ၶၢဝ်ႇ-SSPP/SSA
2019 Jun (2)
ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸိူဝ်းလႆႈႁပ်ႉၶေႃႈသင် လူင်းတူင်ႉၼိုင်ၼႂ်းပိုတ်ႉတီႈ ႁဵတ်းသၢင်ႈၵၢၼ်ၸွႆႈထႅမ်ၵူၼ်းမိူင်း ၼႂ်းပိုၼ်ႉတီႈ ႁွတ်ႈၽႅဝ်ၽႂ်မၼ်း။
ဝၼ်းထီႉ 29.5.2019 တေႃႇဝၼ်းထီႉ 31.5.2019 ၽူႈၵွၼ်းတပ်ႉငဝ်ႈသိုၵ်း 999 လႆႈပၼ်ပုၼ်ႈ ၽွၼ်းၼႂ်းၵေႃႇမတီႇ ၸေႈဝဵင်းမၢႆ(17) ဢွၼ်ႁူဝ်တဵင်ၽၢႆ ၼမ်ႉၵၢင်ၶုမ်ႈ ဢၼ်မီးၸဵင်ႇႁွင်ႇဝၼ်းဢွၵ်ႇ ဝၢၼ်ႈပဵင်းၼိမ်၊ ယၢၼ်ၵႆဝၢၼ်ႈပဵင်းၼိမ်(1)လၵ်း ႁႂ်ႈပဵၼ်ၼမ်ႉၵိၼ်ၼမ်ႉၸႂ်ႉ ၵူၼ်းဝၢၼ်ႈပဵင်းၼိမ် ဢၼ်မီးလင်ႁိူၼ်း(22)လင်ၼၼ်ႉၵူၺ်းဢမ်ႇၵႃး ႁႂ်ႈပေႃးၸႂ်ႉပႃးတႃႇ ဝၢၼ်ႈပၢင်ၶမ်း ဢၼ်မီး လင်ႁိူၼ်း(84)လင်ၼၼ်ႉၵွၼ်ႇ။
ဝၼ်းထီႉ 1.6.2019 ယၢမ်း(07:00)ၵၢင်ၼႂ် ၽူႈၸတ်းၵၢၼ်ၸေႈဝဵင်းမၢႆ(17) တၢင်တူဝ်ငဝ်ႈငုၼ်း SSPP/SSA သေ ဢွၼ်ႁူဝ်ပူၵ်းသဝ်ႁူင်းႁဵၼ်းမႂ်ႇ တီႈဝၢၼ်ႈပဵင်းၼိမ် ဢိူင်ႇမိူင်းယဵၼ် ၸေႈဝဵင်းၼမ်ႉ တူႈ ၸိုင်ႈတႆးပွတ်းႁွင်ႇ။
ၼႂ်းပီႊ 2019 ၼီႈၼႆႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸွႆႈထႅမ်ငိုၼ်း တႃႇၵေႃႇသၢင်ႈႁူင်းႁဵၼ်း(4)လင် ၼႂ်းထုင်ႉမိူင်းယဵၼ် ၸေႈဝဵင်းၼမ်ႉတူႈ ပႃးတီႈဝၢၼ်ႈပဵင်းၼိမ်၊ ယိူင်းဢၢၼ်းႁႂ်ႈပဵၼ် ၵၢၼ်ႇပူၵ်းပွင်ပၢႆးပိင်ႇၺႃႇ ဝၢၼ်ႈၼွၵ်ႈ ၼႃးပၢင်ႇဝႃႈၼႆ။
ၽူႈမီးပုၼ်ႈၽွၼ်း ၽၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၵေႃႉၼိုင်ႈ လၢတ်ႈၼႄဝႃႈ“ပေႃးၽၵ်းတူ ႁူင်းႁဵၼ်းဢိုတ်းၵေႃႈ ၽၵ်းတူၶွၵ်ႈၶင်ပိုတ်ႇ၊ ပေႃးၽၵ်းတူႁူင်းႁဵၼ်းပိုတ်ႇ ၽၵ်းတူၶွၵ်ႈၶင်ဢိုတ်းယဝ်ႉ၊ ၵွပ်ႈၼၼ် ႁဝ်းႁၵ်ႉလုၵ်ႈလၢင်းၼႆႉ ယႃႇႁႂ်ႈပဵၼ်ႁၵ်းလုင်ႈလၢင်း”ၼႆ ၵဵဝ်ႇ ၵပ်းၵၢၼ်ပၢႆးပိင်ႇၺႃႇၼႆႉၵေႃႈ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဝႆႉပဵၼ်ႁူဝ်ၶေႃႈ လမ်ႇလွင်ႈ ဢၼ်ၼိုင်ႈသေ ႁဵတ်းသၢင်ႈမႃးယူႇယဝ်ႉ။
