ၶၢဝ်ႇ-SSPP/SSA
2019 Jun(12)
ၽူႈၵွၼ်းတပ်ႉလႄႈလုၵ်ႈတပ်ႉ ဢိၵ်ႇပႃးၽူႈယႂ်ႇၵူၼ်းလူင် ၼႂ်းငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ဢွၼ်ၵၼ်သိူဝ်ႇသၢႆးၼိူဝ်သဵၼ်ႈတၢင်း ၸွႆႈထႅမ်ပေႃႈမႄႈၵူၼ်းမိူင်း ၼႂ်းဢိူင်ႇဝၢၼ်ႈမိူတ်ႇ ၸေႈဝဵင်း ၵေးသီး ၸိုင်ႈတႆးပွတ်းၸၢၼ်း။
ဝၼ်းထီႉ 12.6.2019 ၸဝ်ႈသိုၵ်း ၸၼ်ၶိူဝ်း ၽူႈၵွၼ်းတပ်ႉၸုမ်း 702 တၢင်တူဝ်ငဝ်ႈငုၼ်းပႃႇတီႇမႂ်ႇသုင် ၸိုင်ႈတႆး တပ်ႉသိုၵ်းၸိုင်ႈတႆးသေ ဢွၼ်ႁူဝ်ၽူႈၵွၼ်းတပ်ႉလႄႈလုၵ်ႈတပ်ႉ ၼႂ်းတပ်ႉငဝ်ႈသိုၵ်း 918 ႁႅင်းၵူၼ်း(70)၊ ၵႃးတၢင်ႇသၢႆး (10) လမ်းပၢႆသေ ၸွႆႈထႅမ်သိူဝ်ႇသၢႆးၼိူဝ်သဵၼ်ႈတၢင်း ဢၼ်လုၵ်ႉဝၢၼ်ႈ မိူတ်ႇ ၵႂႃႇ ဝၢၼ်ႈၼမ်ႉႁူဝ်၊ ဝၢၼ်ႈၼမ်ႉမေႃႇ၊ ဝၢၼ်ႈၶူင်ႈထွၼ်ႇတေႃႇဝၢၼ်ႈၽၢႆၼိမ်း တၢင်းၵႆ 25 လၵ်း၊ လင်ႁိူၼ်းမီး 250 လင်ပၢႆယူႇယဝ်ႉ။
ၼႂ်းၶၢဝ်းႁိုဝ်ႉၼႆႉ ပေႃႈမႄႈၵူၼ်းမိူင်း လႆႈၵႂႃႇမႃးယၢပ်ႇလူၺ်ႈတၢင်းပိူဝ်ႉဢုင် ၵူႈပီႊလႄႈ ငဝ်ႈငုၼ်းပႃႇတီႇ မႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၸင်ႇဝႆႉၼမ်ႉၼၵ်း တၵ်းႁႂ်ႈပဵၼ်ၵၢၼ်တွပ်ႇၵုင်ႇ ပေႃႈမႄႈၵူၼ်း မိူင်းသေ ၸွႆႈထႅမ်ယူႇယဝ်ႉ။
မိူဝ်ႈၽွင်းၵေႃႇသိုၵ်းၵေႃႉႁၢၼ် ႁဵတ်းၵၢၼ်ၸွႆႈထႅမ်ပေႃႈမႄႈၵူၼ်းမိူင်းၼၼ်ႉ တၢမ်တူဝ် ၸွမ်သိုၵ်းလူင် ၸဝ်ႈပၢင်ႇၾႃႉ ႁူဝ်ပဝ်ႈလူင် SSPP/SSA ဢိၵ်ႇပႃး ၸွမ်သိုၵ်း ၸဝ်ႈၶိူဝ်းတႆး ၵႅမ်ႁူဝ်ပဝ်ႈ(1) SSPP/SSA လူင်းပၼ်ႁႅင်း လွင်ႈၸွႆႈထႅမ်ႁဵတ်းတၢင်းလီပၼ် ပေႃႈမႄႈၵူၼ်းမိူင်းယူႇယဝ်ႉ။
ၵဵဝ်ႇၵပ်း ၵၢၼ်ၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇ ၸွႆႈထႅမ်ပၼ်ပေႃႈမႄႈၵူၼ်းမိူင်းၼၼ်ႉ ငဝ်ႈငုၼ်းပႃႇ တီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးSSPP/SSA တမ်းဝၢင်းၽႅၼ်ၵၢၼ်သေ ၸွႆႈထႅမ်ၵေႃႇသၢင်ႈ ပၼ်ၵႂႃႇ ၸွမ်းၼင်ႇပွင်ပဵၼ် ယိုၼ်းထိုင်လႆႈယူႇယဝ်ႉ။
