽၵ်းလႆႈၼၼ်ႉ ၼင်ႇႁိုဝ်တေမီးၾႆး လႅင်းၸိူင်ႉပိူၼ်ႈၵေႃႈ သိုဝ်ႉၸႂ်ႉသိုဝ်ႈၽႂ်မၼ်းမႃးၵူႈဝၢၼ်ႈ ၵူႈတီႈၵူႈတၢင်းယူႇယဝ်ႉ။
