ၶၢဝ်ႇ-SSPP/SSA
2019 Jun (23)
ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး တႄႇဝႆႉၸုမ်းၵွၼ်းတၢင်း တီႈပၢင်သဝ်း ဝၢၼ်ႈႁႆး ၸေႈဝဵင်းၵေးသီး ၸိုင်ႈတႆးပွတ်းၸၢၼ်း။
ဝၼ်းထီႉ 12.6.2019 ၼၼ်ႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လႆႈပိုတ်ႇ ပၢင်သွၼ် လၢႆးၵၢၼ်ၵွၼ်းတၢင်းမႃးတေႃႇ ဝၼ်းထီႉ 23.6.2019 မီးၶၢဝ်းတၢင်း(12)ဝၼ်းသေ လႆႈလူင်းႁဵတ်း ၵၢၼ်ထူပ်းမိုဝ်းၵႂႃႇယူႇယဝ်ႉ။
ၽူႈၵွၼ်းႁွင်ႈၵၢၼ် ၸုမ်းၵွၼ်းတၢင်းလၢတ်ႈဝႃႈ“ပိူဝ်ႈတႃႇလူတ်းယွမ်းလႆႈ လွင်ႈလူတ်ႉၵႃးၽႃႇၵၼ်၊ တုမ်ႉၵၼ်၊ ၼင်ႇႁိုဝ်ပေႃႈမႄႈၵူၼ်းမိူင်းႁဝ်း ဢိၵ်ႇၵူၼ်းသိုၵ်းႁဝ်း တေဢမ်ႇထူပ်းၽေးလူတ်ႉၵႃး ၽႃႇၵၼ်ၼၼ်ႉ ႁဝ်းၶႃႈလႆႈၽိုၵ်းသွၼ်ဢဝ်လၢႆးၵၢၼ် ၵွၼ်းတၢင်းသေ တႄႇႁဵတ်းၵၢၼ်ထူပ်းမိုဝ်း ၵႂႃႇမိူဝ်ႈၼႆႉယဝ်ႉၶႃႈ”ဝႃႈၼႆ။
မိူဝ်ႈပူၼ်ႉမႃးဢမ်ႇတွၼ်ႉမီးၸုမ်းၵွၼ်းတၢင်းသေတႃႉ ဢိင်ၼိူဝ်ငဝ်းလၢႆးလႅၵ်ႈလၢႆႈမႃး ၵူၼ်းၵိုၼ်းမႃး၊ လူတ်ႉၵႃးၶဝ်ႈဢွၵ်ႇၼမ်မႃးလႄႈ ပၼ်ႁႃလူတ်ႉၵႃးတွင်ႈၵၼ်ၵေႃႈမီးမႃးတင်းၼမ်တၢင်းလၢႆ၊ လိူဝ် ၼၼ်ႉ ၼင်ႇႁိုဝ်ၵူၼ်းမိူင်းပိုၼ်ႉတီႈ တေပွင်ႇၸႂ်ၼိူဝ်ပၵ်းပိူင်လၵ်းမၢႆ သဵၼ်ႈတၢင်းၸိူဝ်းၼႆႉ မၼ်းပဵၼ် ပိူင်ဢၼ်လမ်ႇလွင်ႈ ဢၼ်ၼိုင်ႈယူႇယဝ်ႉ။
