ၶၢဝ်ႇ-SSPP/SSA
2019 July(21)

ပေႃႈမႄႈၵူၼ်းမိူင်းလႄႈၽၢႆႇတပ်ႉ၊ ၽၢႆႇဢုပ်ႉပိူင်ႇ ႁူမ်ႈၵၼ်ၵူတ်ႉထတ်း တိုၵ်းၽဵဝ်ႈၵူၼ်းသူႇ၊ သမ်း၊ ၶၢႆ ယႃႈမဝ်းၵမ် ၼႃႈတီႈတပ်ႉငဝ်ႈသိုၵ်း (918)SSPP/SSA ၵေႈၵၢင်ၸေႈဝဵင်းမိူင်းသူႈ၊ ၸေႈဝဵင်းတၢင်ႉ ယၢၼ်း ၸိုင်ႈတႆးပွတ်းႁွင်ႇ။

ဝၼ်းထီႉ 11.7.2019 ယူႇတီႈၵႅမ်ၽူႈၵွၼ်းတပ်ႉငဝ်ႈသိုၵ်း 918 ၸဝ်ႈသိုၵ်းလူင် ၸေႃးမိူင်း ဢွၼ်ႁူဝ် ၽူႈၵွၼ်းတပ်ႉလုၵ်ႈတပ်ႉ ဢိၵ်ႇ ပႃးၽူႈမီးပုၼ်ႈၽွၼ်းၼႂ်းပေႃႈမႄႈၵူၼ်းမိူင်းသေ ႁူမ်ႈၵၼ်ၵူတ်ႇထတ်း ၵူၼ်းၵဵဝ်ႇၶွင်ႈယႃႈမဝ်းၵမ် ႁၢဝ်ႉႁၢဝ်ႉႁႅင်းႁႅင်းယူႇယဝ်ႉ။ ၽူႈမီးပုၼ်ႈၽွၼ်းၶဝ်ႈပႃးတူင်ႉၼိုင်ၸွမ်းၵေႃႉ ၼိုင်ႈလၢတ်ႈဝႃႈ“ၵၢၼ်ဢၼ်ၼႆႉ မၼ်းမိူၼ်ၼင်ႇႁဝ်းၶဝ်ႈပၢင်တိုၵ်းပၢင်ၼိုင်ႈယူႇ၊ ဢၼ်ဢမ်ႇႁၢၼ်ႉ ၸႂ်သေ တေၶႂ်ႈတွပ်ႇတႅၼ်းၶိုၼ်းၵေႃႈ တိုၼ်းတေလႆႈၽၢင်ႉယူႇ၊ ဢၼ်ဢဝ်လၢႆးႁၢႆႉသေတွပ်ႇတႅၼ်း ၵေႃႈမီး”ဝႃႈၼႆ။ ၸိူဝ်းဢၼ်ဢမ်ႇယွမ်းႁပ်ႉ လွင်ႈၵဵဝ်ႇၶွင်ႈယႃႈမဝ်းၵမ်ၼၼ်ႉ လႆႈၸႅတ်ႈယဵဝ်ႈ ဢဝ်လိူင်ႈ ၵၢၼ်ၵႂႃႇယူႇယဝ်ႉ။

ၵူၼ်းဝၢၼ်ႈၼႂ်းဢိူင်ႇၼွင်ဢႅပ်း ၵေႃႉၼိုင်ႈလၢတ်ႈၼႄဝႃႈ“ဢၼ်တီႉၺွပ်းၵူၼ်းၵဵဝ်ႇၶွင်ႈယႃႈမဝ်းၵမ် မိူဝ်ႈလဵဝ်ၼႆႉ လီတႄႉတႄႉ၊ တေႃႈလဵဝ်ဝၢၼ်ႈပေႃးယဵၼ်ယဝ်ႉ မၢင်းၸိူဝ်းၵေႃႈထုၵ်ႇၺွပ်းၵႂႃႇ၊ မၢင်ၸိူဝ်း ၵေႃႈတိုၵ်ႉပၢႆႈလွတ်ႈဝႆႉယူႇ၊ ပေႃးဢမ်ႇႁဵတ်းၸိူင်ႉၼႆတႄႉ ၵူၼ်းမိူင်းႁဝ်းတေပႃးၵၼ်လူႉမူတ်းယဝ်ႉ၊ မၢင်တီႈၼၢင်းယိင်းၵေႃႈမေႃၵိၼ်မႃးယဝ်ႉလႄႈ ပဵၼ်ဢၼ်လီၵူဝ်တႄႉတႄႉ”ဝႃႈၼႆ။

တီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးၵေႃႈ တမ်းဝၢင်းၽႅၼ်ၵၢၼ်သေ ဢမ်ႇၵႃးၼႃႈ တီႈတပ်ႉငဝ်ႈသိုၵ်း 918 ၵူၺ်း၊ ၵူႈၼႃႈတီႈၸိူဝ်းပဵၼ်ၼႃႈတီႈဢုပ်ႉပိူင်ႇပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ယိုၼ်းထိုင်လႆႈၼၼ်ႉ တိုၼ်းတေတိုၵ်းၽဵဝ်ႈၵႂႃႇ ၸွမ်းၼင်ႇပိူင်ၵၢၼ်တမ်းဝၢင်းမီး ဝႆႉၼၼ်ႉယူႇၼႆ ၼႂ်းၸုမ်းၽူႈၼမ်းၼႂ်း SSPP/SSA ၵေႃႉၼိုင်ႈလၢတ်ႈၼင်ႇၼႆ။