ၶၢဝ်ႇ-SSPP/SSA
2019 Jun(13)
တပ်ႉငဝ်ႈသိုၵ်း(999) SSPP/ SSA ၸွႆႈထႅမ်ၵေႃႇသၢင်ႈတဵင်ၽၢႆ ယိူင်ႈၼမ်ႉ ၸွႆႈထႅမ်ပေႃႈ မႄႈၵူၼ်းမိူင်း ဝၢၼ်ႈပဵင်းၼိမ်လႄႈဝၢၼ်ႈပၢင်ႇၶမ်း ဢိူင်ႇမိူင်းယဵၼ် ၸေႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။
ဝၼ်းထီႉ-29.5.2019 တေႃႇဝၼ်းထီႉ 11.6.2019 ၼၼ်ႉ ယူႇတီႈ ၽူႈမီးပုၼ်ႈၽွၼ်းၽၢႆႇဢုပ်ႉ ပိူင်ႇ ၼႂ်းတပ်ႉငဝ်ႈသိုၵ်း (999) ဢွၼ်ႁူဝ်ၸွႆႈထႅမ်ၵေႃႇသၢင်ႈတဵင်ၽၢႆယိုင်ႈၼမ်ႉ ယွၼ်ႉၵူၼ်းမိူင်း ဝၢၼ်ႈပဵင်းၼိမ်လႄႈဝၢၼ်ႈပၢင်ၶမ်း ထူပ်းတၢင်းယၢပ်ႇ ၼမ်ႉၵိၼ်ၼမ်ႉၸႂ်ႉ ၽွင်းမိူဝ်ႈၶၢဝ်းႁႅင်ႈၼၼ်ႉ ၼႆယူႇယဝ်ႉ။
တႃႇၵေႃႇသၢင်ႈတဵင်ၽၢႆႇယိုင်ႈၼမ်ႉ ႁႂ်ႈပေႃးၸႂ်ႉပေႃးၵိၼ် တႃႈၼႃႈဝၢၼ်ႈပဵင်းၼိမ် ဢၼ်မီး လင် ႁိူၼ်း(22)လင်လႄႈ ဝၢၼ်ႈပၢင်ႇၶမ်း ဢၼ်မီးလင်ႁိူၼ်း(84)လင်ၼၼ်ႉ လႆႈၸႂ်ႉၵႃးထုၺ်(လူဝ်ႇတႃႇ) (1) လမ်း၊ ၶၢဝ်းတၢင်းႁဵတ်းၵၢၼ် ႁိုင်(43)ၸူဝ်ႈမူင်းသေ ယူႇတီႈတပ်ႉငဝ်ႈသိုၵ်း(999) လႆႈၸႂ်ႉၸၢႆႇငိုၼ်း ၵႃႈတဵင်ၽၢႆယိုင်ႈၼမ်ႉတေႃႇယဝ်ႉ သဵင်ႈ(4,187,500) ပျႃးယူႇယဝ်ႉ။
ၽူႈမီးပုၼ်ႈၽွၼ်းၼႂ်းတပ်ႉငဝ်ႈသိုၵ်း(999)ၵေႃႉၼိုင်ႈလၢတ်ႈဝႃႈ“ဢၼ်ႁဝ်းၶႃႈလႆႈသဵင်ႈငိုၼ်း ၸွႆႈထႅမ်ပေႃႈမႄႈၵူၼ်းမိူင်းၼႆႉ မၼ်းဢမ်ႇလမ်ႇလွင်ႈသင် ဢၼ်လမ်ႇလွင်ႈမၼ်းတႄႉ ႁဵတ်းယဝ်ႉမီးဝႆႉ ယဝ်ႉသေ တႃႇတေဢွၼ်ၵၼ်လုမ်းလႃး ႁႂ်ႈပေႃးၸႂ်ႉလႆႈၶၢဝ်းႁိုင်ၼၼ်ႉ ပဵၼ်ဢၼ်လမ်ႇလွင်ႈတေႉ တေႉ ၶႂ်ႈတုၵ်းသူၼ်းႁႂ်ႈၵူၼ်းဝၢၼ်ႈၵူၼ်းသူၼ်ႁဝ်း ဢွၼ်ၵၼ်လုမ်းလႃးလီလီသေ ႁႂ်ႈလႆႈၸႂ်ႉလႆႈတိုဝ်း ၵႂႃႇပီႊယၢဝ်းၶၢဝ်းႁိုင်ယူႇ”ဝႃႈၼင်ႇၼႆ။
