SSPP/SSA
ဝၼ်းထီႉ-22-06-2019
တပ်ႉသိုၵ်း SSPP/SSA တပ်ႉၸုမ်း 702 ၽၢႆႇတႂ်ႈၵုမ်းၵမ် တပ်ႉငဝ်ႈသိုၵ်း 918 ၸွႆႈထႅမ်ၵူၼ်းမိူင်း ၵေႃႇသၢင်ႈ ၶူဝ် သဵၼ်ႈတၢင်း ပိူဝ်ႈတႃႇၵူၼ်းမိူင်းၵႂႃႇမႃး ငၢႆႈလူမ်ၸႂ် ၼႂ်းၵႄႈ ဝူင်ႈၵၢင် ဝၢၼ်ႈၼွင်ႁႅင်ႈ လႄႈ ဝၢၼ်ႈၼွင်ၸၢင်ႉ ဢိူင်ႇၸေႈႁီႈ ၸေႈဝဵင်းတၢင်ႉယၢၼ်း ။
တင်ႈတႄႇ ဝၼ်းထီႉ 08-06-2019 တေႃႇထိုင် ဝၼ်းထီႉ 18-06-2019 ၼႂ်းၶၢဝ်းတၢင်း (10) ဝၼ်း ယူႇတီႈ ၸဝ်ႈသိုၵ်းၸၼ်ၶိူဝ်း ၽူႈၵွၼ်းတပ်ႉၸုမ်း 702 ၽၢႆႇတႂ်ႈၵုမ်းၵမ် တပ်ႉငဝ်ႈသိုၵ်း 918 ႁႅင်းသိုၵ်း 49 ၵေႃႉ ၸွႆႈထႅမ်ၵူၼ်းမိူင်း သိူဝ်ႇတၢင်း ၶုတ်းႁွင်ႈ ႁဵတ်းၶူဝ် ပၼ်ပေႃႈမႄႈၵူၼ်းမိူင်း ဝၢၼ်ႈၼွင်ႁႅင်ႈ တင်း ဝၢၼ်ႈ ၼွင်ၸၢင်ႉ ပိူဝ်ႈတႃႇႁႂ်ႈပေႃႈမႄႈၵူၼ်းမိူင်းၵႂႃႇမႃး ၵပ်းသိုပ်ႇၵႃႉၶၢႆ ငၢႆႈလူမ်ၸႂ် ၼႂ်းၶၢဝ်းႁိုဝ်ႉၶၢဝ်းႁႅင်ႈ ။
ယူႇတီႈ ပႃႇတီမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး တပ်ႉၸုမ်း 702 တပ်ႉငဝ်ႈသိုၵ်း 918 လႆႈၵေႃႇ သၢင်ႈပၼ် မိူၼ်ၼင်ႇ သိူဝ်ႇတၢင်း ၊ ႁဵတ်းၶူဝ် သွင်လုၵ်ႈ ၊ ၶုတ်းပၼ်ႁွင်ႈ ၼင်ႇႁိုဝ်ၼမ်ႉတေဢမ်ႇ ၸၢင်ႈယိုင်ႈ ၸဵမ်ၸိူဝ်းၼႆႉ ။
ၵဵဝ်ႇၵပ်းၵၢၼ်ၸွႆႈထႅမ်ၵူၼ်းမိူင်း ၼႆႉ ၼႂ်းလိူၼ်ၼႆႉၵူၺ်း ယူႇတီႈ တပ်ႉသိုၵ်း SSPP/SSA တပ်ႉၸုမ်း 702 ဢၼ်ၸဝ်ႈသိုၵ်းၸၼ်ၶိူဝ်းဢွၼ်ႁူဝ် ႁႅင်းၵူၼ်း 100 ၵေႃႉပၢႆ လႆႈၵေႃႇသၢင်ႈသိူဝ်ႇတၢင်းပၼ် ပေႃႈမႄႈ ၵူၼ်းမိူင်း ၼႂ်းဢိူင်ႇၵဵင်းလိူၼ်ၸေႈဝဵင်းၵေးသီး ၸိုင်ႈတႆးပွတ်းၸၢၼ်း ၊ မိူၼ်ၼင်ႇ ဝၢၼ်ႈၼမ်ႉႁူဝ် ၊ ဝၢၼ်ႈ ၼမ်ႉမေႃႇ ၊ဝၢၼ်ႈၶူင်ႈထွၼ်ႇ ၊ ဝၢၼ်ႈၽၢႆၼိမ်း ၸိူဝ်းၼႆႉ ၵေႃႇသၢင်ႈသိူဝ်ႇပၼ်တၢင်း တၢင်းၵႆမီး 25 လၵ်းပၢႆ ၊ မိူဝ်းၼႃႈမႃးၵေႃႈ ၵဵဝ်ႇၵပ်းလူၺ်ႈၵၢၼ်ၸွႆႈထႅမ် ပေႃႈမႄႈၵူၼ်းမိူင်းၼႆႉ ၸွမ်းၼင်ႇပွင်ပဵၼ်လႆႈ တေၶတ်း ၸႂ်ၸွႆႈထႅမ်ၵႂႃႇယူႇ ဝႃႈၼႆ။
