ၶၢဝ်ႇ-SSPP/SSA
2019 July(21)
သင်ႇၶႃႇၸဝ်ႈ (19)ၵျွင်း ၼႂ်းတူင်ႇဝဵင်းၼမ်ႉလၼ်ႈ ဢွၼ်ႁူဝ်ၼမ်းၼႃႈ ပေႃႈမႄႈၵူၼ်းမိူင်းၼႂ်းပိုၼ်ႉတီႈ သေ ၸတ်းႁဵတ်းပွႆးယၢတ်ႇၼမ်ႉ သဵၼ်ႈတၢင်းမိူင်းၶိူဝ်း-ၼမ်ႉလၼ်ႈ ဢၼ်ငဝ်ႈငုၼ်းပႃႇတီႇမႂ်ႇသုင်ၸိုင်ႈ တႆး တပ်ႉသိုၵ်းၸိုင်ႈတႆးSSPP/SSA လူႇတၢၼ်းတွပ်ႇၵုင်ႇပေႃႈမႄႈၵူၼ်းမိူင်း တၢင်းၵႆ(10)လၵ်း လႆႈလူႇတၢၼ်းယၢတ်ႇၼမ်ႉ တီႈဝၢၼ်ႈၼႃးလိူဝ်ႇ ၼႂ်းတူင်ႇဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ဝၼ်းထီႉ 21.7.2019 ယၢမ်းၵၢင်ၼႂ်(6)မူင်း သင်ႇၶႃႇၸဝ်ႈ(19)ၵျွင်း ၶွၼ်ႈတုမ်ၵၼ်တီႈ ၼမ်ႉႁူးၵျွင်းလူင် သေ သုတ်ႇထမ်းဝၢၼ်းပရိၵ်ႈ ႁႂ်ႈၵူၼ်းၵႂႃႇမႃးၼိူဝ်ႈသဵၼ်ႈတၢင်းလွတ်ႈၽေး၊ ႁႂ်ႈဝၢၼ်ႈမိူင်းၵတ်းယဵၼ် လွတ်ႈၶဵၼ်ၵူႈယိူင်ႈ လုၵ်ႉၼမ်ႉလၼ်ႈတေႃႇထိုင် မူၺ်ႇတေႃႇမိူင်းၶိူဝ်း သင်ႇၶႃႇလႄႈပေႃႈမႄႈၵူၼ်းမိူင်း ပႂ်ႉႁပ်ႉလူႇတၢၼ်း တီႈဝၢၼ်ႈၼွင်ဝၼ်း ပႃႇသၵ်း၊ တီႈဝၢၼ်ႈၼႃးလိူဝ်ႇ၊ တီႈမိူင်းၶိူဝ်း ၸိူဝ်းၼႆႉၶဝ်ႈႁူမ်ႈ ဢမ်ႇယွမ်း 500 ၵေႃႉပၢႆ။
ဢိင်ၼိူဝ်ၶေႃႈမႅတ်ႉတႃႇသင်ႇၶႃႇၸဝ်ႈသေ သဵၼ်ႈတၢင်းလုၵ်ႉၼမ်ႉလၼ်ႈ လတ်းၽၢၼ်ႇ ဝၢၼ်ႈၵုင်း သႃႇ၊ ဝၢၼ်ႈဢုင်းသီး၊ ဝၢၼ်ႈၵုင်းၸူင် တေႃႇထိုင် ဝၢၼ်ႈၼႃးလိူဝ်ႇၼၼ်ႉ ၶၢဝ်းႁိုဝ်ႉၶၢဝ်းႁႅင်ႈ ၵူၼ်းမိူင်းၵႂႃႇမႃးယၢပ်ႇၼႆလႄႈ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ႁဵတ်းပဵၼ်ငဝ်ႈတႃႇၼ သဵၼ်ႈတၢင်း၊ ၵုမ်ႇမၼီႇသၢမ်လႅင်းၶမ်း ႁပ်ႉပုၼ်ႈၽွၼ်းၵေႃႇသၢင်ႈ တႄႇဝၼ်းထီႉ 21.5.2019 တေႃႇ ဝၼ်းထီႉ 20.7.2019 ၼႆႉယဝ်ႉတူဝ်ႈလီငၢမ်းသေ ငိုၼ်းသဵင်ႈ-60,405,000 သႅၼ်ပျႃး၊ ပဵၼ်သဵၼ်ႈ တၢင်းသိူဝ်ႇသၢႆးၵျၢမ်းၼၼ်ႉယူႇယဝ်ႉ။
